НАА ЧЫЛҒА УЛУҒ СЫЙЫХ
12.01.2022
Хабарлар
Ӧрініс. Ағбан пилтірі аймаандағы Тазоба пилтірі аалда наа имнег амбулаториязы паза нааӌылалған культура кіні азылғаннар
Аал чуртағӌыларының пу ӧріністіг кӱні 2021 чылның 30 декабрьында полған. Чонға тың кирек учреждениелерні пайрамни азарға Хакасия пазы Валентин Коновалов, республиканың хазых хайраллаӌаң министрі Олег Ананьевский, аал хонии министрі Сергей Труфанов, Ағбан пилтірі аймаа пазы Елена Егорова, Тазоба пилтірі аал чӧбі пазы Иван Сажин паза Ағбан пилтірі аймааның имнег туразы-ның ӧӧн имӌізі Екатерина Трефилова килгеннер.
Тазоба пилтіріндегі ФАП онӌа чыл мының алнында чир тітіреен соонаң изел парған, аннаңар аны аал чӧбі туразынзар кӧзірібізерге киліскен. Фельдшерге анда пирілген кічіг орында кізілернең тоғынарға тың сидік полӌаң.
Амды, тізең, аал чуртағӌыларына аннаң он хати улуғ - 224 квадрат метр - имнег амбулаториязы ізиин азыбысты. Анда процедура кабинеді, аптека пар, ідӧк кічіг частығларның паза улуғларның хазиин сыныхтаӌаң алынӌа пӧліктер кӧріл парғаннар. Наа учреждение істінде ідӧк прай наа тиріглер турғызыл парғаннар. Пу амбулатория Хакасияның аал хонии министерствозы чуртасха кирчеткен «Аалларның тиксі тилізі» хазна программазы хоостыра пӱдірілген. Ахча федеральнай паза республика бюджеттерінең позыдылған - прай 12, 4 миллион салковай!
- Амды Тазоба пилтірі аалдағы чуртағчыларға пір ле орында хазиин пӱкӱлеезінең сыныхтабыс турарға чарир. Тиксі алза, пу программа хоостыра Хакасияда 2021 чылда мындағ 8 амбулатория пӱдіріл парған. Республикадағыларға пастағы имнег полызиин пирер оңдайларны хайығда чахсы тут чабыс, - теен Хакасия пазы Валентин Коновалов.
Хакасияның хазых хайраллаӌаң министрі Олег Ананьевскийнің искіриинең, пу чағынғы чылларда республикада чонға имнег полызиин пирӌең ам даа 15 тура пӱдірібізер кӧстег пар.
- Оларның чарымы ФАП-тар, чарымы мындағ амбулаториялар полар. Иң килкім пӱдіріглерні алза, 2022 чылдаң сығара Асхыста олған поликлиниказының пӱдірии пасталар. Аны ікі чылға тимге сығарыбызарға кӱстенербіс. Иргі поликлиника, санитарнай кирексіністерні толдыр полбинчатхан ӱчӱн, най иргі тура полған, чарғы чарадии хоостыра чабыл парған. Пӧгінде ідӧк Ағбанда паза Харатаста олған поликлиникаларын пӱдірібізері. Пӱӱл аукцион иртірілер, анаң 2023-2024 чылларда ол пӱдіріглер пасталарға кирек, - теен министр.
Ағбан пилтірі аймаандағы Тазоба пилтірі аалдағы культура туразында тыхтағ тоғыстары ідӧк «Аалларның тиксі тилізі» хазна программазы хоостыра иділген. Иң пурнада андағы кӧрігӌілер залының полы алыстырылған, анаң тасты нааӌылалған. «Культура» нацпроект хоостыра, тізең, аалдағы клубсар театр сіреелері алылғаннар.
- Культура туразы уғаа чылығ, чарых паза сіліг. Сағынчам, аал чуртағчылары пеер хынып чӧр турарлар. Мындағ улуғ тоғыс ӱчӱн алғыс читірчем Хакасияның культура, аал хонии министерстволарына, Ағбан пилтірі аймаа, Тазоба пилтірі аал чӧбі устағчыларына паза подрядчикке! - алғыстаан Валентин Коновалов.
Тазоба пилтірі аалдағы культура туразы 1957 чылдох пӱдірілген. Аннаң пеер анда алғым тыхтағ тоғыстары пір дее иділбеен полған. Анда олғаннарға паза улуғларға кӧрілген 15 кружок тоғынча. Библиотека андох орныхча.
- Хакасияның аал хонии министерствозынаң хада піс ирткен чылда 4 культура туразында алғым тыхтағ тоғыстарын ир тірібіскебіс, 2 наа клуб пӱдір салғабыс.
Клуб аал чуртағчыларына тың кирек. Анда олар, аймах мероприятиелерге чыылызып, кӧңнілерін часхарып алчалар. Ол - чонның иң хынған орны! Пӱӱнгі кӱнде Тазоба пилтіріндегі культура туразында ӱс ле кізі тоғынча. Че піс Ағбан пилтірі аймаа устағ-пастаанаң хада специалисттер суриин хайди даа пӧгербіс, - теен Хакасияның культура министрі Светлана Окольникова.
Ағбан пилтірі аймаандағы Тазоба пилтірі аалда азылған имнег амбулаториязы паза клуб хости турчалар. Хайди искірген аал чӧбі пазы Иван Сажин, тӱрчедең наа учреждениелернің ибіркізі, сиденнеліп, прай иптел парар. Анаң, парк тӧстеп, ағастар одыртылар, асфальт салылар.
Наа чыл алнында сағынған сағыстар хайди даа толадыр. Ағбан пилтірі аймаандағы Тазоба пилтірі аал чуртағӌылары анзына киртінділер. Олар пу учреждениелерні ӱр сахтааннар нооза.
Автор :
Александра КАРАМЧАКОВА
Пн | Вт | Ср | Чт | Пт | Сб | Вс |
27 | 28 | 29 | 30 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде