«НОҒА-НОҒАӋАХТАР» - ПАЛА ТІЛІНЕ
16.10.2019
Хабарлар
Чыылығда кӧп наа сағыс тӧреен
Чыылығ. «Хабар» газетаның редакциязындағы «Сарчын» клуб тоғазығларны узаратча. Пу наада редакцияда газетаның «Ноға-ноғаӌахтар» хоза сығарызының тиксі кӧрімі паза материалларының тузазы ӱзӱрілді
Пос тілін хайраллирының паза тилідерінің сидік сурығларының пірсі - ӧсчеткен тӧлні ағаа ӱгредіп алары. Республиканың ӱгредіг учреждениелерінде хакас тілін ӱгренчеткен палалар саны чылдаң чылға хозылып одырча, че тілні хайраллирынҷа халых тоғызынаң айғасчатхан ӧткін чуртағҷылар даа, ӱгретчілер дее, учёнайлар даа тіл палаа іҷе сӱдінең сиипчедір тіп таныхтапчалар. Аннаңар сӧбіреде паланы пос тіліне ӱгредері - пӱӱнгі кӱннің ӧӧн кирексіністерінің пірсі.
«Хабар» газетада «Ноға-ноғаҷахтар» сығарыс илееде тус сых парир, че пастағы аның кӧстее - кічіг частығ олғаннарны тилітчеткен кӧніктіріглерні пирері. Ӧӧн редактор Радион Сунчугашев пу кӧстегні чон культуразына, кибірлеріне паза тіліне чағын идерге чаратхан, іди амғы «Ноға-ноғаҷахтар» сығарызы ол паланы тілге ӱгредерінҷе, пос культуразынаңар паза кибір-чозахтарынаңар пастағы пілістерні пирерінҷе іҷе-пабаларның чахсы полысчызы полыбысхан. Аның кӧрімі дее хакас чоныбысха чағын пол парған. Олох туста прай даа кӧніктіріглер олғанның сағызын, кӧрізін, сизіктіг поларын паза чайаачы кӧрізін тилідерге полысча.
Редакцияның чыылиина Хакасияның ӱгредіг паза наука министерствозының национальнай ӱгредіг пӧлиинің ӧӧн консультанты Анна Танбаева, республиканың ӱгредігні тилітчең паза квалификацияны кӧдірҷең институттың хакас тілін ӱгренерінҷе методика кінінің методизі Мария Арчимаева, Ағбан городтың олған садтарының воспитательлері Юлия Чаптыкова, Светлана Ахпашева, Ангелина Сагалакова паза Пӱктігдегі пасталығ школаның ӱгретчізі Валентина Топоева хығыртылғаннар. Газетаның ӧӧн редакторы Радион Сунчугашев, аалҷыларны удурлап, пу чыылығ тузалығ иртеріне ізенізінең ӱлескен. «Ноға-ноғаҷахтарның» редакторы Наталья Тюкпеева сығарыстың сыххан оңдайларынаңар паза пӱӱнгі кӧрімінеңер чоохтап пирген. Анаң сӧс пирілген аалҷыларға.
- Пу сығарыс пістің чуртағҷыларға уғаа кирек, - таныхтаан Анна Антоновна. - Пу тоғысты апарчатхан ӱчӱн алғыс сірерге читірчем. Сығарыстағы таптырғастар, орта чол табарынңа кӧніктіріглер, минің кӧрізімнең, сӧбірені палаларнаң айғазар киректе піріктірче. Пӱӱл часхызын хакас чииттернің пастағы съездінде «Ноға-ноғаҷахтарны» алынҷа кинде чіли сығарарға чӧп юрген. Ол чахсы паза кирек чӧп. Олох туста мин пірее кӧніктіріглерні газетаның сайтында (http://khakaschiry.ru/) «Ноға-ноғаҷахтар» пӧлииндепир турарға чӧптепчем.
Анна Антоновна ідӧк кічіг хығырығҷыларнаң палғалысты тыыдарға чӧптеен. Марығлар, алғыстас пічіктері пастыра. Аймах оңдайлар табарға чарир.
- Піс, хакас тлі пособиелерін паза учебниктерні, ӱгретчілерге методика чӧптерін тимнепчетсе, «Ноға-ноғаҷахтар» сығарыстаң иң артых чахығларны, таптырғастарны паза кибелістерні таллапчабыс, - чоохтапча Мария Сергеевна. - Аннаңар сығарыс уғаа тузалығ. Хоза табырах чоохтазығларны кирерге чӧптепчем. Галина Казачинованың киндезіне тӧстеніп, авторны анда тузаланылчатхан сӧстерні чарыт пирерге сурынарға чарир. Ағбан городының олған садтарынаң палғалыс тударға кирек. Городта 20 азыра олған садында хакас тілі ӧмелері пар.
Воспитательлер паза ӱгретчілер, тізең, «Ноға-ноғаҷахтарны» сығарарына постарының хозымын итчелер, таптырғастар, ребустар паза кибелістер тимнеп пирчелер. Пу тоғысты кӱннің апарчатхан кізілер пала кӧңнін паза хылиин чахсы пілчелер нооза.
Редакция устағ-пастаа чыылығ араласчыларына араласхан паза чӧптер пирген ӱчӱн алғызын читірген паза «Ноға-ноғаҷахтарның» мыннаң мындархы сығарыстарында наа сағыстарны чуртасха кирерге кӱстенер.
Сірер чи, аарлығ хығырығҷылар, «Ноға-ноғаҷахтар» сығарыстың тузазын хайди паалапчазар?
Автор :
Наталья СУБРАКОВА
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 31 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде