«СООХ АПСАХ ЧАХСЫ ООЛАХ-ХЫЗЫҶАХТАРҒА ЛА СЫЙЫХ ИТЧЕ»
29.12.2021
Хабарлар
Улуғ пресс-конференция-2021. 23 декабрьда Москвада Россия президенті Владимир Путиннің пресс-конференциязы 17-ҷі хати ирткен. Пӱӱл анда пандемия кирексіністері хоостыра 500 ле кізі араласхан. Оларның санында піс, Хакасиядағы ӱс хабарҷы, полғабыс
Полған на кізі хайдағ даа чорых алнында чӱрексіпче, неке. Мында, тізең, Россия президентінің пресс-конференциязында аралазарға часкалығ ӱлӱс тӱс парған! Аннаңар чӱрек уламох тың талбырапчатпас па! Пӱӱл пу мероприятиее кіріп алар ӱчӱн, аккредитациядаң пасха, наа чуғынӌах ағырыға хаптырбаанын киречілепчеткен пічіктер киректелгеннер. Іди піс ӱс кӱн ПЦР-сыныхтағларын ирткебіс. Аның салтарларын сахтирға ідӧк чӱрексіністіг полған. Пірсі ле хомай пол парза, чол чабыл парар нооза.
Владимир Путиннің пу чылдағы пресс-конференциязы «Манеж» ӧӧн кӧзідіг залында ирткен. Пасталған 12.00 часта (Москва тузынаң). Че хабарӌыларға кӧріл парған орында 11 частох поларға киректелген. Сынны чоохтаза, алнындағы хараада пір дее узуп полбаам. Сағыста - орайлат ла салбасха. Че ирте арах сыхханда, тузында читкем.
«Манежсер» ідӧк олаңай ла иртірбинчеткеннер. Пастап ПЦР-тесттерні кӧрібіскеннер, анаң, киптерібісті суурып, холдағы сумкаларны ӧнетін тирігнең сыныхтааннар. «Сумкаңарны азыңардах!» - хатығ сурыбысты миннең сыныхтағӌы. Азыбыстым, кӧрібісті - улуғ нимес ідістердегі антисептик паза духи хайығ тартхан осхастар.
Аннаң андар позыдыбыстылар. Улуғ залда кізі толдыра. Тус читкелек. Чей-кофе ісчеткен туста хазнабыстың аймах пулуңнарынаң чыылысхан хабарӌылар удур-тӧдір танысчалар, чоох алысчалар - интервью алчалар. Піс, кір килгендӧк, музыкант Сергей Шнуровха урун парғабыс. Ол Путинге ідӧк сурығ пирерге килтір. «Хакасияда хаӌан даа полбаам. Че, оңдай ползох, кил парарбын», - теен ол піске.
Чӱрексіпчеткенімні, чей ізіп, пазынчатхан туста минзер пір ирен пастыр килген.
- Ринат Билалов, Татарстанның Хазан городындағы «Татар-информ» агентствоның ӧӧн редакторы полчам, - танызып пастаан ол.
Мин дее кем полчатханымны паза хайдаң килгенімні ағаа чоохтап пиргем. Орта чоохтаза, Хазаннаң килген редактор сах андох миннең хысха интервью алып алған. Ол президентке хайдағ сурығ пирерге сағынчатханынаңар мағаа ідӧк искір пирген:
- Минің ӧӧн суриим ислам алылғаннаң 1100 чыл толчатханынаң палғалыстығ. Пу пайрамны пазағы чылда таныхтирға пӧгінчебіс. Піс Владимир Путиннең ол кирекке хайди хайчатханынаңар паза ӱлӱкӱнібіске кил полар ба тіп сурарға сағынчабыс.
Піс Ринат Билаловнаң хада илееде тус чоохтас турғабыс. Тӧӧй тілліг кізілерге тема таап аларға оой полған нооза.
Мына пресс-конференция залынзар иртерге кирек тіп чарлабыстылар. Ӱстӱндегі хадылдағы залзар чол тутчабыс. Вирустарны чох итчеткен «ізіктерні» иртібістібіс. Анда онҷа секунда хайди даа турып аларға кирек, азахтаң пасти пасха теере «пырғыртырып» албаанда. Анаң пазох ла сумкаларны сыныхтап сыхханнар.
Че, залзар иртіп алдыбыс. Кӧрчебіс, полған на одырчых аразы - 1,5 метр. Оларны пос хынғанни пасха орынзар турғыс полбассың - азахтарынаң пик палғал партырлар! Аннаңар, пір чирде одырып, президент Владимир Путиннің сығарын чидікпин сахтаабыс. Аның хайиин тартып алар ӱчӱн, хабарҷылар хайдағ ла полза плакаттар тимнеп килтірлер. Зал ортызында одырып, прайзын ситкіп кӧріп, сағын сыххам: «Пу син чонның аразында талааннығ ла кізілерге президентке сурығ пирерге ӱлӱс тӱсче, неке».
17-ҷі пресс-конференцияда аймах сурығлар полған - хазнаның экономика тилізінең пасти президенттің тынағ оңдайларына теере. «Пандемия тузында регионнарға коронавирустаң тоғыр кӱрезерге ахчалығ хабазығ чахсы пирілген», - теен Владимир Владимирович.
- Пілдістіг, пандемия хазых хайраллирына хорадығлар кӧп кирексеен. Аннаңар федеральнай кіннең ахча пирілгені ол уғаа чахсы полызығ. Піс ідӧк бизнестегілерге ахчанаң хабазарға тың кӱстенчебіс. Оларға ідӧк хазна программалары кӧріл парғаннар. Президент орта таныхтаан - регионнарның федеральнай кіннең пик палғалыста тоғынғаны сынап чахсы салтарлар кӧзітче, - теен Хакасия пазы Валентин Коновалов, президенттің пресс-конференциязы соонда.
Президенттең ноға Сибирьзер Шойгунаң на хада чӧрчезер, Мишустинні ал чӧрбинчезер тіп сурғаннарында, ол піди нандырған:
- Сибирь - хайхастығ чир! Аның чуртағҷылары уғаа чалахайлар. Андар тынанарға чӧрері - ол минің чуртазым оңдайы! Мишустинні хада ал чӧрзебіс, кем «лавка кистінде» турар?
Пір сӧснең, Владимир Владимирович пресс-конференцияда хатығ даа чоохтанған, хормачыланыбысчатхан даа. Хабарҷылар ағаа ідӧк хаңалҷос оңдайлығ сурығлар пирерге маңнан турғаннар.
«Санкт-Петербургтағы юрист ӱгредігліг ирен, 23 чыл сағынған сағыстарын толдырбаан ӱчӱн, Соох апсахты чарғаа пирібістір. Сірер чи Соох апсахха хайди хайчазар?» - сурған Ярославльдағы хабарҷы.
- Мин дее Санкт-Петербургтаңмын, минің ідӧк юрист ӱгредии пар. Че мин Соох апсахтың адвокады полыбызарҷыхпын. Соох апсах чахсы оолах-хызыҷахтарға ла сыйых итче нооза, - нандырған Россия президенті, прайзын хатхыртып.
Владимир Путиннің 2021 чылдағы улуғ пресс-конфе-ренциязы тӧрт час ирткен. Ол федеральнай каналларҷа кӧні эфирде кӧзіділген. Кӧп чон аны кӧрген. Піске, анда араласхан хабарҷыларға, тізең, уламох поғдархастығ полчатпас па. Піс Россия президентін, ырахтын даа полза, телевизор пастыра нимес, пос хараанаң кӧргебіс, пос хулаанаң искебіс! Пілдістіг, сурығларыбысты пир полбаанда, тың ачырғастығ. Москвада танызып алған хазан тадар хабарҷаа даа андағ часкалығ ӱлӱс тӱспеен. Аннаңар, сағынчам, федеральнай каналлар паза регион-областьтардағы алай федеральнай округтардағы СМИ-лар тоғынҷыларына алынҷа пресс-конференциялар иртірілген полза, хай-хай кӧп сурыға - нандырығ пирілерҷік.
Автор :
Александра КАРАМЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде