АРЫҒ-СУҒЛАРЫБЫС ӰРЕДІЛБЕЗІН
15.12.2021
Хабарлар
Чыылығ. Пу кӱннерде Хакасия правительствозының туразында орындағы ас саннығ чоннар пірігістерінің устағҷылар чӧбі теестегі чыылиин иртірген
Пу пірігістің устағӌылар чӧбі Хакас Республиканың правительствозында тӧстелген. Чӧпнең устапча (кнезі) Хакасия пазының орынӌызы Ольга Пономарева. Аның орынӌызы полча Хакасияның национальнай паза территориальнай политика министрі Михаил Побызаков. Ідӧк пеер кірчелер, ас саннығ чоннар пірігістері устағӌыларынаң пасха, республика правительствозындағы министерство-ведомстволар кізілері.
Чыылығ пасталар алнында Хакасия пазының орынӌызы Ольга Пономарева Россияның ӱгредіг министерствозының Аарластығ пічиин Асхыс аймаандағы Палыхтығ суғ аалдағы школаның ӱгретчізі Алла Зуеваа читірген.
Анаң пастағы сӧс пирілген республиканың ӱгредіг паза наука министрінің орынӌызы Юрий Сагалаковха. Ол Асхыс паза Таштып аймахтарында чуртапчатхан шорлар палаларын пос тіліне хайди ӱгретчеткеннеңер искір пирген. Іди тӧреен тілге ӱгренчелер Асхыс аймаанда Писхамӌы паза Палыхтығ суғ аалларда, Таштып аймаанда Мадыр паза Чоғархы Таштып аалларда. Прай чӱс азыра пала саналча. Пос тіліне кружок оңдайынаң ӱгренчелер, неделяда пір ле час пирілче. Ӧӧн сидіксініс - шор тілінің ӱгретчілері чидіспинчеткені. Учебниктер паза ӱгредіг пособиелері пар. Тоғынчатхан ӱгретчілер Кемеров городта ӧнетін ӱгредіг алғаннар. Палыхтығ суғ аалда ӱр тоғын парир Людмила Михайловна Кыдымаева. Пар чиит ӱгретчілер. Олар пілістерін хозар ӱчӱн ӱгредіг семинарларына чӧрчелер. Пӱӱл Санкт-Петербург паза Кемеров облазындағы Шерегеш городтарда пол килгеннер.
Шор олғаннарын тілге ле нимес, че ідӧк оларның культуразына паза кибірлеріне ӱгредерге кирек. Аннаңар школа тоосчатхан чииттерні кӧстегліг оңдайнаң Москва, Санкт-Петербург паза Кемеров городтарзар ӱгренерге ызарға. Соонаң, аалзар тоғынарға килчетсе, чуртаӌаң орын пирерге.
Анаң чоох тутхан Хакасияның хазых хайраллаӌаң министрінің пастағы орынӌызы Александр Стреленко. Ол Асхыс паза Таштып аймахтарында чуртапчатхан шорларның хазиин сыныхтаанының салтарларын искірген. Асхыс аймаанда 185 шор тілліг кізі санға алылған. Кӧбізі Писхамӌы аалда чуртапча. Таштып аймаанда, тізең, 68 кізі шор тілліг саналча. Ол аалларзар ӧнетін мобильнай бригадалар чорыхха сыхчалар. Ол ӧмелерде аймах имнег специалисттері пар. Олар флюорография иртірчелер. Итсе-де, сағам пандемия тузында тирең сыныхтағлар иртірілбин парир. Алынӌа санда льготалығ паза кинек кізілер. Оларға кирек имнер тузында пирілче.
2022 чылда аалда тоғынчатхан имӌілерге чурт пӱдіреріне 100 миллион азыра салковай республика бюджедінең позыдылар. Ідӧк фельдшер-акушер пункттарын нааӌылирлар. Ыраххы аалларда табырах имнег полызии автомобильлер сурии пӧгілер.
Хакасияда чуртапчатхан шор чонына экономика паза социальнай тиліс саринаң полызар сурығларны чарытхан республиканың национальнай паза территориальнай политика министрі Михаил Побызаков. Аның чооғынаң, шор чонына теелчеткен мероприятиелер пӧгін хоостыра прай иртіріл парғаннар. Килер чылда хайдағ тоғыстар иділердеңер ол искірген. Іди Хакасиядағы ас саннығ чоннарға полызарына федеральнай бюджеттең 1 миллион 27 муң салковай кӧріл парған. Ағаа хоза Хакас Республика бюджедінең 116 муң салковай позыдылар. Андартын 600 муңӌа салковай ӱгредіг киреене парар, ол санда учебниктер сығарарына. 300 муң салковай транспорт хабазиина хорадылар паза 240 муңӌа салковай культура мероприятиелерін иртіреріне туза полар.
2022 чылда Таштып аймаандағы Тылаӌах аал полған орында шорларның «Визит-центр» культура туразын тоғындырып пастирлар. Анда сигіс кізее тоғыс орны полар. Андағох культура кінін Асхыс аймаанда пӱдір салар сағыс пар. Аннаңар итчең тоғыстар кӧп.
Иң ағырсымнығ сурығ - ол Асхыс аймаандағы тайғаларда алтын аныӌаң организациялар хайыныстарынаң Писхамӌы паза Палыхтығ суғ ааллар хыриндағы тайғаларны паза суғларны ардатчатханы. Алтын аныӌаң лицензияларны аларға оой полчатханнаңар, кем не полза алтын анирға сағынча. Олар постарының соонда чалаас орыннар паза соол парған суғлар артыс салчалар.
Пу чыылыға ол тайғаларда алтын анирға сағынчатхан организацияларның устағӌылары килгеннер. Олар орындағы чонға ӱрег иткен ӱчӱн хайди полызардаңар искіргеннер. Кӧзідімге алза, «Изас» старательлер артельі» пірігістің директор орынӌызы Виталий Цуриков организацияны Палыхтығ суғ аалда пічікке кирерге молӌаан. Андада налогтың кӧбізі аал чӧбіне парар нооза. Ідӧк артель тоғысха орындағы чуртағӌыларны аларға кӱстенче. Іди тоғынчатхан 30 кізінің аразында 12-зі шор тілліг. Алтын аныӌаңнар постарының соонда иділген ӱрегні тӱзет саларға молӌааннар.
Пу сурығны читіре пӧгерлер пу айның 21-ӌі кӱнінде Палыхтығ суғ аалда. Анда Асхыс аймааның ӱлгӱлері, шор пірігістерінің устағӌылары паза алтын аныӌаң старательлер артельінің кізілері чыылызар. Кӧрінер, хайдағ чарадыға килерлер.
Автор :
Илья ТОПОЕВ
Пн | Вт | Ср | Чт | Пт | Сб | Вс |
30 | 1 | 2 | 3 | 4 | 5 | 6 |
7 | 8 | 9 | 10 | 11 | 12 | 13 |
14 | 15 | 16 | 17 | 18 | 19 | 20 |
21 | 22 | 23 | 24 | 25 | 26 | 27 |
28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде