НАА ШКОЛАДА - ХАКАС КЛАЗЫ
03.09.2021
Хабарлар
Піліс кӱнінде. 1 сентябрьда, Піліс кӱнінде, Хакасияда ӱс наа школа тоғынып пастады - Ағбан пилтірі аймаандағы Чапаев паза Шира аймаандағы Наа чир аалларда паза Ағбанда. Халғанҷызында ідӧк хакас клазы азылды!
1 СЕНТЯБРЬДА 2021 ЧЫЛДА АҒБАНДАҒЫ 31№ ШКОЛАНЫҢ ТАРХЫНЫ ПАСТАЛДЫ. ПУ КӰНДЕ ОЛ ПАСТАҒЫ ӰГРЕНҶІЛЕРГЕ, ӰГРЕТЧІЛЕРГЕ ПАЗА ӀҶЕ-ПАБАЛАРҒА ІЗИИН АСХАН. ПУ ӰГРЕДІГ ОРГАНИЗАЦИЯЗЫ АҒБАННЫҢ НАА МИКРОРАЙОНЫНДА «ӰГРЕД НАЦИОНАЛЬНАЙ ПРОЕКТ ХООСТЫРА ПӰДІРІЛГЕН. АНЫҢ ПАСТАҒЫ ӦРГЕНІН 2019 ЧЫЛДА 31 МАЙДА АҒБАН ГОРОД ПАЗЫ ПОЛҒАН НИКОЛАЙ БУЛАКИННЕҢ ХАКАСИЯ ПАЗЫ ВАЛЕНТИН КОНОВАЛОВ САПХАННАР.
Андадох проект республикада ин улуғ поларға кирек полған, че соонаң андар алызығлар кирілгеннер. Амды пу школаның проекті лицей осхас. Школа улуғ, истіг, чарых... Наа оборудованиезінең, техниказынаң паза истіг оңдайларынаң ол хазнаның ин чахсы школаларының санында полча! Анда спортнаң, чайаачы кирекнең, науканаң
айғазарына прай ондайлар тимнелген.
Школада наа ӧме тӧстелген. 50 ӱгретчінің кӧбізі - чииттер. Уламох ӧріністіг, хаҷан мындағ морсымнығ ӱгредіг организациязында хакас клазы азылғанда. 1 «Е» класста 16 олған ӱгренче. Пасталығ класстар ӱгретчізі Александра Кольчикова полча. Ол алында Асхыстағы лицей-интернатта 10 чыл істен салған полған. Чуртас алызығлары хоостыра сӧбірее городсар кӧзерге киліскен, мында, тізең, ағаа килістіре тоғыс табылған.
- Городтағы хайдағ даа школа аалдағызынаң артых полча, че наа, улуғ паза мындағ оборудованиеліг ӱгредіг организациязы городта даа паза чох полар, неке. Аннаң республиканың пір дее школазы тиңнес полбас. Минiң клазымда хакас таа, орыс таа олғаннар чыыл парғаннар. Хакас тілін пірдеезі пілбинче тиирге чарир, аннаңар ӱгредіг кирее ниик парбас, неке, сағынчам. Ідӧк мин ортын класстарда хакас тілі факультативiн апарарбын. Сурастырығ иртіргенде, ӱгренӌілер паза іӌе-пабалар андар чӧрер кӧңнiлерiн искірбееннер. Че соонаң палалар чыыл
парарына ізенчем, - чоохтапча Александра Ивановна.
1 «Е» классты паза пасха даа 1-ғы класстағы ӱгренҷілерні Піліс кӱнінде Хакасия пазы Валентин Коноваловнаң Ағбан город пазы Алексей Лёмин алғыстааннар паза школанаң танысханнар.
Ӱгредіг чылына школада нап-наа оборудованиеліг 50 ӱгредіг кабинеді, химия паза физика лабораториялары, компьютер класстары, мастерскойлар, ікі спорт залы, теннис, футбол ойнаҷаң площадкалар, ниик атлетика чоллары, хореография, музыка, концерт заллары, хоос студиязы, амғы тусха килістіре библиотека паза 400 орыннығ столовай паза даа пасхазы тимнелген.
- Наа школада наа піліс аларға, аны тыыдарға прай оңдайлар пар. Ізенчем, наа техниканаң олар иптіг тудынарлар, наа микрорайон сыбыра алғыпча нооза, палалар саны ідок хозылыбохча. Соонаң килген олғаннарға техниканаң тузаланарға кирегӧк полар. Ідок пу школаның спорт, музыка залларында пасха даа школаларның ӱгренҷілері кӱстерін, чайаачыларын тыыдарға кирек. Мындағ улуғ школа республикада ікінҷізі, пастағызы нинҷе-де чыл мының алнында азылған. Амды піс Асхыста ідок улуғ школа пӱдірерге пӧгінчебіс. Мин ікінҷілебинчем, ол пу школадаң пір дее хомай полбас. Ағбанда олғаннарның саны чыл сай пір муңа хозылчатханда, городта наа ӱгредіг организацияларын мыннаң мындар пӱдірер оңдайлар тілирбіс, - таныхтаан чооғында Хакасия пазы Валентин Коновалов.
Ағбан пазы Алексей Лёминнің чооғынаң, амды школа пӱдірер сурығ турча городтың Арбан паза Хызыл Ағбан микрорайоннарында. Пу орыннарда туралар чапчаң пӱдірілчелер. 2-3 чыл пазынаң чуртағҷыларның саны 15 муңа чит парар. Аннаңар школа сурии анда хатығ турыбызар.
Че хайди поларға Ағбандағы школаларға, хайзыларын нааҷылирға паза наа оборудование аларға кирек.
Пу сурыға Хакасия пазы Валентин Коновалов піди нандырған:
- Пір саңай прай школаларны тыхтабызарға уғаа аар. Че пу кӧстегҷе тоғыс парча. Амды ӧӧн хайығ салылча ааллардағы школаларға, ізенчем, городтағы школаларға теес чидерӧк.
Чайғы тооза іҷе-пабалар наа ӱгредіг чылы хайди пасталарына сағыссырааннар, аны хоостыра Хакасия правительство туразында пір ле чыылығ иртпеен. Амды Хакасияда тымо кирее сала амырап сыхты, ӱгренҷілер школазар чол тутчалар. Хайди таныхтаан Хакасия пазы Валентин Коновалов, ӱгретчілер коронавирустаң тоғыр вакцина турғыстырып алғаннар, школаларда прайзының иммунитеді пик пол парған, санитария-эпидемиология чахығларына тудынчалар.
- Амды ӱгредіг чылы пасталғанынаң кӧп ниме палғалыстығ. Піске имҷілернің, эпидемиологтарның чахығларын прай толдырарға кирек. Андада піс ӱгредіг чылын амыр иртіп парыбызарбыс, - сизіндірген Валентин Олегович.
Автор :
Оксана СУНЧУГАШЕВА
| Пн | Вт | Ср | Чт | Пт | Сб | Вс |
| 29 | 30 | 31 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 1 | 2 |
Кӱн таңмазы
Хакасияда
Россияда
Тилекейде
