ПОС ГАЗЕТАЗЫНА ТУЗЫНДА ПАЗЫНДЫРЧАТХАН ПОЧТАЛЬОННАР
29.10.2019
Хабарлар
Чиңісчілерге ахчалығ сыйых кӧрілче. Марығ салтарларын кӧрзе, олох ла почта пӧліктерінде почтальоннар иң артых салтарларға читчелер, че пірееде салтарлар редакция тоғынчыларын хайхадыбохча.
Кем 2019 чылның ікінҷі чарым чылына пазыныс кампаниязында иң артых полыбысты? Иң артыхтар санында ӱс почтальон: Ӱс чул аалның почтальоны Марина Владимировна Кильчичакова, Бондарев аалның почтальоны Любовь Николаевна Бурнакова паза Полтах аалның почтальоны Светлана Ананьевна Мамышева. Че редакция турғысхан кирексіністі - 200 экземплярға паза чарым чылға пазындырғанын - пір ле почтальон толдырып алған. Ол - Марина Владимировна Кильчичакова, «Хабар» газетаа 285 кізіні пазындыр салған. Андағ оңдайнаң, ахчалығ сыйых ағаа ла читірілген. Чоохтирға кирек, Марина Владимировна редакцияның почтальоннар мариинда чиңісчілер санында тӧреміл поладыр.
- Марығның чиңiсчілер санында тӧреміл полчам, - таныхтаан Марина Владимировна, редакцияның ахчалығ сыйиин алып. - Мин Ӱс чул паза Иллимор ааллар чуртағҷыларын 2004 чылдаң сығара пазындырчам. Газетаны ӧӧнінде тынағдағы улус алча. Хакас газетазын хаҷанох алчатхан чонны кӧӧктірерге кирек чоғыл, олар ағаа хынып пазынчалар, газетаның паазына даа тың киректері халбинча. Че наа хығырығҷылар парох, пос газетазына пазынарға киректелчеткенін чахсы чарытса, пазынчалар.
Таныхтирға кирек, олаңай чонның хыринда ӱгретчілер газетаа уйан пазынчалар. Марина Кильчичаковаа 10 муң салковай ахчалығ сыйыхты «Хабар» газетаның ӧӧн редакторы Радион Сунчугашев читірген. Ол почтальоннарның газетаны хығырығҷыларға читірерінҷе нандырығлығ тоғызын таныхтаан.
Почта тоғынҷылары аалларзар тоғынҷаң кӱннерде дее читпинчеткеніне хайығ айландырған. Пӱӱнгі кӱнде аалларда почта пӧліктері неделяда ӱс ле кӱн тоғынчалар: вторникте, четвергте паза субботада. Улуғ аалларда пу кӱннерде газета тарадылчатса, кічіг аалларзар газета ӧӧнінде субботада читірілчеттір.
Анзы хомзындырча. 200 санға читір полбаан, че ағаа иң чағын полған почтальоннарны редакция алғыстас пічиинең таныхтирға чаратхан. Оларның санында 143 экземплярға пазындырған Любовь Бурнакова паза 140 экземплярға пазындырған Светлана Мамышева.
Бондарев аалның почтальоны «Хабар» газетаның 143 экземплярына пазындыр салғаны сала таңнатхан.
Ноға? Че пу почта пӧлиинзер ідӧк тоң хакас ааллар кірчеттір: Маткичіг, Чоғархы Киндірліг паза Хызыл хара суғ. Аннаңар даа почтальонға пу син толдырғаны чахсы. Любовь Николаевна почтада 2010 чылдаң сығара істен парча. Аның тоғыс оңдайлары пасхалалбинча. Ипчінің чооғынаң, газетаны олох ла чуртағҷылар алчалар.
Россия почтазының Асхыс аймаандағы Полтах аалдағы почтальоны Светлана Мамышева пис чыл почтальон полып тоғын парир. Пу тоғыс аның кӧңніне кірче.
- Почтазар тоғынарға килер алнында мин кӧп тус тоғыс чох одырғам. Соонаң кізілер аразында тоғын кӧрерге сағыныбысхам. Почтазар килгенімде, мында тоғыс орны табыл парған. Тоғыс хоостыра кӧп кізінең чоох алызарға оңдай пар. Анзы кӧңніме уғаа кірче.
Амғы туста кізілерні газетаа пазындырарға сидік, оларны удаа чӧптирге килісче. Че піреезі сыбыра газетаа пазынча. Олар льготалығ пазыныс тузында маңнанчалар, - чоохтапча Светлана Ананьевна.
«Хабар» газетаның ӧӧн редакторы Радион Сунчугашев почтальоннарны тоғыстары ӱчӱн алғыстаан паза 2020 чылның пастағы чарым чылының пазыныс кампаниязына ідӧк почтальоннар марии чарлаларына паза кирексіністер алыспазына хайығ айландырған. Редакцияның чарадии хоостыра, санға алылчалар почтальоннарның газетаа алты айға паза 200 экземплярдаң кӧп пазындыр салғаны.
Автор :
Наталья СУБРАКОВА, Антон ЧЕРТЫКОВ
Пн | Вт | Ср | Чт | Пт | Сб | Вс |
28 | 29 | 30 | 31 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 1 |
Кӱн таңмазы
Хакасияда
Россияда
Тилекейде