ПӦЗІК УЧУҒЫСТЫҒ «ЧАС ХАНАТ»
27.11.2019
Хабарлар
Культура. С.П.Кадышевтің адынаң культура кінінде «Час Ханат» чайаачы ӧменің 25 чылына чарыдылған концерт ирткен
Хакасия культуразының тархынында 1990 чыллар иң танығлығ полчалар. Анзы таң Хакасия республика статустығ пол парғанынаң палғалыстығ, таң Ӧӧркі чайааннардаң іди салыл парған ма. Че ол сидік тустарда культурадағылар наа тыныс алынып алған осхастар. Республикада соон сӱрістіре чайаачы ӧмелер тӧстелчелер, хынығ проекттер чуртасха кирілчелер. Кӧзідімге, 1991 чылда пастағызын на «От ыры» фестиваль иртірілген, 1993 чылда - «Хысхы саңнары» марығ. 1994 чылда «Ӱлгер» ансамбльны Кидеркі Европазар чорыхха хығырчалар. Ідӧк ол чыл музыкант паза композитор Игорь Боргояковтың кӱстенізінең «Час Ханат» олған эстрада студиязы тӧстелген.
Кӧрігілерні «Час Ханаттың» пастағыох концерттері чапсытханнар. Хакас палалар изебі чох таланттығ, ӧткін хылыхтығ полтырлар нооза. Ӱннері чи хайдағдыр! Ідӧк кізілернің кӧңніне ансамбльның сарыннары кірген. Прай даа кӧглернің авторы - «Час Ханаттың» устағҷызы. Пір чыл пазынаң кічіг ырҷыларға теелбекчілер хозылғаннар. Анзы концерт программаларын пайыдарға оңдай пирген. Игорь Фёдоровичтің устаанынаң хакас олғаннар 1994 чылдох Моол чирінзер чорыхтарнаң пар килгеннер. 1996 чылда, тізең, «Час Ханаттың» ырҷылары Турцияда «Фомгед» чоннар аразындағы олған фестивальында, аралазып, лауреат атха турысханнар. Анда-да пілдістіг пол парған: чиит ӧменің «ханаттары» час таа полза, ол пӧзік учуғар.
25 чыл аразына «Час Ханат» олған эстрада студиязы кӧп чидіге читкен. Палалар аймах-пасха синде иртчеткен марығларда, аралазып, тӧреміл лауреат атха турысчалар.
«Час Ханаттың» чайаачызынаң, Россия регионнарындағы ла нимес, хырығ озариндағы кӧрігҷілер чахсы таныстар. 2017 чылда олған эстрада студиязы «Чон чайаачызының саблығ ӧмезі» аарластығ атха турысхан, аннаң хазнабыста артыхтарның артығы ла таныхтаттырча.
Араласчылардаңар алынча чоохтирға кирек. Оларның илеедезі чайаачы чол таллап алған. Кӧзідімге, Юлия Чепашева (Тиникова) Хакас драма театрында артист полып істенче паза «Иренек хан» рок-ӧменің солизі полча. «Кӱн сузы» ансамбльның артизі, «Мисс Абахай» марығның тӧстегҷілерінің пірсі Тимур Тюкпеев «Час Ханат» студияда теелбектенерге пастаан. Кееркестіг ӱнніг Виктория Димчикова олған студиязынаң, ӱгретчілерінең амға теере палғалыс тутча. Ӱр ниместе чир-суғҷыбыс, «От ыры» марығда аралазып, позын турыстыра кӧзіткен.
Пӱӱнгі кӱнде «Час Ханат» студиязар 4-18 частығ 80 артиинаң пала чӧрче. Частары хоостыра кічіг артисттер ӱс ӧмее чарылчалар. Сарнирға хынчатханнар Хакасия культуразының саблығ тоғынҷызы Светлана Аткнинаның холында устарын таптапчалар. Теелбекчілернең хореографтар Анна Тинникованаң Анжелика Топоева тоғынчалар.
«Час Ханаттың» пайрамнығ концерті 22 ноябрьда ирткен. Кічіг артисттерні кӧріп аларға кізілер залға тығырама чыылғаннар. Чалахай иирге ӧмедегілер иң сіліг сарыннарны паза теелбектерні таллап алтырлар. Олар пайрамны «Минің мӧге чирім» вокал-хореография сюитазынаң асханнар. Аны Игорь Боргояков 2007 чылда Хакасия Россияа піріккеннең пеер 300 чылына чарыдылған мероприятиее ӧнетін турғыстыр. «Час Ханат» сарыннардаң паза теелбектердең пӱткен ойын пастыра кӧрігҷілерні чирібістің пай тархынынаң таныстырған, Хакасияда тоғысха кӱс, чалахай кӧңніліг чон чуртапча тіп кӧзіткен. Сюитаны кӧріп, кізі чӱреенде ӧрініс паза поғдархас тӧріпче. «Минің мӧге чирім» ойынға кӧӧні Игорь Боргояковнаң Игорь Окольников пастырлар, теелбектерні балетмейстер Вячеслав Донгак турғысхан.
Сюитадаң пасха олғаннар сарыннарны паза теелбектерні толдырғаннар. Мында 5 частығ Влада Чичининаны таныхтирҷыхпын. Таланттығ ырҷы, часха кічіг дее полза, аймах марығларда ӧткін араласча. Октябрьда Ағбанда «Илбек минің хазнам» чоннар аразындағы марығның региондағы чардығы ирткен. Влада анда II степеньніг лауреат атха турысхан. Ідӧк морсымнығ Владимир Мокану кӧрінген. Пис класстың ӱгренҷізі, «Ӱгӱнің сарынын» чӱрекке теерте толдырған. «Час Ханат» араласчызы Регина Тоскоракованың пӱӱл танығлығ чыл полды. ХГУ-ның искусство институдының музыка колледжінің студенті часхызын пастағы концертін иртірген.
«Час Ханат» олған эстрада студиязының пайрамнығ концерті пір тыныснаң ирткен. Кӧрігҷілер кічіг артисттерге, ӱгретчілерге паза ӧменің устағҷызы, Хакасия искусствозының саблығ деятельі Игорь Боргояковха ізіг айа сабызынаң алғыстастарын читіргеннер. «Час Ханатты» пайрамынаң алғыстирға килгеннер Хакасияның культура министрі Леонид Ерёмин паза Оӧркі Чӧптің культураҷа, ӱгредігҷе паза наукаҷа комитедінің кнезі Оксана Разварина. Аарлығ аалҷылар «Час Ханатха» пӧзік чидіглерге чидерге, кӧрігҷілерні чайаачызынаң ӧріндірерге алғааннар. Сыйыхтардаңар чоохтаза, Светлана Аткнина, тӱзімніг тоғызы ӱчӱн, Оӧркі Чӧптің алғыстас пічиине турысхан, «Час Ханаттың» араласчыларының илеедезі Хакасияның культура министерствозының алғыстас пічиинең таныхтаттырған. Ізенчебіс, кӱстіг «ханаттығ» чайаачы ӧменің учуғызы хаҷан даа пӧзік полар.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
30 | 1 | 2 | 3 | 4 | 5 | 6 |
7 | 8 | 9 | 10 | 11 | 12 | 13 |
14 | 15 | 16 | 17 | 18 | 19 | 20 |
21 | 22 | 23 | 24 | 25 | 26 | 27 |
28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде