ХАҶАН ТОЙЛАР ИРТІРЕРГЕ ЧАРАДЫЛАР?
04.08.2021
Хабарлар
Кӧні эфир. 2 августта Хакасия пазы Валентин Коновалов социальнай сетьтерҷе кӧні эфир пастыра чуртағӌыларның сурығларына нандырған
Хакасияда эпидемиология кирее хайди иртчеткеннеңер искірген соонаң Валентин Олегович кибірли аның социальнай сетьтерінзер кірчеткен сурығларға наңдырған. Олар ӧӧніңде хаталчалар. Иң удаа пирілчеткен сурығ - ол вакцинаның тузазы. Хайди полған на кӧні палғалыста нандырча регион пазы, прививка кізіні ағырығдаң 100 процентке арачылап полбас, че, кізі коронавируснаң ағырыбысса даа, ол хай-хай ниик паза табырах чазылар.
- Ағбанда пӱдірілчеткен радиология корпузы хачан тимге сых парар?
- Радиология корпузы чыл тоозылғанӌа пӱдіріл парарға кирек. Іди полза, 2022 чылдаң ол пастағы пациенттерні имнеп сығар. Пӱдіріг тоғыстары график хоостыра парча. Подрядчик ізестіг, сығысчатхан сидіксіністерні тузында пӧкче.
- Ковид имнег учреждениелерінде кислородтар чидіспинчеткені сын ма?
- Хакасияда чуғынӌах ағырығны хаптырғаннарның саны кинетін ӧс сыхханда, кислород сынап таа асхынах полыбысхан. Че піс республиканың хазых хайраллаӌаң министерствозынаң хада пу сурығны улуғ хайығда тутхабыс, аннаңар имнег учреждениелерінзер кислород тузында читіріл сыххан. Производитель аны, азынада тимнеп, ағыл турӌаң. Ағаа хоза, минің чарадиим хоостыра піс амды кислородты мында, Хакасияда, сығар турарбыс. Іди ковид кіннерінде кислород чидіспинчеткенінең сидіксініс паза сығыспас.
- Ремишевскаяның адынау хирургия корпузы хаҷан хатап тоғынып пастир?
- Корпусты азарға ам даа ирте. Анда коронавируснаң ағырчатханнар имненчелер нооза. Республикада эпидемиология кирее чахсылан сыхса ла, піс ковидке пирілген имнег учреждениелерін хатап айландырарбыс паза пландағы имнег полызиин пиріп пастирбыс.
- Коронавируснаң ағырчатханнарға имнер тикке пирілче бе?
- Имнег туразында даа, ибде дее чуғынӌах ағырығдаң имненчеткеннерге имнер тикке пирілер. 2 августха тиксі 22 муң азыра комплект позыдылған. Ідӧк ӱр ниместе республиказар «Спутник Лайт» вакцина читкен. Ол ідӧк тикке пирілче. Пу вакцина ӧӧнінде коронавируснаң ағырған чуртағӌыларға турғызылча.
- Той-пайларны иртірерге хаҷан чарадылар?
- Амды ЗАГС-та регистрация иртірерге чарир. Че кафе-рестораннарда ӱлӱкӱннер иртірерге чарабас. Хаӌан пу хатығластар суурылар? Сағынчам, эпидемиология кирее чахсыланза ла, тойларны алғым таныхтирға чарадылар.
- Ағбан пилтірі аймаандағы Оросительнай аалзар ісчең суғны неделяда пір ле хати ағылчалар. Пу ағырсымнығ сурығны пӧгібізерге хабас пиріңер...
- Пу сурығ хоостыра сірерге тиксі ӧменең муниципалитет пазынзар айланарға кирек. Амды «Арығ суғ» уғаа чахсы программа пар. Аны хоостыра аалда суғ станциязын пӱдіріп аларға чарир.
- Хакасияда локдаун кирілер бе?
- Піс ӱр ниместе наа хатығластар киргебіс. Олар 14 кӱнге кӧріл парғаннар. Аның соонаң кӧрербіс, кирек пе наа хатығластар кирерге алай ба чох. Арса, оларны суурарға кирек полар...
-
Автор :
Оксана СУНЧУГАШЕВА
| Пн | Вт | Ср | Чт | Пт | Сб | Вс |
| 30 | 31 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
