ААЛ ХОНИИНДА ІСТЕНЕРІ - НАНДЫРЫҒЛЫҒ ТОҒЫС
20.10.2021
Хабарлар
Пос кирее. Пӱӱлгі Ӱртӱн тойы ӱлӱкӱнде хакас чонның Улуғлар чӧбі Марина Амзаракованы «Чыл кізізі» атнаң сыйыхтаан
2014 чылда Марина Амзаракова (хыс фамилиязы Костычакова) хада хонғаны Андрей Васильевичнең Хакасияның аал хонии министерствозы хоостыра грант утып алғаннар - 1,5 млн салковайға чағын. Ол ахчаа сӧбіре хойлар садызып алған, хазаа паза тоғысчыларына чурт пӱдір пирген. Постарының капиталы полғанох. Хоных Печин аалда орныхча. Ол саринда чазы алғым, Мадырда чіли тайғанаң ибірілік нимес. Оттаӌаң орын читкіӌе.
Хакас чонда кізінең танысса, кибір хоостыра хайдаң сыхханын сурчалар.
- Піс хада хонғанымнаң Аңчул аалдаңмыс. Мин 12 частаң сығара аға-уучамда ӧскем, олар ӱгретчі полып тоғынғаннар паза кӧп мал-хус тутчаңнар. Ирімнің паба-іҷезі ідӧк улуғ хоных тутчаң. Пісті улуғлар итчең ниме чох одырбасха ӱгретчеңнер: одың, суғ тазирға, маллар соонҷа кӧрерге, інек саарға паза пасха даа киректер табылчаң.
Наа ла ферма тӧстепчеткен идінҷектерге хабазығ пиріл сыхханда, піс хорығыс чох марығда аралазар проектнең сыххабыс, - чоохтапча КФХ ээзі.
Аның алнында чиит ипчі Таштыптағы 16 № училищеде бухгалтер тоғызын толдырған, че халғанӌы туста ол кирекке чӱрее чатпиныбысхан. Марина Ивановна пос киреенең айғасчаң сағыс ал чӧр сыххан.
Ам, тізең, 7 чыл ирт парды, алған 300 хойы пір муң азыра санға ӧс парыбысхан. Хоныхта інектер, аттар ӧскірілче. Інек-чылғы малларның саны ідӧк ӧзер, ээлері андағ сағыс тутчалар. Хоныхтың «сырайы» Марина Ивановна полча, хада хонғаны от тимнир, тоғысха кізі тілир, ит садар сурығларны пӧкче. Маринаа, тізең, ӧӧнінде чаӌыннарнаң тоғынарға паза зоотехник, мал имӌізі кӧстеглерін позына аларға килісче.
- Пылтыр аал хонии министерствозы ӱгредіг курстарын иртірген. Хайди хойларны тӧллендірерге мал имчілерін паза фермерлерні ӱгреткеннер, - чоохтапча фермер. - Курстар тоозыл парғанда, удостоверение алып алғам. Ам андағ тус, наа пілістер аннаң-мыннаң алып аларға чарир, кӧңнің не пар ползын. Минің пастағы пӧзік ӱгредиим экономика саринаң, че ол малларнаң айға-зарға харығ полбинча. Февраль айда, хурағаннар тӧрир алнында, хойларға витаминнер турғысчабыс, анаң хурағанахтарға 2-3 хати витаминніг уколлар.
Кӱскӱде хойларға хатап витаминнер киректелче. Тоғыс толдыра, мал имчілерінең чӧптезерге удаа килісче. Малларнаң орта айғазары хоостыра пілістерібісті тӧреміл узаратчабыс.
- «Чыл кізізі» атха турысханын піліп алғанда, хайдағ сағыстар пол килген?
- Хайхап парып, ол хабарны Оксана Лалетинадаң ӧрініснең піліп алғам, ол Таштып аймааның аал хонии пӧлиинең устапча. Анзы пілдістіг, андағ атха турысханы чуртаста пӧзік чидіглерге читкеннеңер таныхтапча, олаңай кізее пирілбес.
Палалары Алинанаң Павел киректең оортах турбинчалар, тынағ тузында хой хадарарға полысчалар. Амзараковтар ирепчі оларны кічігдең сығара істенерге кӧніктірче. Оңдай паза тус табыл парза, пасха туған-чағыннары ідӧк хабазығ пирчелер. Фермер сӧбірезіне чыл сай хазнадаң хабазығ пирілче, хойлар-маллар ӧскіреріне субсидия тӧлелче.
- Аал хониинаң айғасчатхан кізінің хылии чахсы салтарларға чидіп аларға полысча, неке?
- Пос киреенде нандырығлығ поларға кирек. Син итпезең, орныңа кем идер? Хада хонғаным, идінчҷек полып, ол нимедеңер пілген, аннаңар сидіксініс терге тимде полғабыс.
Автор :
Тарина БУТОНАЕВА
Пн | Вт | Ср | Чт | Пт | Сб | Вс |
27 | 28 | 29 | 30 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде