ТАРИФТЕР ӦЗІЗІ УЛУҒ ПОЛБАС
20.06.2017
Хабарлар
Хакасияның тарифтерҷе паза энергетикаҷа хазна комитедінің кнезі Марина Пономаренко, чурт инcпекциязының устағҷызыі Максим Виноградов паза «Хакасэнергосбыт» АО-ның садығҷа директоры Дмитрий Обложенко «Пӱӱлгі ікінҷі чарым чылға тарифтер: хайдағ алызығлар Хакасия чуртағҷыларын сағыпчалар» сурығҷа журналисттерге пресс-конференция иртіргеннер.
Россияның законодательствозы хоостыра, прай полызығлар ӱчӱн тӧлеглер сині 1 июльдаң алысчалар. Хайди искірген Марина Пономаренко, 1 июльдаң чурт-коммунальнай полызығларға паза чарытхаа наа тарифтер кирілчелер. Анзы инфляциянаң, инфраструктураны, инженернай сетьтерні нааҷылирға кирек полчатханынаң палғалыстығ. Іди Хакасияны пӱкӱлее алза, коммунальнай полызығлар ӱчӱн тӧлеглер 3,9 процентке ӧс парар. Алынҷа муниципальнай пӱдістерде ол 2,5 процентке теере алызарға айабас. Полған на чуртағҷаа прай тӧлеглерҷе ӧзіс 6,4 %-тең аспас. Пылтыр коммунальнай полызығлар ӱчӱн тӧлеглер ӧзізі 6,9 %-ке тиңнелген, 2015 чылда - 11,4 %-ке.
Тарифтерні хайдағ синнең азыра кӧдірерге чарадылбинчатханын Россияның правительствозы позының чарадиинда кӧзіт салча. Хакасияда андағ синні республиканың пазы турғысча.
Чарытхы ӱчӱн тӧлеглердеңер чоохтаза, электроплиталар турғызылбаан квартиралар ээлеріне пір киловатт чарытхы ӱчӱн тӧлег 1,92 салковайдаң 1,99 салковайға теере ӧс парар. Электроплиталарнаң тузаланчатхан квартираларда тӧлег амғы 1,34 салковайдаң 1,39 салковайға теере ӧс парар.
Максим Виноградовтың чооғынаң, ЖКХ тӧлеглері ӧӧнінде алыспас. Алызығлар соох паза ізіг суғ хорадылчатханын санаҷаң приборлар турғызылған алай турғызылбаан квартиралар ээлеріне ле теелче. Андағ приборлар турғызылған квартира ээзі прибор кӧзітчеткен саннарҷа тӧлир. Санаҷаң прибор турғыспаан квартираларға суғ хорадылчатханын санирға нормативті 1,5 коэффициентнең тузаланып санирлар. Андағ оңдайнаң кізілерні хоратчатхан суғны санаҷаң приборлар турғыстырарға кӱстепчелер.
Кӧп квартиралығ туралардағы прай киректерні ол тураларда тӧстелген халых чӧптері сыныхтағда тутчалар. Устапчатхан чурт компаниялары хомай тоғынчатсалар, чуртағҷыларға чурт инспекциязынзар, прокуратуразар айланарға чарир. Сыныхтағлар иртірілер, устапчатхан компанияларға штраф салылар.
Ідӧк пӱӱлгі 1 январьдаң, полызығлар ӱчӱн тӧлеглерні саба санаан ӱчӱн, ол компанияларға штраф салары кӧріл парған. Андағ саннарнаң чараспинчатсаңар, пічік пазып, санаан компаниязар айланарға кирек. 30 кӱн аразына олар саннарын тӱзетпезелер, чурт инспекциязынзар алай прокуратуразар айланарға кирек. Алҷаас санаан ахча квартира ээзіне айландырылча, ағаа хоза ол ахчаның 50 проценті штраф оңдайынаң квартира ээзіне хоза пирілче. Кӧзідімге, 500 салковайға алҷаас саналған, ол ахча квартира ээзіне прай айландырылча, ағаа хоза 250 салковай штраф оңдайынаң пирілче.
Дмитрий Обложенко чарытхы ӱчӱн тӧлеглер кірбинчеткеннеңер чоох апарған. Хакасияда чарытхы ӱчӱн тӧлеглерҷе алымнар 891 миллион салковайға чит партыр. Пірее компаниялар, алымнарын тӧлебин, устав пічіктерін алыстырып, олох орында пасха компания полыбысчалар. Бюджет организациялары даа алымға кӧп кір парчалар. Чуртағҷыларның алымнары кӧп нимес, 79 миллион на салковай, ол прай алымнарның пис ле проценті.
Чарытхаа тӧлег ӧзерінеңер чоохтаза, пістің регионда чуртағҷыларға пір киловатт чарытхы ӱчӱн тӧлег 3,9 процентке ӧс парар (5-7 ахчаа). «Хакасэнергосбыт» АО тӧлеглерҷе ахчаны кӧмес ӱзӱрлеп алар оңдай пирче. 1 - 10 июльда чарытхы ӱчӱн иргі тарифче тӧлеп саларға чарир. Андағ оңдайнаң тузаланарға 26 июньға теере энергосбыт компаниязынзар чарытхыны санапчатхан приборның ол тустағы кӧзідиин искір пирерге кирек полар.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
27 | 28 | 29 | 30 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы