ӰЛГӰ ЧОН ӰЧӰН ТУРЫЗАРҒА КИРЕК
23.01.2019
Хабарлар
Чоннаң тоғазығ. Хакасияның пазы Валентин Коновалов чуртағҷыларнаң теестегі тоғазиин иртірген. Пу хати Харатас городта.
ВАЛЕНТИН КОНОВАЛОВ 18 ЯНВАРЬ ИИРДЕ ХАРАТАСТА ЧОННАҢ ТОҒАСХАН. ТОҒАЗЫҒ «ЛУНАЧАРСКИЙ» КУЛЬТУРА ӦРГЕЗІНДЕ ИРТКЕН. ТАНЫХТИРҒА КИРЕК, ПУ КІЧІГ НИМЕС ПӰДІРІГ
- КӦРІГҶІЛЕР ЗАЛЫНДА 420 КІЗІ СЫЫП ПАРЧА. ЧЕ, ІДИ ДЕЕ ПОЛЗА, ТОҒАЗЫҒА КИЛГЕН ЧОН ЗАЛҒА СЫЫСПИНЧАТХАН. СТЕНЕЛЕР ХЫРИНДА ДАА ПОС ОРЫН ЧОҒЫЛ, ОРАЙЛАТ САЛҒАННАР ӦӦН ІЗІК ХЫРИНДА ТЫҒЫЛЫСХАН. АНЗЫ ЧОН МЫНДАҒ ТОҒАЗЫҒЛАРНЫ КИРЕКСІПЧЕТКЕНІН КӦЗІТЧЕ.
ХАКАСИЯНЫҢ ПАЗЫ ТОҒАЗЫҒА ОРЫНҶЫЛАРЫНАҢ ПАЗА МИНИСТРЛЕРНЕҢ ХАДА КИЛГЕН, СУРЫҒЛАРҒА ЧАПЧАҢ ПАЗА ЧАРЫДА НАНДЫРАР ӰЧӰН. ВАЛЕНТИН КОНОВАЛОВ ТОҒАЗЫҒНЫ ПРЕМИЯЛАР ИБІРЕ ПАРЧАТХАН СУУМ-СААМНЫ ЧАРЫДАРЫНАҢ ПАСТААН.
Чарыда чоохтап пирген, хайди тӧстелче чиновниктернің чал ахчазы. Хакасия пазының таниинаң, премиялар хаҷаннаң сығара пирілчелер, алындағы команданың олар хай-хай пӧзік полғаннар паза ағаа хоза ай сай даа пирілчеңнер.
- Пістің министрнің оклады 22 муң салковайдаң тӧбін, - искірген ол. - Ол окладха хоза тӧлеглер хозылчалар: аймах паза север коэффициенттері. Чал ахчазының алынча чардығы премиялар полча. Андағ ниме хазнаның прай даа регионнарында пар.
Республика пазы наа правительство хорадығларны хызырарға кӧстегліг полчатханын таныхтаан. 2018 чылның декабрьында премияларға хорадығлар, 2017 чылның пуох тузынаң тиңнестірзе, ӱс хати хызырыл парғаннар тіп чоохтаан ол.
- Мин тоғызым ӱчӱн, ол санда 2019 чылның бюджеді ӱчӱн, хайзын піс алғабыс, толдыразынаң нандырарға тимдебін. Піс амды кӧрглепчебіс оңдайларны, хайзы регионның устағҷыларына премиялар пирерін кӧріндіре ит салар. Ол тоғысха, арса, халыхтарның кізілерін паза депутаттарны тартарбыс. Че премиялардаң саңай хыйа полыбызарға чарабас, ол полған на тоғынҷыны паза чиновникті, ол санда устағҷыны, тоғызын тӱзімніг толдырарға кӧӧктірче нооза, - премиялар суриин тоосхан Валентин Коновалов.
Че, чыылысхан чонны кӧргенде, премиялар ибіре парчатхан суум-саам хара-тастағыларны тың сағыссыратпинчаттыр. Пу сурығҷа Хакасия пазына сурығлар паза пирілбеен. Город чуртағҷыларын саңай пасха сурығлар сағыссыратча. Харатас пір чыл чарым артиинаң город устағҷызы чох чуртап парир. Город пазы полчатхан Белоноговтың хоостыра істезіг ам даа парча, ол пос кӧңнінең тоғызынаң парыбызарға ынабинча, аннаңар аның полномочиелерін чарғы чарадиинҷа ла тохтадыбызарға чарир. Город пазының тоғызын толдырчатхан Ольга Леонтьева, тізең, ол тоғысха тың на сыданминчаттыр. Анзын Леонтьеваның сан пирізі соонаң залдаң кӧп сурығ пиріл сыхханы кӧзіткен. Сидіксіністернің кӧп чардығы орында пӧгілер оңдайлығ, орындағы пос устаныс органнарының полномочиелеріне кірчелер тиирге чарир. Олар чол чӧрізін хорғыс чох идеріне, автобустар чӧрізіне, орамаларда чарытхы тартарына, город кӧрімін иптиріне, ӱгренҷілерні школаларда азырирына, ээзі чох адайларнаң кӱрезеріне теелгеннер. Городтың устағ-пастаа, бюджетте ахча чоғылына сылтанып, иргі тураларны изелчеткен туралар санына кирерге хынминчатханынаңар хоп парох полған.
- Мин прайзын даа кӧзірібізерҷікпін, че пӱӱнгі кӱнде пістің парыстар чоғыл, - ахтанған Ольга Леонтьева. - Пӱӱн піс школаларда палаларны азырирына даа ахчаны хызырыбысхабыс, парыстар чохтаңар.
Илееде сурығ ЖКХ-ҷа полған. Харатас чуртағҷылары, устапчатхан компанияларның тоғызына чӧпсінмин, хоптанғаннар. Республика правительствозы мында юридическай саринаң полызығ пирерге тимдезінеңер искірген.
Сурығларның пасха чардығы алғым арах, тиксі республикаа паза хазнаа даа теелчеткен полған. Кӧзідімге, сӧп-сап хоостыра кӧп сурығ пирілген. Город чуртағҷылары сӧп-сап ӱр тус апарылбинчатханынаңар, региондағы оператор полчатхан «Аэросити-2000» дежурнайларына телефонҷа сығдырат полбинчатханнарынаңар хоптанғаннар. Ідӧк чуртағҷыларны сӧп-сапты чох идер ӱчӱн тарифтер тың пӧзік полғаны сағыссыратча.
- Тариф кӧдіре полғаны хоостыра мин сірернең толдыразынаң чарасчам, - пу сурығны чарыдып, таныхтаан Хакасия пазының советнигі Александр Бурмистров.
- Мин пір айҷа пу сурығнаң айғасчам. Январь ӱчӱн тариф хати саналар, сын хорадығларға тӧстене.
Хакасияның пазы Пригорск поселокка хайығ саларға сурынғаннар. Анда ісчең суғ арығ поларын хаҷаннаң сағыпчалар, Россия президенті адына даа пічік пастырлар. Че кирек молҷағлардаң ырах парбинчаттыр.
- Ол тоғыс уғаа хорадығлығ, 170 миллион артиинаң салковай кирек, - нандырған пу сурығҷа Хакасияның пӱдіріг паза ЖКХ министрінің пастағы орынҷызының тоғызын толдырчатхан Анатолий Безлепкин. - Постарың пілчезер, сірерзер тағ азыра суғ ағысчаң трубалар тартыбызарға оой нимес. Че 2020-2021 чыллар аразына піс пӱдірігні тоос саларбыс, Пригорск арығ суғлығ полар.
Пӱдіріге ахча федеральнай, республика бюджеттерінең позыдылар тіп кӧрілче.
Хакасия пазының пастағы орынҷызы Андрей Асочаков городты чылыдарын пір ле пірігістің холына пиргені Харатаста удаа сығысчатхан сидіксіністі, квартираларда соох полғанын, чох идібізерге оңдай пирерін чуртағҷыларға чарыт пирген.
Республика пазы Валентин Коновалов прай кірген сурығларҷа чахығлар пирілер, оларҷа специалисттер тоғынарлар тіп чуртағҷыларны ізендірген. Олох туста регион устағҷызы Ольга Леонтьеваа городты пис чардыхха пӧлібізерге паза оларда городтағыларнаң, неделя сай тоғазып, азых оңдайнаң чоох алыс турарға чӧп пирген. Республика правительствозы чіли.
- Ӱлгӱні чон таапча, ол чонның кирексіністерін арачылазын тіп, - таныхтаан Хакасияның пазы Валентин Коновалов, чыылығны тоозып. - Че законнар килістіре ниместеңер, хомзынысха, прай сурығларны муниципальнай паза регион синінде дее пӧк полбассың Че кізілер хайди чуртапчатханын піс пілерге кирекпіс. Аннаңар чуртағҷыларнаң мындағ тоғазығларны піс, муниципалитеттерзер чӧріп, тӧреміл иртір турарбыс, пар оңдайларны кӧрглеп, полызарға кӱстенербіс.
Таныхтирға кирек, Хакасия пазынын чуртағҷыларнаң пу алғым тоғазии ікінҷізі полды. Пастағызы ирткен чылда декабрьның ортызынзар Ағбан пилтірінде ирткен.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 31 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде