СЫНЫХТАҒӋЫЛАР ЧУҒЫНҶАХНАҢ КӰРЕЗЕРГЕ ПОЛЫСЧАЛАР
25.08.2021
Хабарлар
Сыныхтағлар. Тиксі республикада коронавирус чуғынӌах ағырығнаң ағырчатханнарның саны пӧзік синде тудылчатханда, чуртағҷыларға санитар-эпидемиология кирексіністеріне ам даа тудынарға киректелче
Хакасияның чуртағҷылары ол кирексіністерге хайди тудынчатханнарын мобильнай группалар сыбыра сыныхтапчалар. Регионда тиксі 345 мобильнай группа тӧстелген. Олар чон кӧп чыылысчатхан, чӧрчеткен орыннарда санитар-эпидемиология кирексіністері толдырылчатханын сыныхтапчалар. Хакасияның юстиция паза хорғыс чох киректер, министерствозы садығ тураларын, столовай-кафелерні, сас иптеҷең паза сілігленҷең салоннарны хайығда тутчалар. Министерствоның ӧӧн эксперті Сергей Топоев садығ тураларын паза чон кӧп чыылысчатхан орыннарны сыныхтаҷаң мобильнай группалар тӧстепче.
- Чыл пасталғаннаң 8770 объект сыныхталған, 104 сайбағ хоостыра административнай протокол тимнелген. Ол протоколлар Хакасия правительствозы сағыбаан саай режимі кирілген туста санитар-эпидемиология кирексіністерін толдырбинчатханнарны хатығлир ӱчӱн пазылча, - чарытхан Сергей Топоев.
Ирткен неделяда Хакасияның аал хонии паза ас-тамах министерствозының ӧӧн специализі Валерий Кызылчаков паза республиканың экономика тилізі министерствозының ӧӧн специализі Юлия Туголукова сыныхтағ рейдінең чӧргеннер. Хакасия правительствозы чарадиинаң мобильнай группаның кізілері административнай право сайбааннаңар протоколлар тимнир праволығлар.
- Административнай правоны сайбапчатханнарға саналча чуртатңы, хайзы кӧп чон аразында маска киспин чӧрче, 1,5 метр дистанцияа тудынминча паза даа пасха санитар-эпидемиология кирексіністеріне тудынминча. Кӧзідімге, садығҷы маска чох кізее пірее ниме садыбысса, ағаа протокол пазылча. Мобильнай группа сайбағ иділгеннеңер пічіктерні тимнепче, анда хайдағ сайбағ иділгеннеңер чарытчалар. Ол пічіктерні мировой чарғызар ысчалар. Анда кізіні хатығлирдаңар алай сизіндіріг идердеңер чарадығ алылча, - чарытхан Сергей Николаевич.
Кӱннің оларның ведомствозынаң пір алай ікі ӧме сыныхтағлар иртірче. Ідӧк мобильнай бригадалар республиканың аймах-городтардағы садығ тураларын, кафелерін сыныхтирға чорыхха чӧр килчелер. Ирткен неделяда сыныхтағ Пушкиннің, Щетинкиннің, Маршал Жуковтың, Крыловтың паза Тарас Шевченконың орамаларындағы садығ тураларында, кафелерде, сілігленңең салоннарда паза даа пасха чон кӧп чыылчатхан орыннарда сыныхтағлар иртіргеннер.
Сыныхтағҷылар ӧӧнінде садығ тураларында полғаннар. Пушкиннің орамазындағы «Командор» садығ туразынзар кіргендӧк, холға дезинфекция итчең суғлар паза пір хатап кисчең маскалар стол ӱстӱнде чатчатханын сизінгебіс. Садығҷылар маска кис салып тоғынғаннар. Сыныхтағҷылар, супер-маркеттің устағ-пастаан хығырып, журналлар кӧзідерге сурынғаннар. Тоғынҷылар киректелчеткен арачыланыс оңдайларына тудынчалар паза журналларны, прай киректелчеткен пічіктерні пасчаттырлар. Сыныхтағ соонаң Юлия Туголукова хайдағ оңдайнаң сыныхтағ ирт парғанын чарытхан.
- Садығ туразында санитар-эпидемиология кирексіністерін толдырчалар. Кірчетсе, холға дезинфекция итчең суғлар паза маскалар тимнелік, олар кӧріндіре чатчалар. Полда дистанцияа тудынңаң танығлар сиил парғаннар. Тоғынҷыларның ит ізиин сыныхтапчатханнаңар журналлары пар. Полларны, кізілер хаап чӧрчеғкен корзиналарны, ізіктернің тудынҷахтарын паза даа пасха нимелерні чуупчатханнаңар журналлары ідӧк апарылча. Пу садығ туразында протокол алай сизіндіріг киректелбинче, - теен Юлия Туголукова.
Хайди таныхтааннар сыныхтағҷылар, улуғ садығ тураларында кирексіністерні удаа толдырчалар, че кічіг магазиннерде, кафелерде паза чонға полызығ пирҷең орыннарда сайбағлар тоғасча.
- Піс сағыбаан саай режимінде илееде тус тоғын парирбыс. Аннаңар режимге тудынчатханнаңар прай пічіктер апарылча. Тоғынҷылар мындағ оңдайнаң тоғынарын чахсы оңарчалар, полған на тоғынҷы инструкциянаң таныс. Сайбағлар чох тоғынарға кӱстенчебіс. Нинҷе тоғын парирбын, пістің садығ туразына сизіндіріг иділбеен, - чоохтаан садығ туразының директоры Марина Свобода.
Мындағ сыныхтағ соонаң республиканың аал хонии паза ас-тамах министерствозының ӧӧн специализі Валерий Кызылчаков салтарлардаңар хысхаҷахти искірген:
- Піс 24 объектте сыныхтағнаң пол килгебіс. Ікі сайбағ ілезіне сығысхан, оларға сизіндіріг пазылған. Сайбағлар улуғ полбаан, аннаңар административнай нандырыға тартардаңар протоколларны паспаабыс. Кӧзідімге, масканы читіре киспин салғаннар алай полдағы дистанцияа тудынардаңар танығлар чызыл парғаннар, холға дезинфекция итчең суғлар тоозыл парған. Пазағы сыныхтағ иртірҷең ӧме, сизіндіріг иткен чирлерзер хайди даа кіріп, сыныхтабызар. Сайбағлар хатабох ілезіне сығысса, административнай нандырыға тартардаңар протокол тимнелер.
Хайди таныхтааннар сыныхтағҷылар, рейдтер иртірчеткені коронавирус чуғынҷах ағырығ тарапчатханынаң тоғыр кӱрезеріне хабасча. Сыныхтағлар туза ағылча. Пастағы туста сайбағлар удаа тоғасчаң, амды кізілер санитар-эпидемиология кирексіністеріне тудынчатханын сизінерге чарир. Административнай нандырыға тартардаңар протоколларны, полномочиеліг кізілер пазып, мировой чарғаа пирчелер. Сайбағҷыларны хайдағ нандырыға тартарын чарғы паалапча. Оларға сизіндіріг иділер алай 5000 - 10000 салковай штраф салылар. Хайди таныхтааннар министерстволарның специалисттері, чуртағҷылар ӧӧнінде сизіндіріглерге нандырығлығ хайчалар, че хылыхтанчатханнар тоғасчаларох.
Автор :
Наталья ТЮКПЕЕВА
Пн | Вт | Ср | Чт | Пт | Сб | Вс |
30 | 31 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 1 | 2 | 3 |
Кӱн таңмазы
Хакасияда
Россияда
Тилекейде