ХАЙРАЛЛАҶАҢ ОРЫН ПОЛ ПАРАР
05.09.2017
Хабарлар
Кӧнi палғалыс тузында, 21 июльда, Хакасияның пазы Виктор Зиминге «Бородинодағы» хуюдаңар паза аның хыриндағы чирлердеңер сурығ пирілген. Хакасияның чуртағҷызы пурунғыдаң хайраллал халған тархын хумартхызын паза аның хыриндағы орынны арығ тудардаңар сағыссырапчатхан.
Кӧні палғалыс соонаң пу сурығны пӧгерге Боград аймаа администрациязының культура, чииттер паза туризм управлениезі чапсыныбысхан. Аның танығларынаң, 2019 чылда «Бородинодағы» хуюның хыриндағы чир «аал хонии тузаланчатхан чир» категориядаң «ӧнетін хайраллалчатхан чирлер паза пӱдіріглер» категорияа кір парар. Анзы Боград аймааның бюджедінзер тархын хумартхызын хайраллирына, ибіркі чирні арығ тударына хорадылар ахчаны киріп алар оңдай пирер.
Амғы туста анда волонтерлар тоғынчалар, туристтер постарының соонда артысхан сӧп-сапты арығлапчалар, чут кӱннер тузында ӧс парған отты чох итчелер. Ағаа хоза, чииттер пай инвесторны таап аларға сағынчалар, хайзы спелеологтарға киректелчеткен кип-азахтар ал пирерҷік паза хуюда суулабас лазер шоузын иртірерге полыс турарҷых.
Таныхтирға кирек, «Бородинодағы» хуюны тархын хумартхызына санапчалар, хайзы федеральнай синде санға алыл парған. Ол пістің регионда иң улуғ хуюларның пірсіне саналча, Ағбаннаң 70 км оортах турча. Пастап ағаа 1969 чылда орта пол парғаннар. Сах андох ол туристтернің паза учёнайларның хайиин тартхан. Анда иң пастағызын, Сибирьдегі прай хуюларны санға ал килзе, сур табылған. Андар кірері, істінде пас чӧрері уғаа оой. Аннаңар туристтер ағыны ӱзілбинібіскен. Хуюдағы прай чолларның узуны 1800 метрге чит парча, тағ істінзер 86 метр тирең кірерге чарир. Аның істінҷе парчатса, андар-мындар тарапчатхан чолларға орта полчалар, че олар прайзы туюхтар. Пеер кірерге, ӧӧн чолҷа чӧрерге ӧнетін кип-азах киректелбинче. Хада фонарь, каска, мелей паза пик ӧдік алып аларға чарир.
Автор :
Хакасия пазының администрациязы
Пн | Вт | Ср | Чт | Пт | Сб | Вс |
25 | 26 | 27 | 28 | 29 | 30 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 31 | 1 | 2 | 3 | 4 | 5 |
Кӱн таңмазы