ӰРЕГЕ КІРГЕННЕРГЕ ПОЛЫЗЫҒ ТАБЫРАХ ПИРІЛЕР
27.06.2017
Хабарлар
Республиканың правительство туразында Хакасияның сағыбаан саайларҷа (ЧС) комиссиязының чыылии ирткен. Аның тоғызын апарған Хакасия пазы орынҷызының тоғызын толдырчатхан, комиссияның кнезі Владимир Крафт.
Чыылығның ӱзӱриине ӱс сурығ сығарылған: республикада мӱндур чаап парыбысханда, анда ӱреге кіргеннерге полызығ пирердеңер; ӧрттердең тоғыр режим хайди толдырылчатханын сыныхтағда тудардаңар; суға сомҷаң орыннар хайди тимнелгеннеңер. Чыылығда аймахтардағы сағыбаан саайларҷа комиссиялар устағҷыларынаң палғалыс видео пастыра тудылған.
Хазыр чил полғанда паза килкім мӱндӱр чаап парыбысханда, Алтай, Пии, Ағбан пилтірі паза Шира аймахтары хыйалға кіргеннер. Шира аймаанда нымырха синінҷе мӱндӱр тура хырларын, Пілӧ кӧлзер тынанарға килгеннернің автомобильлері ӱстӱн, сӱлейкелерін оотхан. Хыйалға кіргеннерге хайдағ полызығ мероприятиелері апарылчатханнаңар Шира аймааның пазы Сергей Зайцев искірген.
Ағбанда хазыр чилде кізілерні хазыхтандырҷаң физкультура диспансерінің хыры сайбал партыр. Аны тыхтир тоғыстар хайди толдырылчатханнаңар Хакасияның хазых хайраллаҷаң министрінің орынҷызының тоғызын толдырчатхан Дмитрий Чепрасов чоохтаан.
Аршаннар аалында тӧрт тура хыры сайбалтыр паза аалда автобус тохтаҷаң орындағы павильон тӱңдеріл партыр. Алтай аймаандағы ЧС пӧлиинің пастығы Андрей Кучешевтің чооғынаң, сайбалған пӱдіріглерні тыхтирға хара тас аныпчатхан «Аршаннар разрезі» компания хабасча.
Пии, Ағбан пилтірі аймахтарында тың улуғ ӱреге кірбееннер, анда полған киректерні пос кӱзінең тӱзетчелер, иптепчелер.
Ікінҷі сурығҷа, арығларда сыхчатхан ӧрттердеңер чоох тутхан Хакасияның чир-чайаан ис-пайы паза экология министрінің орынҷызы Зиновий Юськив. Аның чооғынаң, Таштып паза Асхыс аймахтарындағы арығларда, кӱгӱрттер тузында сағын саап, ӧрттер сых парча. Зиновий Юськив пу аймахтарда тоғынчатхан лесничество тоғынҷыларын паза ӧрт ӱзірҷеңнерні махтапча. Олар, ӧрттер сыхса, оларны тарадарға пирбин, табырах ӧрттерні ӱзірчелер.
Владимир Крафт пӱӱл суға сомар тус хомзыныстығ киректердең пастапғанын таныхтаан. Пис кізі, ол санда пір пала суға саайланған. Суға сомҷаң орыннарзар гидроцикллерні позытпазына ол хайығ айландырған. Ідӧк Владимир Александрович тынағ кӱннерінде школа тоосханнарның пайрамына, Чииттер кӱнін иптіг иртірібізеріне хайығ салған. Ӱреге кірген страхованиеліг кізілерге кирек пічіктерні табырах тимнеп пирерге чахығлар пирген.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
25 | 26 | 27 | 28 | 29 | 30 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 31 | 1 | 2 | 3 | 4 | 5 |
Кӱн таңмазы