«МИНІҢ БИЗНЕЗІМ» ИДӀНӋЕКТЕРГЕ ХАБАЗАР
20.12.2019
Хабарлар
Пос кирее. Пу неделяда Хакасияның кічіг паза ортын бизнеснең айғасчатханнарның танығлығ кирек полған. Ағбанда «Минің бизнезім» кін азылды
Россияның регионнарында 2019 чылдаң пасти «Кічіг паза ортын пос кирее паза идінңектің пастаана хабазары» нацпроект хоостыра «Минің бизнезім» кіннер тоғынып пастапча. Амғы туста 50 азыра кін тоғынча. 2024 чылға теере улуғ городтарда 100 азыра мындағ кін азыл парарға кирек. Пу неделяда «Минің бизнезім» кін ідӧк Хакасияда тоғынып пастады. Ол Ағбанда Чоннар ынархазы ораманың 2а туразында орныхча. Аны пайрамни азарында Хакасия пазы Валентин Коновалов, аның орынҷылары, министрлер паза идінҷектер араласханнар.
- Мындағ кін азыл парғанда, идінҷектер рыноктаң парбазына ізеніс пар. Олар пос киреен, чаппин, алғыдып одырзыннар. Кічіг паза ортын бизнеснең айғасчатханнарның саны хозылза, республиканың экономиказы даа алнынзар тилир паза тоғыс орыннары азылар, - чооғында таныхтаан Валентин Олегович.
Идінҷектернің чидіглерінеңер паза сидіксіністерінеңер Хакасияның пос киреенең айғасчатханнарның праволарын арачылирынҷа уполномоченнай Василий Кудашкин чахсы пілче. Аннаңар, Ағбанда идінңектернің тоғызын нииктепчеткен кін азыл парғанда, ол пос киреенең айғасчатханнарның адынаң Хакасия правительствозын чылығ алғыстаан.
- Пӱӱл 12 февральда Хакасия пазы Валентин Олегович республикада пос киреенең айғасчатханнарнаң тоғасхан. Пу тустаң пасти идінҷектерге хабазар тоғыс чахсы пар сыххан. Пу чылдаң оларға тӧбін проценттіг кредит аларға, асхынах налог тӧлирге паза даа пасха полызығлығ тоғыс иділген, амды, тізең, «Минің бизнезім» кін азыл парды. Ікінҷілебинчем, ол республикада пос киреен апарчатханнарға туза ағылар, - теен Василий Владимирович.
«Минің бизнезім» кіннің ӧӧн пӧгіні идінҷектерге алай ба пос киреен азарға сағынчатханнарға хабазары полча. Ідӧк ол «пір кӧзенек» оңдайынңа тоғынар. Ниме ол таныхтапча? Кінзер айланған кізее анда прай сурығларын пӧгіп аларға оңдай пар. Андағы специалисттер хайдағ даа сурығҷа полыс пирерге тимделер. Хайди чоохтапча кіннің тоғынҷызы Ольга Ивандаева, кін азылар алнында специалисттернең дее илееде тимнегліг тоғыс апарылған.
- Піссер айланар идінҷектерге прай саринаң полыс пирер ӱчӱн, піс позыбыс пілістіг поларға кирекпіс. Аннаңар кіннің специалисттері квалификацияларын сыбыра кӧдіріп одырғаннар. Тоғыс пасталыбысхан даа полза, піс аймах курстарға чӧр турарбыс. Мында піс пос киреен азарға алай ба чабарға сағынчатхан кізілерге полызарбыс, хайдағ пічіктер чыырға чоохтирбыс. Идінҷекке юрист алай ба бухгалтер полызии кирек полза, пістің ағаа хабазар оңдай парох. Прай пічіктер, тимнеп, пир турарбыс. Аның алнында оларға хазнани нимес аймах кіннерзер ахча тӧлеп пічіктер тимнеттірерге кирек полған, - чарытча «Минің бизнезім» кіннің специализі Ольга Ивандаева.
Ағаа хоза кінзер айланған идінҷектерге Роспотребнадзорзар, МЧС-сар паза даа пасха сыныхтағ органнарынзар чӧрерге кирек чох полар. «Минің бизнезім» кіннің специалисттері Интернет пастыра постары оларзар пічіктер ыс турарлар паза нандыра алып ал турарлар.
«Минің бизнезім» кін орныхчатхан турада ідӧк Хакасияның тиліс, гарантия чыындылары, экспортха хабазығ кіні орныхчалар. Аның алнында олар Ағбанның аймах пулуңнарында орныхчаңнар, аннаңар идінҷектер, оларҷа чӧріп, илееде тус хоратчаңнар.
Автор :
Оксана ИВАНДАЕВА
Пн | Вт | Ср | Чт | Пт | Сб | Вс |
25 | 26 | 27 | 28 | 29 | 30 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 31 | 1 | 2 | 3 | 4 | 5 |
Кӱн таңмазы