МАХАЧЫ ХЫЛИИН КӦЗІТКЕН
02.10.2019
Хабарлар
Марығ соонда. Кикбоксингче Россияның саблығ спорт узы Максим Прокопьевтің сыйии ӱчӱн Ағбанда ирткен регионнар аразындағы турнирде пу тоғазығ прайзының хайиин тартхан
«ЦСКА-Хакасия» команда ӱчӱн турысхан чир-суғҷыбыс Николай Степанов кикбоксингче спорт узына кандидаттың нормативін толдырыбысхан. Че удостоверение ам даа алғалах. Аннаңар, марығларда араласчатса, аны пастағы разрядтығ тіп пас саладырлар. Спортта мындағ кӧзідімнер орта полчалар.
Ағаа Ағбандағы «Хазых» спортзалда ирткен турнирде чоннар аразындағы класстығ спорт узы Илья Афониннең тоғазарға киліскен. Аалчы кізі Томсктаң марығда аралазарға килтір. Пӧзік сыннығ чир-суғҷыбыстаң тоғыс часха улуғ.
- Нанҷыларым мағаа чоохтааннар: тоғазығның пастағы чардығында ла сыдас парыбыссаң, соонаң сала ниик полар. 27 частығ спортсмен табырах майых парар, - кӱлімзірепче николай Степанов.
Олох арада 18 частығ чир-суғҷыбыс пастағы туста аалҷыдаң чочынчатханы, чахсы удурлас полбинчатханы харахха тасталчатхан. Алай, сынап таа, ол тоғазығның пастағы чардығында сыдас парыбызар пӧгін турғыс салды ба? Чох, кирек андағ полбиндыр. Мына Николай, махачыланыбызып, чоннар аразындағы класстығ спорт узына удурлазып пастабысты. Аның хатығ сабызына андағох хатығ сабыснаң нандырча, азахнаң тепклирге маңнанча, сыдасчаан сыдасча.
- Кӧрдек аны, пик сындырлығ оолағас полтыр, - махтапчалар рингте маңат арачыланчатхан, удурлазарға маңнанчатхан чир-суғҷыбысты кӧрігҷілер.
Сынап таа, аалҷы кізі пістің оолны табырах утып алар тіп прайзы сағынған полар. Николай Степанов, тізең, сыбыра арачыланар орнына, пірее хати «ыырҷызын» тазылат пар килче. олох арада чиит кикбоксерның сабыстарынаң илья Афонин піліп арачыланчатханын кӧрчебіс. Хайдағ даа полза, аалҷы кізі кӧп марығларда араласхан, чиңістер тутхан. Аннаңар даа аның узы артых полчатпас па. Утып алған.
- Тӧдір пазынмас оол полтыр. Спортты тастабаза, чидіглерінең кӧп хати ӧріндір турар, - махтаан аны Илья Афонин, марығ соонда чоохтасханда.
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде