КАЗАНЬЗАР ТУЗАЛЫҒ ЧОРЫХ ИҢ КИЛКІМ СПОРТ ФОРУМЫНДА
10.09.2021
Хабарлар
Тоғыс чорыгы. Хакасия пазы Валентин Коновалов пу кӱннерде Татарстанда тоғыс чорығынаң
Ӱртӱн айының 8-ҷі кӱнінде Хакасия пазы Валентин Коноваловтың устаанынаң республика делегациязы «Россия - спорт державазы» чоннар аразындағы IX спорт форумының «Спорт-2030: наа оңдайларда пик тиліссер чол» ӧӧн сессиязында араласхан.
Чыылығның ӧӧн сурии коронавирус тарапчатхан туста спортты паза спорт инфраструктуразын тилідері полыбысхан. Хазых чуртасты апарарын сабландырары, чуртас-экономика ӧзізінің ӧзені чіли, чағынғы паза ыраххы тусха Россияда спорт тилізі паза спортта наа технологияларны тузаланары ӱзӱрілген. Спорттың чир ӱстӱне пірігерге, ырыс паза чонның иптіг тилізі ӱчӱн хазналарның хада-пірге тоғынарға полысчатхан кӱзі алынҷа таныхталған.
Хакасия пазы Валентин Коновалов пасха регион устағҷыларынаң, федеральнай ведомство паза спорт пірігістері кізілерінең тоғазығлар иртірген. Ідӧк ол аалларда физическай культура паза спорт тилізіне чарыдылған «тегілек стол» тоғызында араласхан.
Республика пазы форум кӧзідиинде спорт тиріглері паза ниме-ноозы сығарызында, спорт пӱдіріглерінің проектінде паза пӱдіриинде, спорт кип-азаа паза ӧдік тимнирінде тузаланылчатхан амғы технологияларны кӧріп алған. Форумда амғы спорт орыннары тоғынған, аймах спорт кӧрімнерінҷе атлеттер кӧзідии ирткен. Прай наа нимелер паза пасха регионнарның опыды республикада спорт инфраструктуразын тилідерінде, физическай культуранаң паза спортнаң айғазарға оңдайлар тӧстирінде тузаланысха алылар.
ХАДА СПОРТТЫ ТИЛІДЕРЛЕР
Хакасия паза Россияның спорт министерствозы хада-пірге тоғынарлар. Аннаңар чӧптезігде ӱртӱн айының 8-ҷі кӱнінде Казаньда ирткен «Россия - спорт державазы» чоннар аразындағы спорт форумында хол салылған. Чӧптезігде хол салғаннар Россияның спорт министрі Олег Матыцин паза Хакасия пазы Валентин Коновалов. Аның пӧгіні - регионда физическай культуранаң паза спортнаң тӧреміл айғасчаң, аймах синдегі спорт марығларын иртірҷең, спорт араласчыларын паза тоғынҷыларын тимнеҷен оңдайлар тӧстирінҷе хада-пірге тоғынары.
Пістің республика «Демография» нацпроекттің «Спорт - чуртас сині» федеральнай проектін чуртасха кирерінде аралазарын узаратча. Регионда спорт тилізіне алынҷа хайығ айландырылча. Чағынғы чылларда федеральнай, республика паза орындағы бюджеттернің ахчазына Хакасияда спорт пӱдіріглерін тӧстирі паза алыстырары, оларның ниме-ноозын паза техниказын нааҷылиры, аймахтарда ГТО орыннарын турғызары, спорт пірігістеріне хабазары кӧрілче. Ӧӧн пӧгін - прайзына физическай культуранаң паза спортнаң айғазар оңдайларны тӧстирі.
Киҷее Хакасия делегациязы Казаньда тоғызын узаратхан. Хакасия пазы Татарстанның инвестиция тилізі агентствозында паза Казаньдағы пӧзік технологияларның IT-паркында пол килген. Валентин Коновалов ідӧк Арскай сыыратта чыылған хакас ученай Николай Фёдорович Катановтың сӧӧгінде пол килерге пӧгінче.
Валентин Коновалов Хакасиязар пӱӱн айланар. Аның тоғыс чорығы тузында республика пазының тоғызын орынҷызы Ольга Понамарёва толдырған.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
30 | 31 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 1 | 2 | 3 |
Кӱн таңмазы
Хакасияда
Россияда
Тилекейде