ПӰДІРЕРГЕ ЧАЙАЛҒАН КІЗІЛЕР
11.08.2017
Хабарлар
ЧИР ӰСТӰНДЕ ЧУРТ САЛЫНҒАННАҢ АЛА КІЗІ ПӰДІРІГНЕҢ АЙҒАСЧА, НЕКЕ. ЧЫЛДАҢ ЧЫЛҒА ПӰДІРІГЛЕР ПӦЗІКТЕҢ ПӦЗІК ПОЛЫП ОДЫРЧАЛАР. АҒБАН ГОРОДТЫ ДАА АЛЗА, 2000 ЧЫЛЛАРДА ГОРОДТА 13 ХАДЫЛЛЫҒ ТУРАЛАР ИҢ ПӦЗІК ПОЛҒАННАР. АМ 16 ХАДЫЛЛЫҒ ТУРА ПАР. ЧЕ ПӰДІРІГҶІЛЕР МЫНДАҒ ПӦЗІКТЕ ТОХТАБИНЧАЛАР, АМДЫ 19 ХАДЫЛЛЫҒ ТУРА ПӰДІРЕРІНЕ ЧАРАДЫҒ АЛЫП АЛҒАННАР.
Піске Дубайдағы алай Шанхайдағы осхас пӧзік-пӧзік тураларзар ам даа ырах. Хакасияда ол даа чох пӱдіріг халғанҷы чылларда ӧткін тиліпче.
Хакасияның пӱдіріг паза чурт-коммунальнай хоных министерствозы искіриинең, республикада чарым чылға 49 муң 158 квадрат метр чурт тимге сығарылған, ол, тізең, 2016 чылның пуох тузының 116,7 % кӧзідиине тиңнелче (андада 42 муң 111 квадрат метр чурт тимге сығарылған). Ол санға ідӧк чирде пӱдірінчеткеннернің чурттары киріл парған. Оларға тимге сығарылған чурттың 48,7 % килісче. Пӱдіріг айныдылчатханнаңар, аннаң айғасчатхан предприятиелер дее, пӱдірігҷі тоғызын таллапчатхан кізілер дее саны чылдаң чылға хозылып одырча.
Пістің пӱӱнгі матырларыбыс Ағбан городтың муниципальнай чурт фондында (МЖФ-та) істенчелер. Олег Сунчугашевнең Алексей Чебодаев - опыттығ тимір хабыстырҷаң устар. 42 частығ Олег Сунчугашев пу тоғыста 15 чыл істен парир, ол санда ікі чыл -МЖФ-та. Ағбанда тӧреен-ӧскен ирен городта 59 № профессиональнай училищені, амғы 6 № лицейні, тоосхан. Чахсы оңдайлар пирчеткен тоғыс орнын тілеп, алында ирен хайда ла істенмеен. Тӧреміл тӧлелчеткен чал ахчазы - хайдағ даа тоғыста ӧӧні неке.
Аның арғызы Алексей Чебодаев городтағы 4 № профессиональнай училищеде ӱгренген. Істеніс чолы - 13чыл - МЖФ-наң на палғалыстығ. Предприятиенің устағ-пастаа тоғысчыны аарлапча, тӧреміл алғыстас пічіктерін читірче. Ирен Улуғ Нонып аалда тӧреен, Хызыл чазыда ӧскен, пӱӱнгі кӱнде сӧбірезінең Ағбанда чуртапча. Кӧп палалығ сӧбірее пу наада тикке чир участогын пиргеннер, 2010 чылда, тізең, компания пӱдіргенӧк турада Чебодаевтер квартира алып алғаннар. Амды наа пӧгіннер - пос туразын пӱдірерге.
Алексейнің чооғынаң, пӱдіріг предприятиезі тоғынҷыларына толдыра «социальнай пакет» пирче: отпусктар, больничнай листтер. Пӱӱнгі кӱнде пӱдірігде чахсы тоғыс оңдайларын тӧстепчеткен компанияларны таап аларға сидік, піреезі, тізең, тоғынҷыларнаң чӧптезіг дее итпинче. Аннаңар ізестіг компанияда чиит тоғынҷылар даа тудылчалар. Ол санда Николай Топоевнең Антон Сибиреков. Монтажник ооллар МЖФ-та ӱс чыл тоғын салдылар. Николай Топоевтің тӧреен-ӧскен чирі - Полтах аал, Антон Сибирековтың - Райков.
Иреннер кӧп квартиралығ тура пӱдірчелер. Пӱӱнгі кӱнде пастағы теестегі тоғыстар тоғызынҷы хадылда хайнапча, ікінҷі теестегі - ӱзінҷі-тӧртінҷі хадылында. Тимір хабыстырҷаңнар тураның ӧӧн чардыхтарын піріктірчелер, оларның сооларынҷа кірпис салчатханнар тоғынчалар. Алтында, тізең, Николайнаң Антон колонналарны ӱстӱнзер кӧдірерге тимнепчелер, кранға хаптырчалар.
Пӱдірігҷілерні махтапча звено устағҷызы Николай Зеленин. Аның сӧстерінең, тимір хабыстырҷаңнарның ікізі дее пизінҷі разрядтығлар. Аннаң пӧзік - алтынҷы ла разряд, иң аарлығ специалисттер газ паза нефть трубаларынаң тоғынчалар. Устағҷының искіриинең, пӱдіріг орнында ікі звенода чибіргілер кізі тоғынча. Пӱдіріг предприятиезі городта олған садтарын паза «Ағбан» спорткомплексті пӱдірген. 2015 чылның апрельіндегі ӧрттерде чурт чох халғаннарға туралар пӱдірерінде араласханох. Позы Николай Зеленин пӱдіріг предприятиезінде 2008 чылдаң сығара істенче. Аның специальнозы - сталь паза тимір - бетон конструкцияларының монтажнигі. Ирткен чылда ирен Хакасия правительствозының Аарластығ пічиин алған. Ағаа ол Ағбан городта «Варенька» олған садын пӱдіреріне туза ағылған ӱчӱн турысхан.
Хакасияда кӧп квартиралығ тураларның пӱдірии киректелчеткенін республикада ипотека чахсы пирілчеткені киречілепче. Хакасияның национальнай банкының искіриинең, 2017 чылның пастағы пис айына аймах банктар чуртағҷыларға тиксі 1 миллиард 684 миллион 700 муң салковайға 1 муң 212 ипотека кредидін пир салғаннар. Ирткен чылның пуох тузындағы кӧзідігдең 19,5 % кӧп. Ағаа хоза, процент ставказының тӱсчеткені таныхталча. Пӱӱл аның ортымах сині - 11,7 %. Сағынчам, чуртағҷыларның ипотека ал полчатханы пӱдіріг предприятиелерінің тоғызын хай-хай нииктепче. Пӱдірігҷілернің, тізең, тоғызы пар.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
27 | 28 | 29 | 30 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде