2020 ЧЫЛДАҢ СЫҒАРА ИДІНӋЕКТЕРГЕ НАЛОГ СИНІ - 7,5%
09.08.2019
Хабарлар
Тоғазығның ӧӧн пӧгіні - Хакасияда пос кирее тилізін айныдар ӱчӱн, идінҷектернің сағыссырастарынаң, сидіксіністерінең танызары. Чоохтирға кирек, республика ӱлгӱлері пос киреенең айғасчатханнарнаң пастағызын на тоғаспинчалар. Аның алнында Хакасия пазы Валентин Коновалов оларнаң чоох алысхан. Андада тоғазығ республиканың наа устағҷыларынаң танысхан оңдайнаң ирткен. Пу тоғазығда, тізең, министрлер 2020 чылда ӱс наа закон чуртасха кирерге тимнелчеткенін искіргеннер паза хазна хабазығларын чарыт пиргеннер.
- Пос киреенең айғасчатханнар республика экономиказын тилідеріне чахсы хозым итчелер. Хакасия бюджедінзер, чыл сай аймах налогтар тӧлеп, олар 2,5 миллиард салковай кирчелер алай бюджеттің 12,5 проценты, - таныхтаан Ирина Войнова. - Пӱӱнгі кӱнде пістің алныбыста пӧгін турча: республикада пос киреенең айғасчатханнар санын хозарға. Алындағы ӱс чыл изере оларның саны хызырылған. Сылтағлар аймах-пасха, аннаңар республика ӱлгӱлері, ол санда Хакасия правительствозы, Ӧӧркі Чӧбі паза халых пірігістері, пастаанаң кічіг паза ортын пос киреене тоғынар оңдайларны чахсыландырарынҷа тоғысты апарчалар. Ізенербіс, алызығлар кӧңніңерге кірер.
Пастап Хакасияда идінҷектер праволарын арачылирынҷа уполномоченнайын хайди табарын ӱзӱргеннер. Пӱӱнгі кӱнде пу тоғысты толдырарын узаратча Василий Кудашкин, хайзы пис чыл алнындох табылған. Июньда, тізең, Хакасия пазы Валентин Коноваловтың паза республиканың тиліс чӧбінің чарадиинҷа сығарылған кандидат Александр Мяхар Ӧӧркі Чӧпте ирт полбаан. Депутаттарның кӧбізі аннаң тоғыр полыбысхан. Анзына ӧӧн сылтағ пос киреенең айғасчатханнарның сағызы санға алылбааны полған тіп салтарға килерге чарир. Наа кізіні пос киреенең айғасчатханнарның пірігістеріне сӧлир оңдай пирілче. Республикада андағ нинҷе-де ле пірігіс: Садығ-промышленность палатазы, «Деловая Россия» халых пірігізінің региондағы пӧлии, пӱдірігҷілер пірігізі, «Опора России» пірігіс пӧлии, идінҷектер паза промышленниктер пірігізі, ниме-ноо сығарчатханнарның пірігізі, Сибирьнің кресен-фермер хоныхтарының ассоциациязы паза пасхазы. Пос киреенең айғасчатханнарның таниинаң, пу пірігістер аразында Садығ-промышленность палатазы иң улуғ паза ӱр тоғын парир, аннаңар ағаа киртініс пар. Пастыхтар паза идінҷектер пір чарадыға килгеннер - пу пірігіс Хакасияда идінҷектер правозын арачылирынҷа уполномоченнайға кандидатты табарынҷа тоғысты апарар. Табылған кізі республика ӱлгӱзінзер чарадыға ызылар.
Ирина Войнованың искіриинең, 2020 чылның кӱрген айынаң пасти ӱс закон кӱзіне кірер. Сағам закон проекттерін республиканың правительствозы тимнепче. Пастағызы ниик оңдайнаң налог тӧлиріне теелче: килчеткен чылда аны хоостыра налог ставказы, 2,5 хати хызырылып, 7,5% тиңнелер. Ноға мындағ алызығларны кирче республика? Халғанҷы чылларда пос киреенең айғасчатханнарның регионнаң кӧсчеткені таныхталча. Анзын Хызылчардағы хазна статистика службазының танығлары киречілепче. Алызығлар кізілерге пос киреен пастирға паза пасха регионнардаң идінҷектерні тартарға полызарына ізенчелер ӱлгӱдегілер.
Аннаң пасха, республикада инвестиция проекттеріне хабазығдаңар, кічіг паза ортын пос киреенеңер закон проекттері тимнелче. Ідӧк пос киреенең айғасчатханнарға Кічіг паза ортын пос кирее корпорациязы пирчеткен хабазығлардаңар чоохтап пиргеннер.
Идінҷектер пастыхтарның хайиин ӧӧн сидік сурығларына айландырғаннар: региондағы чурт-коммунальнай полызиина, чарытхы паа уламох пӧзік полчатханына, коммерческай кӧстегліг тибіреділбинчеткен ис-пайға кадастр паазы саба саналғанына, банктарның кічіг паза ортын пос киреене кредиттерні пӧзік ставкалығ пирчеткеніне паза пасхазына.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
30 | 1 | 2 | 3 | 4 | 5 | 6 |
7 | 8 | 9 | 10 | 11 | 12 | 13 |
14 | 15 | 16 | 17 | 18 | 19 | 20 |
21 | 22 | 23 | 24 | 25 | 26 | 27 |
28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде