ӦӦНІ - КІЗЕЕ ПОЛЫЗАРЫ
27.11.2019
Хабарлар
Донорлар - аарласта. Пу наада Ағбандағы чииттер ӧргезінде «Россияның аарластығ доноры» атха турысхан кізілерні чеестееннер
Амғы туста прайзы даа пілче, кізі чуртазын ал халар ӱчӱн, пос кӧңнінең ханын пирчеткен кізіні донор тіп адапчалар. «Россияның аарластығ доноры» атха турысча андағ кізі, хайзы ханны 40 паза аннаң даа кӧп хатап пир салған. Пӱӱл республикада андағ аарластығ атха 15 кізі турысхан. Оларға, имнег киреене андағ махтағлығ паза тузалығ хабазығ итчеткеннеңер, Хакасияның хазых хайраллачаң министрінің пастағы орынчызы Александр Стреленко паза хан кінінің ӧӧн имчізі Геннадий Русаков, алғыстап, танығлығ сыйых читіргеннер. Ідӧк кӧрігҷілерге «Ӧңніг тӱстер» студияның олғаннары концерт кӧзіткеннер. Хан кінінің удаа спонсоры полчатхан «Малинники» ООО-ның кізізі аарластығ донорларға тадылығ сыйыхтар читірген.
Аарластығ атха турысханнарны алғыстап, чоох тутхан Александр Стреленко:
- «Россияның аарластығ доноры» атха турысханынаң алғыстапчам. Сірер, имҷілерӧк чіли, кізілер чуртазын ал халарына улуғ хозым итчезер. Сірерні пірдеезі кӱстебинче, че кізі чуртазын ал халар ӱчӱн, пос кӧңнінең ханыңарны пирчезер. Аннаңар піс, имӌілер, паза сірер коллегалар полчабыс тиирге чарир. Мин имчі-анестезиолог полчам. Хакасияда пос кӧңнінең ханны сыбыра 7 муң азыра чуртағӌы пирче. Пӱӱнгі кӱнде чир-суубыста «Россияның аарластығ доноры» атха ікі муңӌа чуртағӌы турысхан.
Иң ӧткін донорларға, ханын 40 хати пиргеннеңер, «Россиянын аарластығ доноры» удостоверение паза аарластығ танығны Хакас Республиканың хан кінінің ӧӧн имҷізі Геннадий Русаков читірген. Ол аарластығ атха турысхан донорларны, тың ағырчатхан кізілерге ханын пиріп, полысчатхан ӱчӱн алғыстаан. Аның таниинаң, 20І4-2015 чылларда республиканың хан кінінзер «Хазых хайраллирын тилідері» хазна программазы хоостыра киректелчеткен оборудование толдыразынаң алылған. Амғы тустағы оборудование имчілернің тоғызын хай-хай нииктепче. Геннадий Николаевичтің чооғынаң, республиканың хан кіні имнег учреждениелерінің чахығлары хоостыра тоғынча. Донорларны имнег учреждениелеріне хайдағ группалығ хан киректелчеткенін санға алып таллапчалар, анзы тӧӧй группалығ хан кӧп пол парбас ӱчӱн иділче. Ханны сыбыра пирчеткен донорлардаңар искіріглер ідӧк кінде чыылча. Хаҷан удаа тоғаспинчатхан алай ба кӧп хан киректелзе, ол ӧткін донорларны хан пирерге хығырчалар. Таныхтирға кирек, донор ханын ӧӧнінде кізее полыс пирер кӧңнінең пирче. «Россияның аарластығ доноры» атха турысхан кізее хай пірее хазна хабазығлары кӧрілче.
Таныхтирға кирек, аарласха турысхан донорларның аразында Хакасияның хазых хайраллачаң министерствозы Георгий Шапошниковты грамотанаң таныхтаан. ХакНИИЯЛИ -ның улуғ наука тоғынҷызы Георгий Михайлович «Россияның аарластығ доноры» атха ікінҷізін турысча тиирге чарир. Пілдістіг, удостоверение паза аарластығ танығ ікінҷізін пирілбинче, че андағ махтағлығ кізіні чеестирге ӧнетін хығырғаннар. Пастағызын на ханны 55 частығда пирген, амды ол 72 час толдыр салған. Тиксі пос кӧңнінең 82 хатап хан пирген.
- Иң пастағызын ханымны пирерге олаңай ла парғам, тимненмин дее. Че анаң сыбыра чӧр сыххам. Сизінмин дее халғам, ханымны сыбыра пирерге тартыл чӧрібіскем, - хормачыланып чоохтаан Георгий Михайлович.
Хакасияда аарластығ паза ӧткін донорлар кӧп, анзы ӧріндірче. Чир-суғҷыларыбыстың кізі чуртазын ал халарына ханны пирчеткені махтағлығ. Алғыс ползын оларға.
Автор :
Наталья ТЮКПЕЕВА
Пн | Вт | Ср | Чт | Пт | Сб | Вс |
25 | 26 | 27 | 28 | 29 | 30 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 31 | 1 | 2 | 3 | 4 | 5 |
Кӱн таңмазы