ЧАА ИМҶІЛЕРІН СЫЙЛАП ӰДЕСКЕННЕР
01.09.2021
Хабарлар
Сыйыхтас. Алыңдағы кӱн, 30 августта, Хакасия правительствозы туразында республикада коронавирустаң тоғыр кӱрезерге полысхан чаа имҷілерiн паза чаа специалисттерін сыйыхтааннар
Таныхтирға кирек, пу чайғыда республикада чаа имҷілері 1 ай азыра коронавирус наа чуғынҷах ағырығдаң тоғыр кӱрезерге полысханнар. Олар пеер 7 июльда чиде салғаннар, анаң пазағы кӱнінде нинҷе-де имнег туразында чаа имҷілері чуртағҷыларға имнег полызиин пиріп пастааннар. Центральнай чаа округының специалисттері іди тоғынғаннар республиканың имнег туразында, Харатаста А.И.Лебедьтің адынаң реабилитация кінінде паза олох городтағы аймахтар аразындағы имнег туразында, пала тапчаң турада. Ідӧк чаа госпитальының мобильнай пунктында, Ағбанның ӧӧн площадьында орнығып, чуртағҷыларға коронавирустаң тоғыр вакцинация иртіргеннер. Анда 3 муң азыра кізее COVID-19 ағырығдаң тоғыр прививка турғызылған.
Россияның арачыланыс министерствозы, хазна президентінің чарадии хоостыра, республикадағыларның айланызы соонаң Хакасиязар Центральнай чаа округының (ЦВО) соединениелернің пірсінің мобильнай госпитальын Челябинск облазынаң ысхан. Іди пістің регионда ЦВО-ның алты имҷізі паза аннаң пасхазы чаа медицина службазының специалисттері корона-вирустаң тоғыр кӱрезерге полысханнар.
Пу неделяда олар республикада тоғыстарын тоос салғаннарында, ЦВО-ның тоғынҷыларын Хакасия правительствозының алғыстас пічиинең таныхтааннар. Хакасияда наа чуғынчах ағырығдаң тоғыр кӱрезерге хабасхан ӱчӱн 20 чаа специализі сыйыхха турысхан, ол санда - ЦВО-ның 90-ҷы танктар дивизиязының 26-ҷы алынҷа имнег батальонының командирі, имнег службазының подполковнигі Дмитрий Щукин паза алты чаа имҷізі: Анастасия Костянова, Дмитрий Осинцев, Эсед Казиахмедов, Тамирлан Гаджиев, Наталья Михно, Надежда Колдакова. Ідӧк сыйыхтатхан Ағбандағы имнег туразының ӱс тоғынҷызы: имҷілер Юлия Дорофееванаң Мария Игнатенко паза медсестра Юлия Топакова.
Оларға сыйыхтар читірер алнында, Хакасия пазы Валентин Коновалов республикаа сидік туста хабас пирген ӱчӱн чылығ сӧстер чоохтап, хазнаның арачыланыс министерствозына, чаа имҷілеріне паза имнег тоғынҷыларына алғызын читірген. Ол чооғында таныхтаан:
- Сірер республикаа иң сидік туста сынап чахсы полыс пирдіңер. Полызығны тың кирексіпчеткен тустарда пір ле хати полыспаазар. Іди армия ікі чыл изере чӧлег пол пирді. Піс аның ӱчӱн сірерге тоозылбас-парбас алғызыбыс читірчебіс. Алғыс ползын кӱзіңер, профессионализм, кӱстенізіңер ӱчӱн, пірге паза чапчаң тоғыс ӱчӱн Хада піс улуғ кӱс полчабыс, улам на хаҷан пістің ізестіг армия парда.
Пик хазыхтығ полыңар паза сірерге тоозылбас-парбас кӱс, часкалығ чуртас, сӧбіреде пілізіп чуртирға алғапчам.
Хакасия пазының холынаң сыйых алған соонаң Дмитрий Щукин, чоох тударға сурынып, регионның хазых хайраллирында тоғынар оңдай пирген ӱчӱн алғызын читірген. Пастағы туста гражданскай чоннаң тоғынарға оой полбаан теен. «Пістің тоғызыбыс сірерге дее, хазых министерствозына паза республика чуртағҷыларына даа тузалығ полған полар тіп санапчам», - таныхтаан ол. Анаң Дмитрий Александрович республика пазы Валентин Коноваловха чаа госпитальының тоғызына чарыдылған альбомны сыйлап пирген паза чааҷылар адынаң алғыстас пічиин читірген. Паза ол андағ пічікнең таныхтаан регион пазының орынҷызы Ольга Пономареваны, республиканың хазых хайраллаҷаң министерствозындағыларны, имнег тураларының устағҷыларын, оларнаң хада тоғынған имҷілерні паза пасхазын даа.
Пу тоғазыға тулуптығ килген чаа специалисттеріне алғызын читіріп, Ольга Пономарева оларны Хакасиязар паза піди тоғынарға килбеңер, че пеер тынанарға ла кил турыңар алай чуртирға саңай кӧс киліңер тіп, ааллап хығырған. Мында сірерге имнег учреждениелерінде чахсы тоғыс таа табылар паза чурт таа пирілер тіп ізендірген. Пасха чооғында чааҷыларны, Хакасиязар киліп, тоғысты чапчаң пастаан ӱчӱн махтаан. Тоғазығның халғанҷызынзар пеер чыылысхан улус хада сомға суурынғаннар.
Хайди чоохтаан Ағбандағы имнег туразының имҷізі Юлия Дорофеева, чаа имҷілері - уғаа чахсы пілістіг специалисттер. Пӱӱл чайғызын коронавирус тымозы тузында Ағбанның имнег туразының алынҷа пӧлии тӧстелген. Ол коронавируснаң ағырыбысханнарны имниріне кӧстелген. Аның устағҷызына Юлия Дорофеева турғызылған. Пу пӧлік Харатаста А.И.Лебедьтің адынаң профилакторийде орныххан. Анда Ағбандағы имҷілер 6 чаа имҷізінең пірге тоғынғаннар.
- Олардаңар чахсы ла сағыстар халған. Тоғыс таа уғаа маңат апарылған. Чоохтирға кирек, чаа имҷілері Хакасияда пӱӱл пастағызын на гражданскай медицинадағылар чіли істенділер. Мындағ тоғыс оңдайына олар табырах кӧнігіп алғаннар. Пу кӱнде оларның полызиинаң пістің пӧлікте 239 пациент хазыхтанып алған, - сағыстарынаң ӱлезіп, чоохтаан имҷі.
Автор :
Инора БОРГОЯКОВА
| Пн | Вт | Ср | Чт | Пт | Сб | Вс |
| 28 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде
