Тоңастығларның 65 % чыыл парды
30.09.2022
Хабарлар
Аал хонии. Хакасияда тоңастығларны чыырынҷа план 65 % толдырыл парған. Ирткен чылнаң тиңнестiрзе, тоңастығларны чыыр тоғыс чапчаң парча
Пылтыр ӱртӱн айының 27-ҷi кӱнiне тоңастығларның 47,5 % чыыл парған. Хай пiрее хоныхтарда гектардаң 25 – 35 центнер сыххан, кӧзiдiмге алза, «Июс-Агро» ООО-да, «Берендей» КФХ-да, «Целинное» ООО-да. Хыра тоғыстарын тузында паза орта толдырғаны мындағ салтарлар пирче: минераллығ удобрениелер чайғаны, ӧзiмнернi хурт-хоостаң паза ағырығлардаң арачылааны. Пӱӱнгi кӱнге республикада 55 муң гектардаң 106 муң тонна тоңастығлар сабыл парған. Пiр гектардаң ортымахти 19,3 центнер сыххан.
Пуғдай 71 % чыыл парған, 35 муң гектардаң 76 муң тонна кизiлген паза сабыл парған. Ирткен чыл пу тусха план 52,4 % толдырыл парған, 21 муң гектардаң 54 муң тонна сабылған. Че пылтыр пуғдайның сығызы чахсы арах полған. Пӱӱл гектардаң 21,9 центнер чыыпчалар, пылтыр 25,6 центнер полған. Таныхтирға кирек, пӱӱл пуғдай таарылған чирнiң улии 8 муңҷа гектарға кӧп.
Пӱӱл ас пiр муңҷа гектарға кӧп таарыл парған. Амғы тусха ол 3,6 муң гектардаң (74 %) чыыл парған, 6 муң гектарда сабыл парған. Аның сығызы – 17 центнер гектардаң.
Хакасияда сула маллар азыраҷаң ӧӧн азых полча. Пӱӱнгi кӱнге 14 муң гектардаң 22 муң тонна сабыл парған. План 54 % толдырыл парған. Суланың сығызы – 16 центнер гектардаң.
Азынада сананыстарҷа, 125 – 130 муң тонна тоңастығлар паза бобовай культуралар чыыл парғаннар. Ирткен чыл 155 муң тонна полған.
ӧзiмнер чыырына килiстiре кӱннер турғаннар. Че пу неделяда кирек пазох алыс парған – киинiң чыылии тӱсче, наңмырлар ӱр чаапчалар, хараа соохталча. Алтынзархы аймахтарда хыраларда тоғыс тохтап парарынаң хорғыс пар.
Республикада iдӧк мал азиин пилетирiнҷе тоғыс узарадылча. Пӱӱнгi кӱнге 158 муң гектардаң от сабыл парған, 155 муң гектардаң чыыл парған, 161 муң азыра тонна пилетел парған. 10 муң гектардаң сенаж сабылған, 45 муң тонна тимде. Алтай, Шира паза Ағбан пилтiрi аймахтарында силос пилетелче. 1,7 муң гектардаң силос сабыл парған, 5,5 муң тонна тимде. Чахсы кӱннер турза, мал азии чарыс айы тооза пилетелер.
Автор :
Алексей Баинов
Пн | Вт | Ср | Чт | Пт | Сб | Вс |
31 | 1 | 2 | 3 | 4 | 5 | 6 |
7 | 8 | 9 | 10 | 11 | 12 | 13 |
14 | 15 | 16 | 17 | 18 | 19 | 20 |
21 | 22 | 23 | 24 | 25 | 26 | 27 |
28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде