АРТЫХТАРЫ КӰСТЕРІН СЫНААН
03.12.2021
Хабарлар
Спорт. Асхыс аймаандағы Тӧӧ пазында саналығ чарысча улуғ марығлар ирткеннер
РОССИЯ КУБОГЫ
Кӱскӱнің халғанҷы айы Тӧӧ пазында улуғ марығларнаң танығлығ. 20-21 ноябрьда анда саналығ чӱгӱрерінҷе Россия Кубогының I чардығы ирткен. Хакасияның спорт министерствозының искіриинең, анда 400-че кізі араластыр. Саналығ чӱгӱрерінең айғасчатханнар пістің республиказар Россия регионнарынаң на нимес, хырығ озаринаң чыылысханнар. Араласчыларның санында Белоруссияның, Казахстанның, Марокконың спортсменнері полғаннар. Пастағы кӱнде чыылысхан улус спринтте кӱзін сынаптыр. Ипчілердең Евгения Рудометова (Тюмень облазы) чиңіс тутхан, ир кізілердең - Фёдор Назаров (Москва). 21 ноябрьда саналығ чарыс полған. Абахайлар 5 км чӱгӱргеннер, ир кізілер - 10 км. Пастағы орынға Дарья Непряева (Тверь облазы) паза Андрей Кузнецов (Хызылчар крайы) сыхханнар.
ТАНЫҒЛЫҒ МАРЫҒ
27 ноябрьдаң 1 декабрьға теере, тізең, Хакасияның кубогы полған. Чоохтирға кирек, 1996 чылдаң Саналығ чӱгӱрерінҷе чоннар аразындағы федерация (ФИС) Тилекей кубогында араласпинчатхан спортсменнерге алынҷа марығ иртірче. Ол ФИС-тың Континент кубогы тіп адалча. Аны хоостыра прай хазналарны 9 регионға чарыбысханнар: Скандинавия, Балканнар, Іскеркі Европа, Азия паза пасхазы. Россия, Казахстан, Белоруссия паза Украина Іскеркі Европаның кубогында араласчалар. Пу марығ нинҷе-нинҷе чардыхтаң пӱткен. Чӱгӱрікчілер, анда кӱстерін сынап, саннар чыыпчалар. Регионында чиңіс тутхан спортсменнерге Тилекей кубогында, ол санда азах меетте, аралазар оңдай пирілче.
Іскеркі Европа кубогының I чардығы 12 - 15 ноябрьда Казахстандағы Щучинск городта ирткен. Хакасияның кубогы - аның II чардығы. Ідӧк пу арға-мӧрій республика пазының сыйыхтарына иртірілчеткен тиксі Россия марии полча. Аннаңар чон Тӧӧ пазынзар марығлазарға чахсы чыылысча. Пӱӱл араласчылар хазнабыстың 39 регионынаң полғаннар. Оларның санында саналығ чӱгӱрерінҷе 70 спорт узы, 10 артиинаң чоннар аразындағы класстығ спорт узы. Иң кӱстіглері Россияның піріктірілген командазына кірчелер.
27 ноябрьда программада классика оңдайлығ спринт полған, 28 ноябрьда спортсменнер 10/15 км пос оңдайынаң чӱгӱргеннер. 30 ноябрьда олар пос оңдайлығ спринтте кӱстерін сынааннар, 1 декабрьда классика оңдайлығ чарыс ирткен. Республиканың СМИ-ларында істенчеткен хабарҷылар 30 ноябрьда марығны пос хараанаң кӧріп алғаннар.
ПОС ОҢДАЙЛЫҒ СПРИНТ
Ол кӱн абахайлардаң 103 кізі чӱгӱрген, иреннердең - 142. Спринтте дистанцияның узуны - 1,5 км. Марығ оңдайларынҷа азах мееттің тӧртінҷі чардығына 30-ар спортсмен сыхча, чарым финалға 12 кізі, азах меетке - 6 спортсмен. Аннаңар арға-мӧрійде полған на секунда ӱчӱн харбазығ парған. Татар чонның хызы Эльмира Гаяноваа чарым финалға сығып аларға кӧмес ле читпиндір. Ол Башкириядағы Нефтекамск городта спорт сӧбірезінде тӧреен. Іҷезі - саналығ чӱгӱрерінҷе СССР-ның спорт узы. Хызына 7 час толғанда, аны секцияа пазындыр салған. Амды Эльмира позы спорт узы полча, иң улуғ чидии Россия Кубогында ікінҷі орынға сыхханы. Тӧӧ пазынзар марығларға 2008 чылдаң тӧреміл килчеттір. Чиит ипчінің хынчатхан дистанциялары 30 км паза 50 км полтыр. Эльмира Гаянованың таниинаң, 28 ноябрьда пораан полғаннаңар, спортсменнер 10 км чӱгӱрерге сидіксінгеннер. 30 ноябрьда кӱн чахсы тур пирген. Татарстанда саналығ чарысты тилідерге кӱстенчелер. Тӱрчедең Казаньда наа стадион тимге сығар. Полған на аймахта, городта, улуғ поселоктарда трассалар пар.
Спринтте араласханнардаң чоннар аразындағы класстығ спорт устары Наталья Матвеева, Анастасия Доценко, Мария Давыденкова паза Алиса Жамбалова кізі хайиин тартханнар. Чӱгӱрікчі спортсменнер трассада прайзын ас парыбызарлар тіп сағыс полған. Че финалға Наталья Матвеева ла читкен. Классика оңдайлығ спринтте ол ікінҷі орынға сыххан полза, 30 ноябрьда саблығ спортсменге оң полбаан. Аның алтынҷы орын.
Саналығ чӱгӱреріне хынчатханнарны Алиса Жамбалова хомзындырған. Ол Бурятияда спорт «чылтызына» саналча. 27 частығ спортсмен 2019 чылда Универсиадада тӧрт алтын медаль холға кирген, пӱӱл январьда Тур де Ски чоннар аразындағы марығда позын турыстыра кӧзіткен. Тур де Скиде тилекейнің иң кӱстіг спортсменнері устарын сынапчалар. Пӱрӱт чонның хызы анда 12-ҷі орынға сыххан. Ол улуғ чидіг. Хакасияның кубогында А.С.Жамбаловаа халғанҷы кӱнінде ле талаан полған. 1 декабрьда классика оңдайлығ чарыста ол кӱмӱс призёр полыбысхан.
Ипчілер аразында спринтте Екатерина Смирнова чиңіс тутхан. Ол Марий Эл Республикадаң, че халғанҷы чылларда Тюмень облазы ӱчӱн турысча. Спортсмен узун дистанцияларға чахсы чӱгӱрчеттір. Спринтте аның пастағы алтын медаль. Екатерина Смирнованың ӧрінізі пу чир полбаан. Ікінҷі орында Елизавета Бекишева (Тюмень облазы) полған, ӱзінҷі орында - Елизавета Шалабода (Москва).
Ир кізілернің аразында марығ уламох хазыр парған. Мында 23 частығ Фёдор Назаров чиңіс тутхан. Ол Подольсктаң, арға-мӧрійлерде Москваның алнын алча. Чиит кізі спринт чӱгӱрерге кӱс. Россия кубогының I чардығында ол алтын медаль холға кирген. Че Хакасияның кубогында классика оңдайлығ спринтте Фёдор Назаров сыйыхтығ орынға сых полбиндыр. Спортсмен кирек пазох киліспес тіп чочынтыр. Кӱмӱс медальны Иван Безматерных (ЯНАО) холға кирген, ӱзінҷі орында чоннар аразындағы класстығ спорт узы Илья Порошкин (Коми). Аны алынҷа таныхтирға кирек. Хакасия кубогында Илья Порошкин ікі алтын паза пір хола медаль утып алған.
ЧАХСЫ ОҢДАЙЛАР
Спортсменнерге медальлар читірчеткенде, оларның тренерлерінең чоохтазарға маңнанғам. Олар Тӧӧ пазында иртчеткен марығларға пӧзік паалағ пиргеннер. Хайди таныхтаан Валентин Литвинцев, ол Екатерина Смирнованың тренері, пӱӱл Тюмень облазынаң арға-мӧрійге 27 спортсмен, 6 тренер килген. Катя ӱзінҷі чылы Россияның піріктірілген командазына кірчеттір. Амғы туста ол Іскеркі Европаның кубогында прайзының алнында парча. Валентин Дмитриевич ӱгренҷізіне Тур де Скиде аралазарға чарадарлар тіп ізенче. Тренер спринттің кӱмӱс призёры Елизавета Бекишеваны махтаан. Спортсменге 19 час, ол 2022 чылда тилекей первенствозында кӱзін сынир. Фёдор Назаров тренер Анатолий Полуниннің холында узын таптапча. Анатолий Борисович Тӧӧ пазында чахсы хар чатча, марығларға прай оңдайлар пар тіп таныхтаан.
Хакасияның спортсменнері 30 ноябрьда арға-мӧрійде араласханнар. Ооллардаң республика ӱчӱн Владислав Хамидулин, Данил Ефремов, Антон Костромитин, Егор Байбородов турысханнар. Ідӧк спринтте Анастасия Давыдованаң Илона Кужакова кӱстерін сынаптырлар.
Іскеркі Европаның кубогынзар айланза, иреннернің аразында прайзының алнында Андрей Кузнецов парча. Аның 384 сан. Илья Порошкин ікінҷі орында. Ол 305 сан чыып алған. Ӱзінҷі орында Владислав Вечканов. Ол Хакасияның кубогында классика оңдайлығ спринтте кӱмӱс призёр полыбысхан. Хыстардаң Екатерина Смирнованың 485 сан, аның соонда Наталья Мекрюкова парча. Ол 260 сан чыып алған. Ӱзінҷі орында Дарья Рогозина.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде