«ТИГІР ХУРЫНЫҢ» ЧУРТАЗЫ
14.01.2022
Хабарлар
Культура. Ирткен чыл оой полбады, прайзына тымо оңдайлары хоостыра тоғынарға килісті. Пыдырахтағы «Тигір хуры» культура кінінде пылтырғы чыл хайди ирт парғаннаңар Светлана Торокова чоохтап пирген
Светлана Алексеевна пу кіннең 1995 чылдаң сығара устапча, андар Пыдырах, Чыланнығ паза Харағай аалларның культура туралары кірчелер. Мының алнында олар пос алынҷа тоғынҷаңнар, че 2011 чылда пір системаа киріл парғаннар.
Пістің тоғазиибыс Наа чыл алнында ирткен. Культура кінінің тоғынҷылары тураны Наа чылға чазапчатханнар. Тура істінде пілдірте сӧрӧн полған, клуб 1979 чылдох пӱдірілген, хырых азыра чылға илееде иргілен парған. Ӱр ниместе хырны алыстырҷаң тоғыстар апарылған, че наа хыр чылығ пирбеді. Фундамент чарылча, чыл сай аны «Тигір хурының» тоғынҷылары анда-мында кӧместең тыхтапчалар, че анзы тың на полыспинча.
Чахсы алызығлар сизіністігӧк, халғанҷы туста наа аппаратура хозылча. Республика бюджедінің субсидиязына 2020 чылда 300 муң азыра салковайға ноутбуктар, принтерлер, микрофоннар, тимір хомыстар алылғаннар. Интернет тартырып алғаннар, ам электроннай пічіктер ызарға аал чӧбінзер чӱгӱр чӧрбинчелер. Тоғыс нииктелче, наа оңдайлар азылча. «Тигір хуры», аймах-пасха марығларда аралазарға маңнанып («Хысхы саңнары», «Созвездие юных» паза пасхазы), маңат салтарларға читче. Кізілернең кӧп тоғыс апарарға килісче, олох марығларға араласчыларны тілирге алай ба кӧрігҷілерні чыырға. Мының алнында чон ӧткін арах полҷаң, че амды полған на турада телевизор пар, чиит тӧл интернетте «пат парча». Я, андағ сидіксініс аалда ла нимес, городта пілдірче полар. Смартфоннар, чуртасха пір хатап кір парып, илееде тус постарынзар тартчалар. «Тигір хурында», тізең, теелбек, вокал, ДПИ, драмтеатр кружоктары тоғынчалар, улуғларға даа кружоктар пар.
- Амғы олғаннар пасхаҷыл пол парғаннар, - ӱлесче Светлана Алексеевна, - ундутчыллар алай, кӧмес тыыда чоохтаныбыссаң, чӧрбин сыхчалар. Че сценада чахсы тудынчалар, туртухпинчалар.
Школанаң, аал чӧбінең пик палғалыстығ тоғынары кибірге кір парған. Пыдырах аал чӧбінең хада «Соох нымах» марығ ікінҷі чылы иртірілче. Анда Наа чылға тура тастын, ибіркізін иң чахсы чазаан аал сӧбірелерін таллапчалар. Пӱӱл сыйыхтығ орыннар Чыланнығ паза Пыдырах аалларның чуртағҷылары алғаннар: 1-ғы орын - Алёна паза Сергей Сульбирековтар, Аркадий паза Татьяна Токояковтар, Дмитрий паза Лиана Кунучаковтар; 2-ҷі орын - Андрей паза Татьяна Тодозаковтар, Лидия паза Роман Сагалаковтар; 3-ҷі орын - Наталья паза Марат Тороковтар, Александр паза Татьяна Тороковтар. Пасха араласчылар таныхтатханнарох.
Марығның спонсорларына алғыстас пічіктері читірілген: идінҷектер Виталий Кулумаевке, Анатолий Мамышевке, Сергей Султрековха, Евгений Тохтобинге, Виктор Челтыгмашевке. Ідӧк аал чӧбінің пазы Семён Боргояков паза «Тигір хурының» устағҷызы Светлана Торокова ахчанаң полысханнар.
Андағ марығлар Наа чыл алнында кізілернің кӧңнілерін чахсы кӧдірчелер. Пызыңнапчатхан гирляндалар, ойнаҷахтар чылда пір ле хати сығарылчалар, тасхар, тізең, уламох сіліг кӧрінче.
Автор :
Тарина БУТОНАЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде