АМҒЫ ТУСХА КИЛІСТІРЕ ИМНЕГ ТИРІГЛЕРІ
25.09.2019
Хабарлар
Имнег кирее. Республиканың олған имнег туразынзар наа оборудование алылған
Наа имнег тиріглері «Олған поликлиникаларының паза имнег организацияларындағы олған поликлиникалары пӧліктерінің материально-техническай тилізі» федеральнай программам алылған. Хайди таныхтаан Хакасияның хазых хайраллааң министрі Владимир Костюш, имнег оборудованиелері ӱс чыл федеральнай программаҷа паза нацпроект хоостыра алылар. Пастағы оборудование имнег туразынзар ирткен чылда алылған. Таныхтирға кирек, наа оборудованиелернің кӧбізі иргі аппараттарны алыстырча.
Іди функциональнай диагностика пӧлиинде наа оборудование имҷілерге сыныхтағлар тоғызында наа оңдайлар хосча. Пӧліксер синхроннай видеозаписьтіг электроэнцефалограф алылған. Наа аппарат иргізінең сыныхтағ иртерге киректелчеткен пӧрігестернең пасхалалча. Иң улуғ пӧрік 18 частығларға кӧрілче, иң кічіг пӧрігес - ыңааҷахтарға, хайзылары кӧрілген тустаң ирте тӧрееннер паза кӧдірімнері 500 - 1000 грамм пасча. Диагностика пӧлиинің устағҷызы Людмила Лютенконың таниинаң, сыныхтағлар олғаннарға иргі оборудованиеде иртірілҷең, че иң кічіглерге, ыңааҷахтарға, иртірілбеҷең.
Оларға сыныхтаға Хызылчардағы имнег туразынзар чӧрерге килісчең. Амды орындағы имнег туразында идер оңдай пар.
Ідӧк УЗИ-диагностика кабинедінзер ікі УЗИ-аппарат алылған. Мындағ аппараттар имнег туразына уғаа кирек.
- Наа аппараттың тоғынчатхан оңдайы иргізінең хай-хай артых. Аның амғы тусха килістіре датчиктері УЗИ істезіглерін алғыда иртірче. Иргі аппаратта андағ сыныхтағ иртір полбаӌаңмыс. Сыныхтағ амды алғым иртірілче, уламох чахсы паза орта салтарлар кӧзітче, - чоохтаан имҷі Елена Полякова.
Рентген кабинетте ідӧк наа аппарат турғызылған, анын паазы - 16 миллион 600 муң салковай. Ол аппарат пӧзік синде рентген сомнарын итче. Тимде сомнар олох туста компьютерзер кирілче. Имҷі-рентгенолог Сергей Аверченко наа аппараттың оңдайларынаңар чоохтаан:
- Рентген сомнары электроннай базазар постары киріл парчалар, компьютерде архив тӧстелче. Имӌее рентген ирткен кізідеңер киректелчеткен танығларны табарға оой полча. Ідӧк иділген сомнар цифровой параметрде иділчелер, аннаңар, имӌі оларны істесчетсе, сомны улуғ идіп, чахсы кӧріп алҷаң оңдай пар. Иргі рентген аппаратта сомны тимнирге ӱр тус парыбысчаң, амды цифровой сомнарны істезерге хай-хай чахсы.
Харах одын сыныхтапчатхан кабинетте иргі аппараттар нааҷылалғанох. Имҷі-оф-тальмолог Юлия Фильчук наа аппараттарға ӧрінче, олар амғы тусха килістіре паза істезіг иртірерге уғаа чахсы. Хайди таныхтаан чиит специалист, иргі аппараттарнаң тоғынарға килісчең, оларнан тузаланарға чахсы ла полбаҷаң.
- «Щелевая лампа» пістің пар полған, че ол иргі аппарат. Амды наа аппаратнаң сыныхтағлар иртірерге хай-хай ниик, іди порастанминчабыс. Пневмотонометр кізінің хараандағы давлениені сыныхтирына кӧрілче паза авторефрактометр, аның полызиинаң олғаннарның ырахха кӧр полбинчатханы, ырах кӧрчеткені сыныхталча. Ол аппараттар харах ағырығларын, наа ла сығыс килзе, ілезіне сығарарға оңдай пирче.
Наа оборудование имҷілерге тоғыстарын нииктепче паза сыныхтағларны уламох орта идерге полысча.
Ідӧк республиканың олған имнег туразында «Хазых школазы» кабинет тӧстелген. Анда имҷі-аллерголог Наталья Топоева бронхиальнай астманаң ағырчатхан олғаннарнаң паза оларнын іҷе-пабаларынаң тоғазығлар иртірче. Хайди таныхтаан имҷі, Ағбанда «бронхиальнай астма» диагнозтығ 600 пала. Тоғазығларда имҷі ол ағырығдаңар паза хайди ағырығны сыныхтағда тудардаңар чарытча. Тоғазығлар неделяда пір хати иртірілче. Анда іҷе-пабаларны сағыссыратчатхан сурығларға нандырығлар пирілче.
Олған имнег туразына наа оборудованиелер алылчатханы имҷілерге дее паза чуртағҷыларға даа ӧрініс ағылча.
Пӱӱл республиканың олған имнег туразынзар нацпроектче 45 миллион салковайға наа оборудование алылған. Чыл тоозылғанӌа хоза оборудование алылар. Тиксі хорадығлар пӱӱл 50 миллион салковайға тиңнелер. Ікі чыл аразына имнег туразында тиксі тыхтағ тоғызы иділері кӧрілче, - таныхтаан Владимир Костюш.
Автор :
Наталья ТЮКПЕЕВА
Пн | Вт | Ср | Чт | Пт | Сб | Вс |
30 | 1 | 2 | 3 | 4 | 5 | 6 |
7 | 8 | 9 | 10 | 11 | 12 | 13 |
14 | 15 | 16 | 17 | 18 | 19 | 20 |
21 | 22 | 23 | 24 | 25 | 26 | 27 |
28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде