УНДУЛБАС ЧОРЫХ
30.10.2019
Хабарлар
Піске пасчалар. Асхыс аймааңдағы Ус чул аалның улуғ частығ чуртағӌыларын саблығ писатель Михаил Еремеевич Кильчичаковтың адынаң литература музейінзер ал чӧргеннер
Амғы туста Ус чул аалда чуртапчам. Итсе, хонҷых Чоғархы Тӧӧ аалда тӧреем. Мының алнында аны совхозтың 4-ҷі фермазы тіҷеңнер. Іди ле адаза, прайзы пілҷең.
Пірсінде аалдағы улуғ частығларны клубсар хығырыбысханнар. Хайди ибде ле одырчатчаң тіп, пар килерге чаратхам. Андар читсем, улуғ частығлар илееде чыылыс партыр. Клуб тоғынҷылары пісті ӱлӱкӱннең алғыстапчалар.
«Хайдағ андағ ӱлӱкӱн полҷаң?» - удур-тӧдір кӧріс сыхтыбыс. Улуғлар кӱні таныхталчатхан полтыр. Пістің ӱлӱкӱнібіс. Клуб тоғынҷылары хайдағ-да ойын иртіргеннер. Прайзына аралазарға кирек полтыр. Мин дее сым одырбаам, сӱзӱн утып алғам. Кӧңнібіс кӧдіріл килген.
Анаң пісті школа автобузына одырарға хығырчалар. Тасхар уғаа истіг, чылығ кӱн турчатхан. Аннаңар автобусха тол пардыбыс. Клуб тоғынҷылары амды Михаил Еремеевич Кильчичаковтың адынаң музейзер парарбыс тіпчелер. Минің тӧреен-ӧскен аалым нооза. Хайди парбаспын. Анда пірее иргі таныстарыма даа тоғасхлап аларбын тіп ізенчем. Чоох-чаахнаң даа турып албас па.
Чидер чирге читкенде, пісті анда музей тоғынҷызы Надежда Никифоровна Боргоякова оңнығ чылығ сӧстернең удурлабинча. Пістің чонның кибірі хоостыра, холларында чірчелер. Музейде аймах аалҷыларны турыстығ удурлирға кӧнік парғаны сах андох харахха тасталча. Хайди чапчаң хайынча. Пісті удурлирға маңат тимнен салтыр. Музей туразында чылығ паза истіг. Прай ниме ипти, килістіре турғызылтыр, арығ тудылчатханына тың чапсаабыс.
Музей тоғынҷызы чон алнында чоох тударға маңат кӧнік парғаны пілдірче. Ол Михаил Еремеевичтеңер, аның чуртас чолынаңар, чайаачы тоғыстарынаңар аалҷыларға пір час артиинаң чоохтаптыр. Че мағаа аны истерге киліспеен. Тӧреен аалым арали пас чӧріп аларға сағынып, музейдең ағырин сығыбысхам. Сынап таа, хайдағ сіліг чирде турча Чоғархы Тӧӧ аалым. Мында ирткен чалаас азах олған тузым. Тиң частығларнаң хада ибіркі чирлерні прай кӧріп аларға харасчаңмыс. Нинҷе кӧп саблығ кізі сыхты пу аалдаң - прайзын адап таа полбас. Андағларның пірсі полча Михаил Еремеевич Кильчичаков.
М.Е. Кильчичаковтың адынаң музейзер чӧр килгенібіске прайзы тың ӧрінче. Піске, улуғ частығларға, чорыхха сығарға удаа киліспинче. Аннаңар аалдағы клуб устағҷыларына андағ ӱлӱкӱн ӱчӱн улуғ алғызыбыс читірчебіс. Мындағ килістіре оңдай табылғанда, алғыстас сӧстерін читір пирерге чарир клуб устағҷызы Светлана Семёновна Боргояковаа, клуб тоғынҷылары Валентина Михайловна Колеватоваа, Елена Геннадьевна Тинниковаа.
Ідӧк автобус водительі Геннадий Кириллович Бурнаковха алынҷа алғыстас сӧстерін читірерге сағынчабыс. Чоғархы Тӧӧ аалзар парчатханда даа, нандыра айланчатханда даа, автобузын пір дее атыхтырбин, сіліктірбин, уғаа иптіг чӧрген. Піске, улуғ частығ кізілерге, андағ чахсы хайығдаң пасха ниме дее кирек чоғылға тӧӧй.
М.Е. Кильчичаковтың адынаң музейде тоғынчатхан Надежда Никифоровна Боргояковаа хайди даа алғыстас сӧстерін читірерге кирек. Улуғ частығларға ол уғаа маңат сыйых иткен - музейдеңер чарыда чоохтап пирген. Аннаңар пу тузалығ чорых прайзының сағызында ӱрге халар. Прайзынаң артых мин ӧрінгем - тӧреен аалымда полып алғам, олған тузымны сағысха киргем.
Автор :
Светлана БУРНАКОВА Ӱс чул аал
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 31 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде