ПІСТІҢНЕРНІҢ УЛУҒ МАРЫҒЛАРДАҒЫ ЧИҢІЗІ
09.11.2018
Хабарлар
Мария ТЮМЕРЕКОВА олаңай кӱресче тиксі Россия марығларында чиңіс тутхан. Аның алнында тренері В.Г.ЧУЧУНОВ турча
Спорт. Хакасияның оол-хыстары, аймах спорт кӧрімнері марығларында аралазып, сыйыхтығ орыннарға турысханнар.
Хызылчарда 24 ноябрьда олаңай кӱресче XIV чоннар аразындағы саарбахтар турнирі ирткен. Спортсменнер Россияның саблығ спорт узы, Олимп ойыннарының ӱс хати чемпионы Бувайсар Сайтиевтің сыйыхтарына марығласханнар.
Марығда Казахстанның, Таджикистанның, Грузияның, Киргизияның паза Россияның 13 субъектінің ооллары араласханнар.
255 кӱресчі аразынаң 10 кӧдірімде иң кӱстіглері ілезіне сығарылған. Кибірге кір парған оңдайҷа турнир араласчыларына кӧзідіг ирткен. Андар Бувайсар Сайтиевтің, аның тренерлерінің паза марығлар тузында иділген сомнар сығарылғаннар.
Хакасияның спортсмені Владимир Челтыгмашев 62 кг теере кӧдірімде кӱмӱс медальға турысхан, Михаил Кулагашев 68 кг теере кӧдірімде хола медальны утхан. Олар В.И.Чарковтың адынаң олимп резерві спорт школазында тренер Лилия Каскаракованын холында тимненчелер.
Выборг городта 3 - 5 ноябрьда 20 часха паза 17 часха читкелек хыстар аразында олаңай кӱресче тиксі Россия марығлары ирткеннер. Анда Россияның 44 субъектінең 350 спортсмен араласхан.
Марығ салтарлары: 17 часха читкелектер аразында Мария Тюмерекова (53 кг) чиңіс тутхан, Елизавета Вихарева (76 кг) паза Дарья Чебодаева (53 кг) ӱзінҷі орынға турысханнар.
20 часха читкелек хыстар аразында: Дарья Токоякова (58 кг) алтын медальны холға кирген, Валерия Мистрикова (62 кг) паза Наталья Пудова (46 кг) - ӱзінҷі орындалар, Алёна Сагалакова (43 кг) паза Алина Пахтаева (46 кг) пизінҷі орынға сыхханнар.
Марығ салтарларынҷа 1 - 5 орыннардағы спортсменнер Россияның піріктірілген командазына кирілчелер.
Ідӧк 30 октябрьдаң 3 ноябрьға теере Новосибирскте боксча СССР-ның спорт узы Дмитрий Пановтың хумартхызына чарыдылған XVII тиксі Россия марығлары ирткеннер.
Хакасия ӱчӱн пис спортсмен турысхан. 81 килограммға теере кӧдірімде Ағбандағы ДЮСШ-тың ӱгренҷізі Евгений Чочиев Новосибирск спортсмені Роман Рассоловты ізестіг чиңен. Республиканың кӱрезіглер СШОР-ның ӱгренҷізі Сергей Слобадян олох кӧдірімде хола медальға турысхан.
Автор :
Валерия БЫВШИХ
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде