ИДӀНҶЕКТЕР САНЫН ХОЗАР ЗАКОН АЛЫЛДЫ
27.09.2019
Хабарлар
**************************************************************************************
****************************************************************************************************************
Олох туста наа идінҷектер пос киреен пастаанҷа алай піссер пасха регионнардаң тартылғанҷа, орындағы бюджет парызы хызырыларына тимде поларға кирек. Экономика политиказынҷа, промышленностьча комитет кнезі Василий Шулбаевтің искіриинең, статистика саннарынаң, пис чыл аразына республикада 3000 идінҷек тоғызын тохтатхан. Пӧгін турча - оларны айландырып аларға. «Идінҷек - ол чалғыс кізі нимес. Ол - ӧӧнінде кічіг алай ортын предприятие, хайда кізілер тоғынчалар, оларның ӱчӱн ідӧк налог тӧлелче, ол - ис-пай паза чир, хайзының ӱчӱн ідӧк налог тӧлелче. Тиксі алза, налогтар орындағы бюджетке парчалар, аннаңар пу закон кічіг паза ортын пос киреен пастирға чахсы тӧстег поларына ізенчем», - салтар иткен Василий Иванович.
ТОҒЫСТЫ ТОЛДЫРАРҒА 3 АЙ ПИРІЛЕР
«Хакасия правительствозынаңар» законға алызығлар кирілген. Алызығлар киректелчеткенін Владимир Николаевич позы чарытхан. Кирек, тізең, правительствода пӧзік должностьтарға турғызылчатхан кізілер илееде тус «и.о.» полчатханынаң палғалыстығ. Закон хоостыра, тізең, республика пазының прай орынҷыларын паза финанстар министрін Хакасияның Ӧӧркі Чӧбі чаратча, анзын иртпеенде, устағҷылар тоғысты толдырчатханға саналчалар. Пӱӱнгі кӱнде, тізең, республика пазы орынҷызының тоғызын толдырған кізілер, пу «иркінге» дее читпин, илееде тус тоғын салып, тоғыс орыннарын позытчалар. Алызығлар хоостыра амды «и.о.» хоза танығны ӱс айдан ӱр ал чӧрерге чарадылбинча. Хакасия пазы орынҷыларына паза финанстар министріне турғысхан кізіні ӱс ай аразына республика парламентінің ӱзӱриине сығарарға кирек. Амды финанстар министріне кізіні турғызарына ідӧк федеральнай министерство чарадиин пирче.
ДЕПУТАТТАРНЫ ХЫСХЫ САҒЫССЫРАТЧА
Мыннаң пасха, парламентте «правительство чазы» ирткен. Хакасияның пӱдіріг паза ЖКХ министрі Сергей Новиков хысхызына тимненіс хайди парчатханын искірген. Аның искіриинде улуғ алызығлар чоғыл. Республикада чылығ пирчең тус ӱртӱн айынын
14-ҷі кӱніндӧк пасталған. Чылығ иң пастағызын алтынзархы аймахтардағы поселок-аалларға пирілген. Предприятиелерге тимненіс паспорттары ӧдістер пары сылтаанда пирілбинчеттір. Ӧдістер ӧӧнінде чарытхы паза чылығ пирчеткен предприятиелер алнында осхас. Тиксі алза, республикада ЖКХ сурығларын иптир ӱчӱн, 2020 чылның бюджедінде читіре алылбинчатхан парысты айландырарына ахчаны толдыразынаң кӧр саларға кирек. Сергей Новиков бюджетті алчатса, депутаттарны анзын санға аларға хығырған. Сағам, тізең, пу тоғыс чарғы чарадиинаң пӧгілче. «Сибирьнің МРСК-зы» компанияа коммунальнай предприятиелернің ӧдізі 605 миллион салковайға чит партыр.
Паза пір сидіксініс - ЖКХ реформазын иртірері. Депутаттар законға алызығлар кирбеенде, пу киректі орнынаң тибіредерге сидік полар тіп санапча министр. Итсе, Ағбан пилтірі, Боград паза Алтай аймахтары муниципалитеттің казеннай учреждениелерін тӧстирінҷе ӧткін тоғынча осхастар.
- Хысхыны амыр ирте халарбыс па? - сурған Владимир Штыгашев министрдең.
- Улуғ саайлар полбас тіп сағынчам, - нандырған Сергей Николаевич.
Итсе, мында хайди ізестіг нандырығ пиріп аларзың? Халғанҷы чылларда чылығ паза суғ пирчең сетьтерге кӧп ахча позыдылбаан. Халғанҷы сыныхтағлар хоостыра, сетьтернің чарымы 60%-ке иргі. Харатас городха чылығ пирерін СГК позына алып алғаны ідӧк пастыхтарның на нимес, депутаттарның даа кӧңнін кӧдірче. Че аннаң пасха, чылығ пирері Тӧӧ пазында, Бородинода, Тойымда алынча хайығда тудылча. Чуртағҷыларның чылығ пирерінҷе сурығлар паза айланыстар полза, министерствода «ізіг линия» тоғынча, андар пу телефонча сығдырадарға чарир: 8 (3902) 2210-75.
- Ирина Ивановна, чыл тоозылғанӌа чахсы тоғыныбызарға киректелче, - айланған Владимир Штыгашев. - Ӧдістерні айландырарына ӱс миллиардча салковай киректелче! Хада-пірге тоғынзабыс, узы-пазына сығарбыс.
Чыылығны тоозып, парламент кнезінің орынҷызы Юрий Шпигальских депутаттарны хузух ағазын одыртарында ӧткін аралазарға хығырған. Пу чағында Хакасияның Ӧӧркі Чӧбі хузух ағазының хорбыларын Таштып аймаанда одыртарға пӧгінче.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
31 | 1 | 2 | 3 | 4 | 5 | 6 |
7 | 8 | 9 | 10 | 11 | 12 | 13 |
14 | 15 | 16 | 17 | 18 | 19 | 20 |
21 | 22 | 23 | 24 | 25 | 26 | 27 |
28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде