БЮДЖЕТ ПАРЫСТАРЫН ӦСКӀРЕР ПӦГӀННЕҢ.
08.09.2017
Хабарлар
Владимир Штыгашев 6 сентябрьда Хакасияның Ӧӧркі Чӧп президиумының теестегі чыылиин иртірген. Ӧӧн сурығларның пірсі налогтарнаң палғалыстығ хайзы законнарзар алызығлар кирердеңер полған. Алызығлар Россияның финанстар министерствозының кирексіністерін толдырар паза республика бюджедінің парыстарын ӧскірер пӧгіннең кирілчелер.
Республиканың «Транспорт налогынаңар» паза «Организацияларның ис-пайына налогтаңар» законнарынзар хайдағ алызығлар кирілчеткенінең Хакасияның финанстар министрі Ирина Войнова таныстырған. Хайди ол таныхтаан, Хакасия Правительствозы кирчеткен алызығлар Россияның минфині хысчатхан кирексіністернең палғалыстығ. Федеральнай министерство пістің республиканы хорадығларны хызырарға паза пос парыстарын ӧскірерге хаҷанох хысча нооза. Аннаңар Хакасия Правительствозы, Ӧӧркі Чӧпнең хада тоғынып, ол кирексіністерні толдырарға, че олох туста республика бюджедіне тың ӱрег итпеске кӱстенче.
Пастағы алызығлар транспорт налогын ӧскірерінең палғалыстығ. Таныхтирға кирек, ӧзіс двигательі кӱстіг машиналарға ла теелер
- Двигательіндегі ат кӱзі 250-дең асчатхан ниик автомобильлерге паза таарлағ тартчатхан машиналарға.
- Пӱӱнгі кӱнде двигательіндегі ат кӱзі 250-дең асчатхан ниик автомобильлернің налог ставказы - 100 салковай (пір ат кӱзі ӱчӱн), пол парар - 104 салковай. Таарлағ тартчатханнарның - 80 салковай, пол парар - 85, - чарытхан Ирина Войнова.
Министр ідӧк пасха регионнарны тиңнестіріге ағылған. Хызылчар крайында андағ ниик автомобильлернің налог ставказы 102 салковай полча, Кемеров облазында - 135 салковай, Тувада - 98 салковай, Алтай Республикада -120 салковай. Таарлағ автомобильлернің налог ставказы Хызылчар крайында 85 салковайға тиңнелче, Кемеров облазында ідӧк 85 салковай, Тувада - 62 салковай, Алтай Республикада - 40 салковай.
Депутаттар министрдең андағ, ат кӱзі 250-дең асчатхан, машиналар Хакасияда кӧп пе тіп сурғаннар. Ирина Войнованың искіриинең, андағ автомобильлер республикада ас нимес. Ниик машиналар: организацияларның -149, чуртағҷыларның - 2500.
Таарлағ машиналар: организацияларның - 690, чуртағҷыларның -1352. Аннаңар республика бюджедінзер транспорт налогынаң парыс ідӧк ӧзер тіп сахталча. 2018 чылда 800 муң салковайға кӧп кірер, организациялар транспорт налогын аванстаң тӧлир сылтаанда, 2019 чылда 5,2 миллион салковайға кӧп, чуртағҷылар 2018 чылның транспорт налогын тӧлир сылтаанда.
Ікінҷі алызығ организацияларның ис-пайына налог ахчазына теелген, орта чоохтаза - хайзы льготаларны чох идеріне. Хайди чарытхан финанстар министрі, ӧӧнінде лизингнең айғасчатхан пірігістернің льготазы
чох иділче. Андағ организациялар саны республикада тӧрт ле полтыр, аннаңар бюджет парызы тың хозылбас: 2018 чылда 200 муң салковай хоза кірері сахталча, 2019 чылда -300 муң салковай.
Бюджетче комитеттің кнезі Сергей Комаров пу закон проекті тузында тимнелгенін паза аны аларға кирек полчатханын таныхтаан.
- Піске Россияның финанстар министерствозының кирексіністерін толдырарға кирек. Нормативнай пічіктерні алып, піс кӧзіділген кирексіністерні толдырчатханыбысты киречілирбіс, - теен ол.
Ӧӧркі Чӧп президиумы пу чыылығда ідӧк Асхыс аймааның депутаттар чӧбі тимнеен закон проектін кӧрібіскен. Ағаснаң тузаланҷаң оңдайдаңар республика законынзар алызығлар кирер закон проектінең Асхыс аймааның депутаттар чӧбінің кнезі Владимир Зимин таныстырған. Чоох парча одыңны тикке тимнир праволығ чуртағҷыларның санын алғыдыбызардаңар тіп таныхтаан ол.
- Пӱӱнгі кӱнде пос чуртында чуртапчатханнар ла андағ праволығ полчалар, социальнай найм чӧптезии хоостыра муниципальнай чуртта чуртапчатханнарның андағ право чоғыл. Аннаңар мында сидіксіністер сығысча, - чарытхан Владимир Зимин.
Ӧӧркі Чӧп кнезі Владимир Штыгашев асхыстағыларның закон проекті орта полчатханын, аалдағыларның кирексіністерін арачылапчатханын паза Хакасияның кӧбізі аймахтарына теелчеткенін таныхтаан.
- Асхыс, Таштып, Ағбан пилтірі, Шира, Орджоникидзе аймахтарында песті одынарында ӧӧнінде ағаснаң на тузаланчалар. Хомзынысха, олар прайзы ла пос чуртының ээлері полбинчалар. Закон чурт ээзі полчатханнарға ла теелчеткені саба, аны тӱзедерге кирек, - закон проектіне хабазып чоохтанған Владимир Штыгашев.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
28 | 29 | 30 | 31 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 1 |
Кӱн таңмазы
Хакасияда
Россияда
Тилекейде