ХАЗНА ХЫРЫҒЛАРЫ ІЗЕСГІГ ХАДАҒДА ПОЛЗЫН
31.05.2019
Хабарлар
Чааҷы службазы тузында пограничник полған Александр КОЛЧИНАЕВ ортызында
Митинг. 28 майда пістің хазнада Пограничник кӱні таныхталған. Ағбанда ағаа чарыдылған митинг ирткен
Пӱӱл Пограничник кӱні 101-ҷі хати иртче. Хайди таныхталған митингте, пу кӱнде піс, хазна хырығларын хадарып, чуртазын пир салған чир-суғҷыларыбысты хумартхылапчабыс. Илбек Ада чаа тузында пограничниктер иң пастағылар санында ыырҷыдаң тоғыр турысханнар. Олар прай фронттарда чааласханнар.
Пограничник кӱні алнында, 27 майда, республиканың чааҷылар комиссариады алнында «Боевой расчет» мероприятие полған. Ол кибір Хакасияда кӧп чыл иртірілче. Республиканың ветераннар чӧбінің устаа ирткен ӱс чылның тоғыс салтарларынңа сан пиріс иткен.
Митинг Россия паза Хакасия гимннерінең азылған. Пограничниктерні ФСБ-ның ветераны Александр Щукин алғыстаан. Ол чооғында 101 чыл мының алнынзар айланған. Андада «пограничниктер хадаа» сӧстер чох таа полған. Че андада даа пістің пурунғыларыбыс хазна хырығларын хадарғаннар. Ідӧк Александр Григорьевич полар туссар кӧрізінең ӱлескен. 99 чыл ирт парза, пӱӱнгі пограничниктернің пархалары ідӧк хазна хырығларын ізестіг хадағда тударлар.
Митингте ідӧк чоох тутхан Хакасияның ветераннар чӧбінің кнес орынҷызы Юрий Седых. Аның чооғынаң, пограничниктер войсколары алынҷа войсколар полчалар. Оларға хазна хырығларын хадарарға ӱлӱс тӱскен.
- 60 муң километр - ол картадағы олаңай сиг нимес. Сірер хазна хырығларының сидік чолларын иртібіскезер. Андағы полған на оох-теек нимені сағызыңарда тутчазар. Прайзыңарны ӱлӱкӱннең алғыстапчам. Ветераннар чӧбі сірер чииттерні патриотизмге ӱгредерін узарадарына ізенче, - таныхтаан Юрий Седых.
Аннаң пасха чоох тутханнар «Ағбан» аэропорттағы пограничнай посттың пастығы, улуғ лейтенант Вячеслав Моисеев паза республиканың чааҷылар комиссары Виктор Максимчук. Алғыстас сӧстері соонда ікі пограничникке танығлығ сыйыхтар читірілген. Анаң, хазна хырығларын хадарып, чуртастарын пир салған пограничниктерні хумартхылап, прайзы пір минута сым турған. Митингтін халғанҷызынзар чыылысхан чон мемориал комплексінзер чахайахтар паза веноктар салған. Анаң Успас от хыринҷа маршнаң ирткеннер.
Пайрамнығ митинг тоозыл парғанда, пограничник полған Александр Колчинаевнең чоохтазып алғабыс. Чааҷы службазын ол 1992-1993 чылларда ирткен. Ағбаннаң хығыртылып, ол 42 чиит оолнаң хада Россияның паза Хыдаттың хырығларын хадарарға Благовещенсксер ызылған. Чиит чааҷы ӱгредиин иртібізіп, службазын андох узаратхан.
- Мин чааӌы службазын 1,5 чыл ирткем. Частьсар читкенібісте, піске Таджикистанзар парарға тимненерзер тіп искіргеннер. Піс ӱгредігні ӱс айға иртібіскебіс.
Че Таджикистанзар парарға чахығ килбеенде, пісті Благовещенск хыриндағы хырығларзар ызыбысханнар. Мин служба иртчеткен чылларда хазна хырығларын ӧӧнінде Россия саринаң закон хыйыстыра кискеннер. Пірсінде піс 14-15 частығ оолларны тудып алғабыс. Олар, хыдат фильмнерін кӧріп алып, кунг-фу кӱрезиине ӱгреніп аларға сағыныбысханнар, - чааҷы службазын сағысха кирген Александр Панкович.
Пӱӱнгі кӱнде Александр Колчинаев тимір чолда хадағҷы полып тоғынча. Служба соонаң кӧп чыл ирт парған даа полза, ол чааҷы арғыстарынаң палғалызын ӱспинче.
Автор :
Антон ЧЕРТЫКОВ Сом Дмитрий СУНЧУГАШЕВТИ
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 31 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде