ПІСТІҢНЕР АЛНЫНДА
10.01.2020
Хабарлар
Меспектіг хоккей. 28-29 декабрьда 2019 чылда Ағбандағы «Саяны» позының айғызында Новосибирсктең килген «Сибсельмаш-2» команданаң теестегі ойыннар иртірген
Марығ ээлеріне хайди даа чиңіс тударға кирек полған. Меспектіг хоккейңе Россия чемпионадының пӧзік лигазында ойнапчатхан іскеркі подгруппадағы командалар аразында «Саяны» пастағы орында парчатса, ікінҷі орындағы «Кузбасс-2» пістіңнердең 3 ле санға соона халчатхан. Аннаңар чир-суғҷыларыбыстың алнында пір пӧгін турған: ибде ізестіг чиңістер тударға. Ол сылтағнаң даа, неке, 28 декабрьда «Саяны» стадионзар кізілер илееде чыылысханнар.
Тоғазығ пасталар-пасталбастаңох, кӧрігҷілер ай-сым одырғлабысханнар: пістіңнерге Иван Васильев гол кир пирді нооза. Ойын саңай пасха оңдайнаң пар сыхты. Оой ла чиңіс тудар орнына айғы ээлеріне арачыланарға килісче. Аалҷылар, тізең, пастағы гол кирібіскен соонда, пазох ла тудығ чох алнынзар кӱстенчелер. Мына «Сибсельмаш-2» команданың хоккеизі пістің хаалха алнынзар чалғысхан на сых килді, че меспек чаза учуға халған. Айғы ээлері прай команданаң арачыланчалар. Ол туста меспек Руслан Гавричковтың холына кірген. Амды чир-суғҷыбыс аалҷыларның хаалха хадағҷызынаң пірдең пірге тоғас парды - гол! Саннар тиңнес парғанда, кӧрігҷілер суулас сыхханнар, пістіңнерні гол кирерге кӧӧктіріп пастааннар. Михаил Селедков оларны ӧріндірді, аалҷыларға ікінҷі гол кирібіскен. Ол сан ойынның пастағы чардығы тоозылғанҷа алыспаан.
Тоғазығның ікінҷі чардығында команда капитаны Евгений Ткачук пірсі пірсінің соонҷа аалҷыларға ікі гол кирібіскен. Амды кӧрігҷілер ӧріністерін чазырбинчатханнар: пістіңнер марығ ээлері полчатханын маңат кӧзітчелер, 4:1 саннаң алнында парчалар.
28 декабрьдағы ойын 6:1 саннаң тоозылған, Иван Касаткиннең Александр Захваткин пірер гол кирібіскеннер. Амды Хызылчарда «Енисей-2» Кемеровтағы «Кузбасс-2» команданаң хайди ойнабызарын сағып аларға кирек. Сынап айғы ээлері чиңіс тутса, пістіңнер пастағы орынны холдаң позытпастар. Че «Кузбасс-2» утып алза, саннар пазох тиңнес парарлар. «Енисей-2» команда 5:4 саннаң утыр салған. Пастағы орында пазох ікі команда пол парды: «Саяны» паза «Кузбасс-2». Оларның 24-ер сан. Аннаңар прайзы даа 29 декабрьдағы ойыннарны сағаан.
Пістіңнерге чиңіс хайди даа кирек. Кӧрігҷілерні ӧріндіріп, тоғазығ пасталғандох, Александр Захваткин гол кирібіскен. Аның соонда Сергей Максимовнаң Михаил Селедков пазох пірер гол кирібіскеннер. Тоғазығның пастағы чардығы тоозылар алнында Денис Баранов, аалҷылар хоккеизі, пенальтидең пір гол кирібіскен. 4:1 саннаң пістіңнер алнында парчатханда, ойынның пастағы чардығы тоозылған.
Тоғазығның ікінҷі чардығында Александр Захваткиннең Тимофей Ващук пірер гол киргеннер, Михаил Селедков ікі гол кирібіскен. Іди пу ойын тузында Михаил Селедков позының пӧзік узын кӧзіткен, аалҷыларның хаалхазына 4 гол кирібіскен. «Сибсельмаш-2» команда ӱчӱн ойнапчатхан Иван Кондратьев пір гол кирерге маңнанған. Тоғазығ 8:2 саннаң тоозылған, айғы ээлері ізестіг чиңіс тутханнар.
Амды пазох ла Хызылчардағы тоғазығ хайди тоозыларын чидікпин сағыпчалар. Сынап анда «Кузбасс-2» команда пазох айғы ээлерін утып алза, пістің подгруппадағы ікі команданаң тиң саннар пол парар. Хызылчардағы «Енисей-2» позының айғызында «Кузбасс-2» команданы 5:3 саннаң утып алғаннаңар сағба читкенде, кӧрігҷілернің дее, «Саянының» хоккеисттерінің дее ӧріністері улуғ полған.
Андағ оңдайнаң Наа чыл алнындағы ойыннар соонда пістіңнернің 27 сан. «Саяны» пастағы орында. «Кузбасс-2» команданың 24 сан, ол ікінҷі орында. 21 сан чыып алып, Хызылчардағы «Енисей-2» команда ӱзінҷі орында парча. Новосибирсктегі «Сибсельмаш-2» команда, 13 саннығ олох тӧртінҷі орында халды.
Амды 14-15 январьда пістіңнер пос айғызында Хызылчардағы «Енисей-2» команданаң тоғасчалар. Оңарылыстығ, пістіңнерге чиңіс тударға кирек. Че аалҷыларның даа андағ пӧгін. Сағам ікінҷі орында парчатхан «Кузбасс-2» команда даа тӧдір пазынарға сағынминча, неке.
14-15 январьда ойыннар 19.00 часта пасталчалар. Кірері тикке.
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде