«ОМИКРОН» ЧОЧЫНЫС АҒЫЛЧА
20.01.2022
Хабарлар
Штаб чыылии. Хакасияда коронавирустаң имненчеткеннернің саны халғанчы кӱннерде ӧс сыххан. Аннаңар чоохталған республика правительствозындағы коронавирустаң тоғыр кӱрезерінче оперативнай штабтың теестегі чыылиинда
Республикада ирткен суткада коронавирусты 112 кізі чухтырып алған, оларның 42-зі «ковид» пӧліктерінзер имненерге чатырылған. Стационарда 52 кізі хазыхтанып алған. Ағырчатханнарнаң пір чирде полып, 2858 чуртағҷы имҷілер хайиинда тудылча. Ибде имненчеткеннернің саны - 986 кізі.
Хакасияның хазых хайраллаҷаң министерствозының танығларынаң, ковидтең ибде имненчеткеннернің саны халғанҷы кӱннерде ӧс сыхты. Ідӧк пу чуғынчахнаң аар ағырчатхан пациенттер саны хозылча, алындағы кӱнде 5 кізее кӧп пол партыр. Оларны ИВЛ аппарат полызиинаң имнепчелер, кичее андағларның саны 35 кізі полған. Кислород полызиинаң 153 кізіні имнепчелер. Сағам кислород суткада ортымахти 3-че тонна хорадылча. Республикада кислород читкіче полтыр, ол пеер тӧреміл читірілче.
Министерство, республикада коронавирустың наа штаммы сығысчатханда (ол ӱс кізіде табылған), сынап ол тарап сыхса, орғаннар санын ноо даа туста алғыдыбызарына тимде. Пу кӱнде «ковид» пӧліктерінде орғаннар саны - 556. Оларның 183-зі (33 %) пос турча. Кислород 502 орғанда пар, оларның 319-зында кізілерні имнепчелер, 36 %-і - пос турчатхан орғаннар.
Коронавирустаң тоғыр вакцинация аннаң андар иртірілче. Ирткен суткада вакцинаның пастағы чардығын турғыстырып алғаннарның тиксі саны 268 666 кізее тиңнелген, ікінҷізін - 194898. Ревакцинацияны иртібіскеннернің саны - 45542 кізі. Планны толдырыбызар ӱчӱн, имҷілерге февральға теере 71 муң чуртағчаа ревакцинация идерге кирек. Коронавирустаң тоғыр вакцинация планы сағам 68,7 %-ке толдырыл партыр. 60 час ас парған улустың 81 %-і пу вакцинаны турғыстырып алтыр, тойлығ чӧрчеткен ипчілернің - 100 %-і.
Чыылығда спорт мероприятиелері иртірілчетсе, санитар-эпидемиология правилолары хайди толдырылчатханнаңар чоохталған. Ідӧк - ас-тамах садиинаң айғасчатхан садығ сетьтерінде андағ тоғыс хайди апарылчатханнаңар. Мындағ чӧп пирілген: садығ тураларынзар кізілерні оларның QR-код пар полза кирерге паза анда ит ізиин сыныхтап турарға. Че іди тудынза, оларда теес улуғ пол сығар тіп тоғыр кӧрісті садығнаң айғасчатхан идінчектер читірчеттірлер. Ағбанның устағ-пастааның кӧрізінең, садығ тураларынзар маска киспеен не кізілерні позыдарға чарабас, хоза хатығластар, тізең, садығ апарарға харығ полар. Садығ киреенең айғасчатханнар паза чонны азырапчатхан улус таа амғы туста клиенттер саны асхынах пол сыхты, аннаңар садығ уйан парча тіп хомзынчаттырлар.
Паза чыылығда кӧп хадыллығ туралардағы подъездтерде дезинфекция хайди иртірілчеткеннеңер, пассажирлерні тартчатхан транспортта сыныхтағлар хайди апарылчатханнаңар сан пиріс иділген. Чуртағҷылар транспортта даа маскалығ чӧрерге киректер тіп чоохталған. Сан пирістер ол-пу сферада санитар-эпидемиология правилолары хайди толдырылчатханын ілезіне сығарар пӧгіннең иділчелер. Анзы тиктең не нимес: республикада «Омикрон» наа штамм ілезіне сығарылғанда, ам ол тарап сығарынаң улуғ чочыныс ағылча.
Хакасия пазы Валентин Коновалов штабтың пазағы чыылиина, 25 январьға, эпидемиология саринаң сидік пол сығарынаң палғалыстығ мобилизация планын тимнебізерге чахаан. Республиканың хазых хайраллаҷаң министерствозына хоза 48 млн салковай позыдарға. Ол ахча регион правительствозының резерв чыындызынаң пирілер. Ідӧк хоза 2 млн. салковайны - ӱгретчілернің паза ӱгренчілернің аразында тесттер иртіреріне. Региондағы улуғ аптекаларда имнер хоза кӧр саларға. Ибде имненчеткеннернің хазиин сыныхтағда тудар ӱчӱн, оларнаң сурастырығ иртірчең листті тимнеп саларға.
Эпидемиология саринаң кирек хомай пар сыхса, запастағы медсестраларны тоғысха тартарға. Оларның алынча списогын военкомат тоғынчыларынаң пірге тимнирге.
Имчілерге полысчатхан волонтерларнаң пірге тоғынарынча план-схеманы тимнеп саларға. Муниципальнай пӱдістерде постарының колл-кінін азарына алынча орын тимнирге. Колл-кіннерде, тізең, хоза телефон линияларын кӧр саларға кирек полар. Ідӧк пу кіннерде роботтар полызиинаң тоғынар оңдайлар тӧстирге. Резервтегі транспорт списогын тимнирге чахығ пирілген. Ағаа хоза водительлер списогы пар поларға кирек. Сынап ибде имненчеткеннер кӧптең кӧп ле пол сыхса, имнег киреендегілерге ол транспорт киректел сығар.
Ідӧк республика правительствозының 102-ҷі чарадиинзар алызығлар кирерге пӧгінчелер. Оларны тимнеп саларға чахылған. Ол алызығлар вакцинацияны хазии хоостыра иртпинчеткен кізілерні ибдең сығара тоғындырарына теелче.
Чуртағҷыларға хазна полызығларын пирчеткен учреждениелерзер, амды азынада пазын салза ла, айланарға чарадыл сығар. Хай пірее алынча социальнай учреждениелерзер, тізең, кізілерні кирбин сығарлар. Кӧзідімге, олған тураларынзар, психоневрология диспансерлерінзер. Валентин Коновалов кізілер санитарнай правилоларға прай чирде тудынарға киректер, аннаңар пу тоғысты аннаң андар хайди даа тыыдарға кирек тіп таныхтаан.
Чоохтирға кирек, Хакасияда пу кӱнде коронавирустың «Омикрон» наа штаммы ӱс кізіде ле ілезіне сығарылған. Оларнаң пір чирде полған 72 кізіні, Роспотребнадзорның тоғынҷылары ідӧк ілезіне сығарған соонаң, амды имҷілер хайығда тутчалар. Наа штаммны чухтырып алғаннарның ікізі алында коронавирустаң тоғыр вакцинация ирткен полтыр, ӱзінҷізі - ковиднең ағырған кізі. Республиканың ӧӧн санитарнай имчізінің чооғынаң, наа штамм кӧп кізее пір саңай чухчатханынаң чочыныстығ. Кӧзідімге, пір кізі тоғыста пір кӱнде ле хада тоғынчатхан 12 арғызына чухтыр салтыр. Ковидтең тоғыр вакцинация - кізі хазиин паза істеніс ӧмезін хайраллап халары.
Автор :
Инора БОРГОЯКОВА
Пн | Вт | Ср | Чт | Пт | Сб | Вс |
29 | 30 | 31 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 30 | 1 | 2 |
Кӱн таңмазы
Хакасияда
Россияда
Тилекейде