ААЛҶЫНЫ УЛУҒЛАП ПІЛЧЕЛЕР
10.12.2019
Хабарлар
Волейбол. Хакасияның ӱгредіг паза наука министрінің орынӌызы Юрий Гаврилович Сагалаков пу наада Казахстаннаң айланды. Ол анда чоннар аразындағы марығда араласхан
Туваның волейбол федерациязының президенті Чингис Каминов позынзар сығдыратханда, Юрий Гаврилович хахап парған. Ол аны Казахстанда иртер чоннар аразындағы турнирде аралазарға хығырғанда, уламох тың чапсаан.
- Казахстанның Талды-Курган облазында волейболҷа спорт ветераннары аразында улуғ турнир пастағызын на иртірілбинчеткен осхас. Анда аралазарға хығырчалар. Тува, Хакасия паза Хызылчар крайы пір команда тӧстеп аларға кирек, - чарыда чоохтап пирген Чингис Каминов.
Анаң мындағ чӧпнең ӱлескен: Тувадаң паза Хакасиядаң ікілер кізі, Хызылчар крайынаң ӱс кізі алып аларға. Іди чарат салғаннар.
- Хакасиядаң ікінҷізі кем парған? - сурчам.
- Сергей Зацепинні хада алып аларға чарадыбысхам. Ол «Европа» садығ кінінде администратор полча. Волейбол ойнирға тың хынча, марығларда араласча, - нандырча Юрий Гаврилович.
Талды-Курганда иртірілчеткен чоннар аразындағы марығ «Читі суғның Кубогы ӱчӱн» адалчаттыр. Анда пӱӱл 8 команда араластыр: Монголия, Киргизия, Узбекистан, Тува, Бурятия, Татарстан, Оренбург город. Казахстан ӱчӱн марығ ээлері турыстырлар. Пірдең, оларның команда капитаны - Талды-Курган облазының пазы Амандык Баталов.
Марығ марығнаң, че прайзы даа мындағ нимее хайығ айландыртырлар: орындағы чуртағҷылар аалҷыларны улуғлап пілчелер. Анзы чӱрекке истіг полған осхас. Ағаа хоза, мындағ кӧзідім чапсытханын чазырбиндырлар: волейболҷа марығлар иртірерге улуғ спорт ӧргезі пӱдірілтір. Ол «Жастар» адалча. Ӱс муң кізее орыннығ. Ӱс кӱн ирткен марығны кӧрерге чон кӧп чыылыс туртыр. Че марығ ээлері ойнапчатса, спортзалға кӧрігҷілер сыыспинчатханға тӧӧй пілдірҷең осхас. Матап хысхырысчалар, полған на утып алған санға оңнығ ӧрініспинчелер.
- Кӱнӧрте волейбол ойнапчабыс, иирде Чоннар аразындағы ынархас кӱннерінде араласчабыс. Чазырбаспын, саңай хайхастығ ойыннар турғызылғаннар. Казахстанның прай даа саблығ «чылтыстары» анда араласханнар. Чиистің аймағынаң сыйлап турғаннарын махтирға кирек, - чоохтапча Юрий Гаврилович, ойыннар тузындағы сомнарны кӧзітчеткен аразында.
Чоннар аразындағы ынархас иирлері тузында ол чоох туттыр. Саңай пос тілінең чоохтанған даа полза, казахтар аны прай чахсы оңардыбыс теен осхастар. Хакасияның ӱгредіг паза наука министрінің орынҷызы Талды-Курган облазының пазына Владислав Торосовтың «Хакас чонның киктезі» чыындызын паза Ағбандағы национальнай школа-гимназияның ӱгретчізі Андрей Мамышев ағаста кирткен хоосты сыйлаптыр. Кӧрген ползаңар пастыхтың ӧрінізін. Владислав Михайлович хайдағ чыынды пас салғанын тыыда хығыр пиріп, кӧксіне чаба тудыбыстыр, пу минің кӱннің сай тузаланҷаң киндем полар тіп ізендір салтыр Амандык Габбасович.
Амды чоннар аразындағы арға-мӧрій хайди парғаннаңар. Анда араласчатхан командалар ікі подгруппаа чарылтыр. Полғанында ла тӧртер команда. Туваның піріктірілген командазы, марығ ээлеріне ле утырып, ікінҷі орында пол парған. Сыйыхтығ орыннар хайди ӱлестірілерін піліп алар ӱчӱн, пістіңнерге Татарстанның командазынаң ойнирға кирек. Таныхтирға чарир, татарларның уғаа чахсы команда. Олар, хазнабыстың «Динамо» спорт пірігізі ӱчӱн ойнап, Россия чемпионы полыбыстырлар. Анаң МЧС ӱчӱн ойнап, тилекей чемпионадында чиңіс тутхан осхастар. Андағы волейболисттер прайзы даа, теедег, чоннар аразындағы класстығ спорт устары. Пістіңнернің, тізең, разрядтары даа чоғыл тиирге чарир.
- Андағ даа полза, піс оларны 2:1 саннаң утып алғабыс. Хайди тың тарындылар. Че ӱзінҷі орыннаң пӧзік кӧдіріл полбааннар, - чоохтапча Юрий Сагалаков.
Чиңісчілерге сыйыхха 1 млн тенге пирілтір, 2 орын алған командаа - 700 муң тенге, 3 орындағыларға - 500 муң тенге. Амды Талды-Курган облазының пазы, Казахстанның волейбол федерациязының президенті Амандык Баталов 2020 чылдаң сығара пу чоннар аразындағы турнирні тӱрк тілліг хазналар аразындағы спорт ветераннарының чемпионадына айландыр саларға пӧгін тутчатхан осхас. Хакасияның командазын анда аралазарға хығыр салтыр.
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
25 | 26 | 27 | 28 | 29 | 30 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде