ХАЗНА ДУМАЗЫ СИДІКСІНІСТЕРГЕ ХАЙЧА
11.02.2020
Хабарлар
Кӱн сурии. Россияның Хазна Думазы Чӧбінің теестегі чыылиинда регионнарға, уламох Хакасияа, танығлығ чарадығлар алыл парды
ТӰЗЕДІГЛЕРНІ - 14 ФЕВРАЛЬҒА ТЕЕРЕ
Хазна Думазының Чӧбі Конституциязар алызығлардаңар президенттің закон проектіне чӧптерні алар тусты 14 февральға теере узарадарға чаратхан. Аннаңар искірген Хазна Думазының кнезі Вячеслав Володин Чӧп чыылии соонаң.
«Чӧп чыылии пасталарына 65 тӱзедіг юрген, - искірген Вячеслав Володин. - Оларны тиксі ӱзӱрібіскен соонаң на чарадығ аларға кирек тіп санапчабыс. Аннаңар кӧстегліг комитет тӱзедіглерні кирер тусты 14 февральға теере узарадарға сурынча. Аннаң даа кӧп тӱзедіг кірзе, пу сурыға хатап таа айланарға килізер. Пу сурығ чонны сағыссыратча, ӱзӱріглер олаңай чон даа, эксперттер дее аразында парча. Ӱзӱрігні пір неделяа узаратханы орта тіп санапчабыс. Піс пастағызынаңох искіргебіс: ӧӧні - тоғысты чахсы толдырыбызары.
Алында закон проектінің ікінҷі хығыриина тӱзедіглерні 7 февральға теере аларға чарадылған, депутаттар 11 февральда пастағны ікінҷі хығырығда ӱзӱрерге пӧгінгеннер.
РЕГИОННАР БЮДЖЕТТЕРІН ТИҢНИРІ - ХАЙЫҒДА
Ідӧк Хазна Думазының Чӧбі пис регионда чуртағҷы саны иң кӧп хызырылғанын ӱзӱрерінҷе паза субъекттер бюджеттерінің толдырылчатханын тиңнирінҷе ікі тоғысчы ӧме тӧстирге чаратхан.
Пастағы тоғысчы ӧме чуртағҷы саны иң кӧп хызырылған регионнардағы киректі ӱзӱрер. Росстат искіриинең, 2019 чылда чон саны иң кӧп хызырыл парған Саратов облазында (19 муң кізее), Омск облазында (17,6 муң кізее), Кемеров облазында (16,5 муң кізее), Алтай крайында (15,8 муң кізее) паза Волгоград облазында (15,8 муң кізее).
«Чуртағҷылар саны иң кӧп хызырылған регионнарда киректі істезер ӱчӱн, аннаң андар аны чахсыландырар пӧгіннең ол регионнарға чӧптер тимнирге, хабазар оңдайлар кӧр саларға паза пірее орында сидіксіністің сылтаан кӧзіт пирерге тіп, піс правительстводағыларнаң пірге тоғынарға сағынчабыс», - теен Вячеслав Володин. Аның таниинаң, тоғысчы ӧменең «Единая Россия» партия фракциязының устағҷызы, Хазна Думазының кнес орынҷызы Сергей Неверов устир.
Ікінҷі тоғысчы ӧме, аның сӧстерінең, «2020 чылға паза пазағы чылларға бюджеттеңер законны ӱзӱрчеткенде алылған Хазна Думазының чарадииның чуртасха кирілчеткенін сыныхтир, ӱзӱрер паза хайығда тудар».
«Орыннардағы бюджеттерні толдырарын тиңнирінеңер чоох парча. Сірер пілчезер, чахсы бюджеттіг паза уйан бюджеттіг регионнар аразы пілдірте пасхалалча. Читі хати. Сала уйан бюджеттіглерні кӧдіріп алар ӱчӱн, оларға полыс пирер ӱчӱн паза бюджеттер тың пасхалалбас ӱчӱн, ӧнетін хоза полызығ пирілер он регионны таллап аларға чарадылған. Палата саринаң ідӧк хоза сыныхтағ апарылары орта полар санапчабыс, - таныхтаан Вячеслав Володин. - Правительствонаң паза регионнарнаң хада, Псков облазынаң Тываға теере регионнарнаң палғалызып, пастағы кварталның салтарларынҷа киректі паалир пӧгіннең, тоғысчы ӧмезер, хайзынаң устир Хазна Думазының пастағы орынҷызы Александр Жуков, кӧстегліг комитеттер паза фракциялар кізілері кирілер.
Автор :
Россия Хазна Думазының пресс-службазы
Пн | Вт | Ср | Чт | Пт | Сб | Вс |
28 | 29 | 30 | 31 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 1 |
Кӱн таңмазы
Хакасияда
Россияда
Тилекейде