ААЛ ТИЛІЗІНЕ ТУЗАЛЫҒ ЧӦПТЕЗІГ ИДІЛДІ
08.09.2021
Хабарлар
Тоғыс чорығы. Ирткен пятницада Хакасия пазы Валентин Коновалов Шира аймааңдағы Коммунар аалзар чӧрген
Пу кӱнде Коммунар аалның тархынына паза пір танығлығ кирек киріл парған тиирге чарир. 3 сентябрьда 2021 чылда Хакасия пазы Валентин Коновалов, «Коммунаровский рудник» ПАО-ның президенті Константин Струков паза Коммунар аал чӧбінің пазы Михаил Захаров пу муниципальнай пӱдісті хада-пірге тилідердеңер чӧптезігде хол салғаннар!
- Рудник чир ис-пайын анирын алғыдарға пӧгінче. Аннаңар анда тоғынар специалисттер тың киректелчелер. Че оларны пеер кӧӧктіріп алар ӱчӱн, аалда чуртир оңдайлар тӧстирге кирек. Аннаңар мында орныхчатхан предприятиенің паза Хакасия правительствозының устағ-пастаа хайди даа хада-пірге тоғынарға кирек, - таныхтаан республика пазы Валентин Коновалов.
- «Южуралзолото Группа Компаний» акционер пірігізінiң пӧлии полчатхан «Коммунаровский рудник» ПАО алтынға пай чирде орныхча. Аннаңар піс пу муниципалитет тилідер киректең пір дее хыйа турбаспыс. Аалдағы чуртас чахсы саринзар алысса, піс тее тоғызыбысты айныдарбыс. Правительствонаң мындағ чӧптезіг иділ парғаны піске нименең танығлығ?
Иң пастап, тоғысчыларыбысха чурт пирілері, оларның палаларына олған садын, школа пӱдірері, чолларны иптирі полча. Аннаң пасха, регион бюджедіне ахча кирері кӧрілче нооза, - чарытхан компания президент Константин Струков.
Хайди ол аннаң андар искірген, олар Коммунарда пір чылда 10 миллион тонна руданы пайыт турар наа ГОК пӱдірібізерге пӧгін тутчалар. «Ол программа пис чылға кӧріл парған. Аннаңар правительствонаң хада тоғынар чӧптезігде хол салыл парғаны піске компаниябысты даа, Коммунар аалны даа тилідер оңдай пирче», - теен Константин Иванович.
Чоохтирға кирек, Хакасия пазы Валентин Коновалов тоғыс чорығы тузында пастап Коммунардағы рудниктің чир ис-пайын аныҷаң орнынзар (ОГР) паза алтынны пӧлчең фабриказар (ЗИФ) чӧр килген. Ол іди пу компанияның оой нимес тоғызын позының хараанаң кӧріп алған.
Хакасия правительствозы паза «Коммунаровский рудник» ПАО-ның аразында иділген паза пір чӧптезіг «Поднебесье» турист кінін азардаңар полча. Проект хоостыра Асхыс аймаандағы Палыхтығ суғ аалда аймах кӧстегліг турист комплекстерін тӧстирі кӧрілче. Хорадығлар сині - 10,4 миллиард салковай.
- Хакасияның чир-чайааны уғаа сіліг, тархыны пай, аннаңар туризмні тилідер киректе піс ідӧк ӧткін хайынарбыс. Правительство мындағ проектте аралазарға чӧптеенде, піс сах андох ынабысхабыс. Піс чонның истіг оңдайларда чуртазы ӱчӱн тоғынчабыс нооза, - ӱлескен «Коммунаровский рудник» ПАО-ның президенті Константин Струков.
Коммунар аал чӧбінің пазы Михаил Захаров аал ӧңненіп пастирына уламох тың ӧрінче.
- Пӱӱнгі кӱнде тоғыс чохтаңар кӧбізі ааллардаң кӧсче. Че мин, Коммунар ӧңнен сыхса, аал чуртағӌыларының саны хайди даа хозылар тіп сағынчам, - ӱлескен ол.
Автор :
Александра КАРАМЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде