ПӰДІРІГДЕГІЛЕРНІҢ КИРЕКСІНІЗІНЕҢ ТУЗАЛАНЧА
14.05.2021
Хабарлар
«ХакСтройЭКСПО-2021» кӧзідіг. Киҷее, 13 майда, республиканың музей-культура кінінде «ХакСтройЭКСПО» регионнар аразындағы кӧзідіг-форум тоғызын пастаан
Музей-культура кінінде мероприятие иртчеткеннеңер, аның тастында хайыныс парчатханы киречілеен. Кӧзідіг кіннің сол саринда иртче, машиналар турғысчаң ачыхтың чардығында нинӌе-де пӱдіріг киреенең паза ӧнетін техника садиинаң айғасчатхан компания кӧзідіг иртірген. Ізік алнында ағас, тимір паза наа технологиялығ одырчыхтар турғызылған, халғанӌызы иирде чарыпча паза wi-fi пастыра Интернет пирче. Чарытхы фонарьы пазында кӱннең чарытхы сығарчатхан ікі чарды турғызылтыр, аннаң ӧӧр, тізең, чил кӱзінең чарытхы пирчеткен ибірілчеткен ниме-ноо. Тоғыра бассейнні турғызарға полысчатхан компания позынаң таныстырчатхан. Аймах ӧңніг кірпистерге хубулған кізілер кӧрігӌілерні ибіргеннер, музей-культура кінінің істінзер хығырғаннар.
«ХакСтройЭКСПО» кӧзідіг-форумда пӱдірігдегі халғанӌы технологиялар сығарылған. Че ӧӧнінде оларны кӧп квартиралығ паза алынӌа туралар пӱдіриинде тузаланылчатхан технологияларға чарарға чарир. Алынӌа тура пӱдірии нименең пасталча? Чох, фундаменттең нимес... Тура проектінең! Аннаңар алынӌа тура пӱдіриинде пӱдіріг полызығлары нинӌе-де кӧстеге чарылчалар: тура проекттерін тимнепчеткен, тураны пӱкӱлеезінең турғысчатхан, суғ-чарытхы, чылығ тартчатхан, оларның тоғызын «Хыйға тура», «Истіг тура» системалар пастыра иптепчеткен паза даа пасхазы. Сизінгенде, кӧбізі наа технологиялар пасха хан чиріндегі компанияларның сағыстары, мында оларны дилерлер таратчалар.
13 майда пӱдіріг кӧзідіг-форум азылған. Аны пайрамни азарында араласханнар Хакасия пазының орынӌызы Ирина Войнова, ол республика пазы Москвазар тоғыс чорығынаң парыбысхан тусха аның тоғызын толдырған, Хакасияның Ӧӧркі Чӧп кнезі Владимир Штыгашев, пӱдіріг паза ЖКХ _министрі Валерий Келин, Ӧӧркі Чӧптің экономика политиказынӌа, промышленностьча, пӱдірігӌе паза транспортча комитет кнезі Василий Шулбаев паза «Хакасияның садығ-промышленность палатазы» пірігістің кнезі Владимир Сорокин.
- Кӧзідіг 14-ӌі хати иртчеткені ол пӱдіріг компанияларына киректелчеткенін киречілепче, - таныхтаан Ирина Ивановна. - «ХакСтройЭКС-ПО» - ол орын, хайда пӱдіріг киреенең палғалыстығ улус позына туза таапча: наа технологияларны, палғалыстарны паза арғыстарны. Араласчыларның ӧӧн чардығы - Хакасияда тоғынчатхан компаниялар. Итсе, пасха даа хонӌых регионнардаң араласчылар пар. Ізенчем, прайзының тоғызы тӱзімніг парар.
Ирина Ивановна ідӧк пӱдіріг кӧзідиин иртірчеткен Хакасияның пӱдіріг паза ЖКХ министерствозына, «Хакасияның садығ-промышленность палатазы» пірігіске паза «Сиб-Инфо ЭКСПО» кӧзідіг компаниязына алғызын читірген. Хакасияның пӱдіріг киреене тееліп, республика пазының орынӌызы поғдархаӌан хабарларға теелген. Оларның пірсі - Алтай аймаанда тоғынып пастапчатхан кірпис заводы. Ол чылда 50 миллион кірпис сығар полар. Мыннаң мындар Хакасияда ідӧк цемент заводы азылары кӧрілче. Пӧгін - пӱдіріге киректелчеткен ӧӧн ниме-нооны республикадох сығар турарға.
«ХакСтройЭКСПО» араласчыларын удурлап, Владимир Штыгашев пӱӱнгі пӱдіріг киреендегі читпестерге хайығ айландырған. Оларның пірсі - аалларда алынӌа тураларның пӱдірілчеткен сині, ікінӌізі - пӱдіріге киректелчеткен ниме-нооның чардығы Хыдатта сығарылчатханы.
- Позығны Хыдаттаң садызып алчабыс, чил кӧмес ле сапса, тура хырлары азырылча! - теен парламент кнезі. - Кем пӱӱнгі кӱнде позығларны сығар полар? Ол тоғыснаң айғасчаң пірігістерні табарға чарир. Кірпис заводы пӱдірілгені чахсы, че ағаа хоза ам даа 3-4 завод киректелче! Оңдайлар, кирек ниме-ноо прай пар.
Араласчыларны удурлаан соонаң пастыхтар кӧзідігнең чағын танысханнар. Олар кӧзідіге сығарылған ниме-нооны кӧрглееннер, сурығлар пиргеннер. «Хак-СтройЭКСПО» кӧзідіг пӱӱн-таңда 10.00 - 19.00 частарда тоғызын узаратча.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
30 | 31 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 1 | 2 | 3 |
Кӱн таңмазы
Хакасияда
Россияда
Тилекейде