Аал хонии сурығлары тӧремiл хайығда
13.01.2021
Хабарлар
Пӱӱн Россияның печать кӱнi таныхталча. «Хакас чирi» газетаның тоғынҷылары иртеннең ала алғыстастар алып пастабысханнар. Профессия ӱлӱкӱнiнең газетаның ӧӧн редакторын паза хабарҷыларны ӧнетiн алғыстир пӧгiннең Хакасияның аал хонии паза ас-тамах министрi Сергей Труфанов кил парған. Ол «Хакас чирi» газетаның ӧӧн редакторы Радион Сунчугашевке министерствоның алғыстас пiчиин читiрген.
– Хакасия хаҷан даа аал хонии регионы полған. Орындағы чон хаҷаннаң ала мал ӧскiрерiнең, хыра тартарынаң айғасхан. Хакас чоны, тiзең, хойнаң ат полызиинаң чуртаан. Алғызыбыс читiрчебiс газетада аал хонии iстенҷiлерiнеңер, оларның ниик нимес тоғыстарынаңар пасчатхан ӱчӱн. Мин пiлчем, сiрернiң газета хаҷан даа аалнаң хада, - теен министр Сергей Труфанов.
Чоохтирға кирек, газетада аал хонии сурығлары сынында тӧремiл хайығда тудылчалар паза тирең чарыдылчалар. Ағаа хоза аал чуртазын прай даа хабарҷылар чарытча тиирге чарир. Анзы даа пiлдiстiг. Аалларда культура, ӱгредiг паза имнег кирее сурығлары пӧгiлче, республика ӱлгӱлерi пу кӧстеглернi тилiдерiне улуғ хайығ айландырча.
Хакасияның аал хонии паза ас-тамах министерствозының Аарластығ пiчиинең газетаның ӧӧн редактор орынҷызы Наталья Субракова таныхтатхан. Хабарҷы аал хонии сурығларын илееде чыл чарыт парир.
Министр Сергей Труфанов паза ӧӧн редактор Радион Сунчугашев мыннаң мындар ааллар чуртазын, аал хонии тилiзiн чарыдарынҷа паза iстенҷiлернiң чуртас чолынаңар пазарын узарадарға чӧптес салғаннар.
Автор :
Наталья Боргоякова Сом Дина Карамчаковани
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 31 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде