ЧӦПТЕЗІГЛЕРДЕ ХОЛ САЛЫЛАР
04.06.2021
Хабарлар
ПМЭФ-2021. 2 - 5 июньда Санкт-Петербургта чоннар аразындағы экономика форумы тоғынча. Аның тоғызында Хакасияның делегациязы Валентин Коноваловтың устаанынаң араласча
2 июньда Петербургтағы чоннар аразындағы экономика форумы тоғызын пастаан. Ол неделя тоозылғанҷа иртер. Форум тоғызында Хакасия делегациязы Валентин Коноваловтың устаанынаң араласча. Аннаңар Хакасияның экономика тилізі министерствозының социальнай сетьтердегі страницаларында искірілче.
Форумда хай пірее пічіктерде хол салары кӧрілче. Оларның пірсі «Сибирьдегі чӧптезіг» регионнар аразындағы ассоциация араласчыларының «Сибирь істіндегі паза килчеткеннерге туризмні тилідері» МАСС-тың тиксі инвестиция проектін чуртасха кирерінҷе хада пірге тоғынардаңар чӧптезии. Сибирьдегі 10 регион киҷее анда хол салыбысхан. Пу чӧптезіг хоостыра Хакасия чыл ибіре тоғынар «Поднебесье» турист кінін тӧстирге, «Шира кӧл» курорт» санаторий-курорт комплексін алыстырарына инвестицияларны позыдарға, турист полызығларын чахсыландырарға паза регион аалҷыларына оларнаң тузалан полар оңдайларны тӧстирге пӧгінче.
Аннаң пасха, республикада экология туризміне хайығ айландырылча. Іди регионнар аразында (Хызылчар крайы, Хакасия паза Тыва) «Заповедное сердце Юга Сибири» чолны чуртасха кирері кӧрілче. Аның узуны 1500 километр, ол чылығ тусха, май - сентябрь айларға, кӧрілче. Тиксі чолға 14 кӱн парыбыс турар. Ол тусха туристтер чир-чайаан хайраллаҷаң пис орында пол килерлер: «Хакасский», «Сойан-Сус», «Столбы» заповедниктерде, «Сустағы арығ» национальнай паркта паза «Ырғах тағлар» чир-чайаан паркында.
Паза пір чӧптезіг туризмні тилідеріне теелче. Анда Хакасия правительствозы “Эра Групп” АО-наң хада хол салар. Чӧптезігнің пӧгіні туризм кӧстеен тилідерге паза регионзар туристтерні тартарға чахсы оңдайлар тӧстирі полча.
Аннаң пасха, республика правительствозы Россияның МИД МГИМО-зынаң хада-пірге тоғынардаңар чӧптезігде хол саларға пӧгінче. Ол науканы тилідеріне паза пӧзік квалификациялығ специалисттерні тимниріне кӧстелген.
Регион правительствозы экологияны чахсыландырарынҷа тӧреміл тоғынча. Аны хоостыра “Арығ кии” федеральнай проектті чуртасха кирерінҷе Росприроднадзорның паза МАСС-ха кірчеткен Сибирь регионнары пастарының аразында хада-пірге тоғынардаңар меморандумда хол салылар. Пу пічікте хол салғаны киині чахсыландырарынха проектке Хакасияның город-аалларын кирерге, ол тоғысты иптирге, кӱстеністі орта тоғындырарға полызар.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
30 | 31 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 1 | 2 | 3 |
Кӱн таңмазы
Хакасияда
Россияда
Тилекейде