КОНКУРЕНЦИЯ СИДІКСІНІСТЕРІНЕҢЕР ПАЗА ПААЛАРДАҢАР
17.12.2021
Хабарлар
Чыл салтары. Монополиядаң тоғыр федеральнай управлениенің Хакасияҷа пӧлии конкуренция сидіксіністеріне паза реклама законодательствозыңдағы сайбағларға чарыдылған халых ӱзӱріглер иртірген
Ӱзӱріг онлайн оңдайынаң ютуб-каналда ирткен. УФАС устағҷызы Ксения Лебедева паза профильліг пӧліктернің устағҷылары паза орынҷылары 2021 чылның салтарларынаңар искіргеннер.
Монополиядаң тоғыр служба ас-тамах паазын сыныхтағда тутча. Пу чағында гречкаа, халасха, мал идіне паалар ӧс парғаны сығысханда, мындағ ӧзіс нименең палғалыстығ полғанын піліп алар ӱчӱң, УФАС сыныхтағ иртірген. Хакасияда гречканы сығарчатхан идінҷекке пу ас-тамахтың паазы ӧзізіне чарыдылған пічіктер пирерге чахааннар. Мындағох чахығлар халас паза мал идін сығарчатханнарға пирілген.
- Гречканы сатчатхан паза аның ӱчӱн Хакасия бюджедінең субсидиялар алчатхан идінчектерге ідӧк кӧп сурығ полған. Садығ тураларында гречка асхынах. Ӧӧнінде республика тасғынзар парыбысча. Ол кӧп арах садылған полза, чахсы поларчых. Пу сурығ хоостыра тоғынчабыс, - таныхтаан Ксения Лебедева.
Хакасияның УФАС-ы пӱӱл конкуренцияны тилідерінҷе национальнай планны чуртасха кирерінҷе тоғыс апарча. Республиканың экономика тилізі министерствозынаң паза пасха даа профильліг министерство-ведомстволарнаң хада «2023 - 2025 чылларға конкуренцияны тилідерінҷе чол картазы» проект тимнелген. Ол чол картазынзар 2023 - 2025 чылларда тилідерге кӧрілген 33 рынок кір парған.
Халғанҷы туста чонны ниме-ноо паазы ӧсчеткені сағыссыратча. Бензин паазы ідӧк ӧсче. УФАС бензин паазы алысчатханын неделяда нинҷе-де хати сыныхтапча. 2021 чылның январьынаң пӱӱнгі кӱнге теере ведомство тоғынҷылары сыныхтағ иртіргеннерінде, бензиннің опт паазы 15 % ӧс парғаны сығысхан. Розница паазы, тізең, 6 % кӧдіріл парған. Мындағ салтарларға килген монополиядаң тоғыр служба.
Чыл пасталғаннаң УФАС-сар монополиядаң тоғыр законодательствоны сайбапчатханнаңар 300 азыра айланыс пічии кірген. Пылтыр 226 айланыс полған. Ведомствоның специалисттері сайбағларны тохтадарына читі сизіндіріг пиргеннер, монополиядаң тоғыр законодательствоны сайбааннаңар 15 кирек азылған. Пылтыр, айланыстарның саны асхынах арах полған даа полза, 29 административнай сайбағ сығысхан.
Хазна муниципальнай садығлар хоостыра сайбағлар саны син парған. Пӱӱл ведомство 298 хоп кӧрібіскен, 61 сыныхтағ иртірібіскен паза тоғызын чахсы толдырбинчатхан поставщиктер реестріне кирерінҷе 123 айланыс пічиин кӧрібіскен.
Ниме-ноо, финанстар паза монополиялар рыноктарының пӧлии устағңызы Анна Тукачёваның чооғынаң, законодательствоны сайбааннаңар 200 азыра айланыс пічии кірген. Оларның санында «Россети Сибирь» ПАО-даң тоғыр пір айланыс паза «Аэроси-ти-2000» регион операторынаң тоғыр айланыстар полғаннар. «Командор» торговая сеть» ООО-даң тоғыр кӧп хоп кірген. Таныхтирға кирек, пу садығ пірігізіне ідӧк «Хороший» садығ туралары кірчелер. Олар республиканың аймах кіннерінде паза городтарында орныхчалар. Че Сорығдағы «Хороший» садығ туразындағы паалар Ағбандағы пуох садығ туразының пааларынаң пӧзік. Сорығда сыныхтағ иртіргенде, садығ рыногында «Хороший» монополист танығлығ паза кӧп чон чӧрчеткен садығ туразы полчатханы сығысхан. Садығ пірігізіне пааларны тӱзірерінҷе сизіндіріг пирілген.
Монополиядаң тоғыр управлениезер чарытхы тартарынҷа тоғыс тузында толдырылбинчатханына чарыдылған 140 азыра хоп кірген.
Иң удаа конкуренцияны хайраллирынҷа законны сайбапчалар. Ол ідӧк картельнай чӧптезіг тіп адалча. Пӱӱл пу сайбағ хоостыра нинҷе-де кирек кӧрілген. УФАС-тың Хакасияңа пӧлии устағҷызының орынҷызы Ольга Липина хай пірее сайбағлардаңар чоохтап пирген. Оларның пірсі - социальнай учреждениелерзер ах хайахтың орнына сын нимес хайах сатчатхан ікі компаниядаң тоғыр азылған кирек. Заказчик ах хайахты, хуруғ паза хойытхан сӱттерні кирексеен. Компанияларның пірсі ас-тамах паазын 57 - 72 % тӱзірібіскен. Законға тудынып тоғынчатхан компаниялар пу садығ мариин ирт полбааннар. Чӧптес салған ікі ле компания садығда халған. Оларның пірсі чиңіп алған. Че ах хайахтың орнына заказчикке сын нимес хайах садылған. Пу компаниялар тоғыстарын толдырбинчатхан поставщиктер реестріне кирілгеннер паза оларның аразында картельнай чӧптезіг полғаны сығысхан. Амғы туста пу ікі компания право хайраллаңаң органнарның хайиинда, олардаң тоғыр уголовнай киректер азылған.
Хакасияның олған садтарына паза школаларына ас-тамах садарынҷа ідӧк картельнай чӧптезіг пары сығысхан. Пір юридическай лицо паза идінҷек садығда аралазардаңар сурыныстар пир салғаннар. Оларның пірсі, садығда араласхан даа полза, сым на полған. Ікінҷізі, тізең, ас-тамах паазын кӧмеске ле тӱзірген. Мындағ оңдайнаң садығ пу ікі компания аразында ӱлестіріл парған. Монополиядаң тоғыр орган конкуренциядаң тоғыр пілдіріглер таап алған.
Ольга Липинаның чооғынаң, компаниялар аразындағы чӧптезіглер тиксі экономикаа хомай теелче, регион паза орындағы бюджеттерге улуғ хорадығлар ағылча.
Чыл пасталғаннаң Хакасияның монополиядаң тоғыр службазынзар чуртағҷылардаң, юридическай лицолардаң, ӱлгӱ органнарынаң реклама законодательствозы сайбалғаннаңар 74 айланыс кірген. Оларның 23-інҷе чарадығ алыл парған, 6 айланыс хоостыра сизіндіріглер пирілген.
Пӱӱл реклама пирчеткеннер законға теелчеткен кӧп сайбағ иткеннер. Реклама иртірчеткеннер чарадығ пирбеен кізее телефонҷа сығдыратчалар паза пасчалар. 2021 чылда пістің республикада рекламаа тиксі кирексіністерні сайбааннар. Кӧзідімге, ниме-ноодаңар алай полызығлардаңар тиксі искіріг пирбинчеткеннер, тамкы тартчатханын кӧзіткеннер, лицензия чох ниме-нооға реклама иртіргеннер. Ахчалығ полызығлар пирерінҷе рекламада сайбағлар иң удаа полҷаң.
Автор :
Оксана ЧЕЛТЫГМАШЕВА
| Пн | Вт | Ср | Чт | Пт | Сб | Вс |
| 29 | 30 | 31 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде
