ЧАХСЫ ТОҒЫНЧАТХАННАРНЫ ЧЕЕСТЕЕННЕР
22.09.2021
Хабарлар
Сыйыхтар. Хакасия правительствозында чуртастың аймах сфераларында пӧзік чидіглер кӧзітчеткен тоғынҷыларға хазна сыйыхтарын читірер пайрамнығ мероприятие ирткен. Сыйыхтарны республика пазы Валентин Коновалов читірген
Республика правительствозының чыылығлар иртірчең залындағы узун стол кистінде сыйыхтар аларға хығыртылған илееде кізі одырған, прай 19 кізі санап алғам. Оларның алнында турғызылған табличкаларда пір ле хакас фамилия пазылғанын хығырып алғам. Хайди азынада искірігде чоохталған, мында тоғызында, службазында кӧп чыл пӧзік чидіглер кӧзітчеткен тоғынҷылар чыылысхан. Хакас фамилиялығ табличкада «Татьяна Егоровна Сагоякова» пазылых полған.
Хакасияның пазы Валентин Коновалов чыылған кізілерзер алғыстас сӧстерінең айланған:
- Пу залда пӱӱн чыылысхан прай кізілер постарының чуртазын Хакасиянаң палғалыстыр салғаннар. Республиканы тилідеріне, ӧңнендіреріне улуғ хозым итчеткен ӱчӱн алғыстапчам сірерні. Хакасияның правительствозы паза прай даа чуртағӌылар адынаң алғыс сӧстерін сірерге читірчем. Мыннаң мындар тоғызыңарда наа чидіглер, кӧп кӱс, пик хазых сірерге паза чағыннарыҷа алғапчам.
Улуғ нимес чооғын тоозып, Хакасия пазы сыйыхтар читірген. Іди иң пӧзік сыйыхха «За заслуги перед Отечеством» II степеньніг орденнің медальына турысхан «Боевое братство» республикадағы ветераннарның халых пірігізінің Ағбандағы пӧлиинің устағҷызы Олег Ихочунин.
Россияда коронавирус чуғынҷах ағырығ тарапчатхан туста ӱгредіг учреждениелерінің тоғызын апарарына улуғ хозым иткен ӱчӱн Россия президентінің алғыстазын 9 кізі алған. Олар прайзы Хакасияның аймах ӱгредіг учреждениелерінің тоғынчылары полчалар. Пу Россия синіндегі сыйыхтар полған. Аның соонда Хакас Республиканың сыйыхтары читірілген.
Іди Хакасия чонының хазиин хайраллирына улуғ хозым итчеткен ӱчӱн «За заслуги перед Хакасией» орденнең сыйыхтатхан хазых хайраллир сфераны сыныхтағда тутчатхан федеральнай службаның Хакасияча территориальнай органының устағҷызы Надежда Кузьмина.
Позының профессиязында, Хакасияа улуғ туза идіп, кӧп чыл тоғын салған ӱчӱн «Хакасияның істеніс сабланызы» медальға турысхан «Орджоникидзевская ветстанция» хазна учреждениезінің Наа аалдағы ветеринария участогының устағҷызы Татьяна Сагоякова.
Пасхазына Хакас Республиканың Аарластығ пічіктері читірілген, ол санда Хакасияда законностьты паза правопорядокты тыыдарына улуғ хозым иткен ӱчӱн ГИБДД-ның пис тоғынҷызына.
Прай сыйыхтар читірілген соонда Валентин Коновалов сыйыхтатхан кізілерге пазох алғызын читірген паза наа чидіглер алғаан.
Пайрамнығ мероприятиеде ідӧк алғыстас сӧстерінең чоох тутхан Хакасия пазының орынҷызы Ольга Пономарева.
Чыылысхан чон сомға хада суурынған соонда Татьяна Сагоякованаң чоох алысхабыс. Ол Орджоникидзе аймаандағы Наа аалда 1961 чылда тӧреен, андох ортымах школада ӱгренген. Анаң Ағбанда Хакас аал хонии техникумын «Ветеринария» специальностьча тоосхан. І997 чылда Хызылчардағы Аграрнай университеттің «Ветеринария медициназы» факультедін тоозып, пӧзік ӱгредіг дипломын алған.
- Университет соонаң «Копьевский» совхозта тоғынып пастаам, - чоохтаан Татьяна Егоровна. - Аның ады кӧп хати алысхан, амды ол предприятие чоғыл. Анда мин, мал сохчаң цехтың паза ветеринария аптеказының устағӌызы полып, 20 чыл тоғын салғам. Предприятие ит, колбаса сығарҷаң, аның ас-тамаа прай Хакасияда садылчаң. 1990 чылларда бартер оңдайынаң сістеен итті, колбасаны пасха товарларға орнасчаңмыс. 2007 чылда ветстанциязар тоғынарға ысханнар, амға теере анда істенчем.
Татьяна Сагоякова ікі оол ӧскір салған, олар 35 паза 39 частығлар, іӌезінең хада ветстанцияда тоғынчалар. Аны ідӧк ікі пархазы ӧріндірче.
Чахсы тоғызы ӱчӱн ол Хакас Республиканың Аарластығ пічиинең сыйыхтатхан, тоғызында ідӧк кӧп хати махтаға сыххан. Ағаа хоза, халых тоғызында ӧткін араласчатхан ӱчӱн Улуғлар чӧбі аны «Родтың поғдархазы» орденнең сыйыхтаан.
Автор :
Николай СУЛТРЕКОВ
| Пн | Вт | Ср | Чт | Пт | Сб | Вс |
| 27 | 28 | 29 | 30 | 31 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде
