ИНСУЛЬТТАҢАР - ЧАРЫДА
30.07.2019
Хабарлар
Чӧрім. Ағбандағы 3 № троллейбус маршрудында «Хазых рейсі» чӧрім ирткен.
Имнег профилактика кінінің имҷілері А.В.ДОМАНОВА паза К.Е.АНАНЬЕВА
Тиксі чир ӱстӱнде инсульт пол парған кізілернің саны полған на сай ӧсче. Халғанӌы чылларда чиит улустың даа инсульт пол парчатханы кӧп таныхталча. Аннаңар имӌілер ол ағырығдаңар паза, аны тузында сизініп, кізее табырах полызығ пирердеңер удаа чоохтапчалар. 3 № троллейбуста республикадағы имнег профилактика кінінің имӌілері паза Хакас хазна университедінің студенттері ідӧк профилактика тоғызын апарғаннар.
Имнег профилактика кінінің имӌі методизі Алла Доманова ағырығдаңар чоохтаан:
- Кізінің миистегі хан ойлазы сайбалғаны кізі хазиина улуғ ӱрег ағылча. Инсульт пол парып, піреезінің азах-холлары тоғынминыбысча, хайзының-да тамах сиирлері тарт парча, ол чиисті азыр полбинча. Олар кинек пол парчалар. Иң чобағлығ, хаҷан кізее тузында полызарға маңнанмин халза, инсульт соонаң чуртастары ӱзілчетсе. Че тузында имнег полызии пирілген кізее табырах чазылар паза азахха турып алар оңдай пар.
Троллейбустың пассажирлері Алла Домановаа сағыссыратчатхан сурығларын пиргеннер. Имӌі оларға нандырығлар пирген. Хакас хазна университедінің студенттері Анастасия Тихонович паза Марина Закирова, волонтёрлар полып, кізілерге хазыхтаңар газета паза инсульт ағырығдаңар пазылған листовкалар ӱлееннер.
- Инсульт пол парза, кізінің чуртазын ал халарына имҷілернің 4,5 час ла пар. Аннаңар сах андох табырах имнег полызиин хығыртарға киректелче. Инсультты піліп алар ӱчӱн, аның пілдіріглерін пілерге кирек. Кізінің холы чахсы хыймырабиныбысса, чооғы сайбалыбысса - ол инсульт. Имҷілерзер табырах айланғаны кізінің хазиин паза чуртазын ал халарына ізеніс пар, - чарытхан профилактика кінінің фельдшері Каролина Ананьева.
Республикадағы имнег профилактика кінінің имӌілері, троллейбуста чӧріп, кізілерге ағырығдаңар кӧп тузалығ чӧптер пиргеннер: инсульттың пастағы пілдіріглерінеңер, ағырыбыспас ӱчӱн, ниме идерге кирек, инсульт пол парған кізее хайдағ пастағы полызығ пирердеңер. Паза постың хан пӧзиин сыныхтағда тударға кирек, ол 130/80 мм рт.ст пӧзік кӧдірілбеске кирек. Тустығ, хаарған чиистер удаа чібин турарға, араға іспин, тамкы тартпин, хазых чуртас оңдайын апарарға кӱстенерге. Ағаа хоза, хыймыранып, тузалығ тынанарға паза спортнаң айғазарға хайди даа кирек. Ідӧк имӌілер диспансеризацияны сыбыра иртерге кирек тіп таныхтааннар. Ол сыныхтағлар соонаң кізілернің аймах-пасха ағырығлар ілезіне сығыс парчалар.
Троллейбустағы кізілер имӌілерні ситкіп искеннер. Хай піреезі, «Хазых рейсі» поларын Интернетте хығырып, ӧнетін ол туста тохтағда турып, 3 № троллейбусты сахтаптыр.
- Мин инсульттаңар имҷілернің лекцияларын истіп аларға пу троллейбусха ӧнетін одырғам. Мағаа пір дее чирзер парарға киректелбинчеткен (кӱлімзірепче. - Авт.). Хазиимны сыныхтағда тутчам, орта чиистеңер паза чуртас оңдайынаңар піліп алар ӱчӱн пеер одырғам, - чоохтаан тынағдағы Светлана Николаевна Алёшина.
Автор :
Наталья ТЮКПЕЕВА
Пн | Вт | Ср | Чт | Пт | Сб | Вс |
25 | 26 | 27 | 28 | 29 | 30 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде