ТИК ЧИРДЕҢ ЧОХ ИТІРГЕННЕРНІҢ ПІРСІ
19.01.2022
Хабарлар
Пайрамнығ тӧреен чылы. 1920 - 1930 чылларда хакас чонның ӱгредиине хабасхан, хазнаның халых-чарыдығлығ чуртазында ӧткін араласхан чир-суғҷыларыбыстың пірсі Георгий Бытотовха пӱӱл 110 час толарҷых
Ол 36 частығдох ах чарыхтаң парыбысхан. Аның чуртас чолынаңар искіріглер уғаа асхынах. Аннаңар хакас чонның ӱгредиине хабасхан, хазнаның халых-чарыдығлығ чуртазында ӧткін араласхан чир-суғӌыбыстың иткен тоғызын чахсы чарыт пирер ӱчӱн, пасха ученайларның істезіглерінең, Хакасияның национальнай архивінде, Новосибирск облазының хазна архивінде, Москвадағы Россияның социально-политическай тархын архивінде хайраллалчатхан пічіктернең тузаланарға киректелген.
Пілдістіг, иң пурнада К.М.Патачаковтың ӱгренӌілерге кӧрілген «Хакас чирінің кізілері» пособиезін адирға кирек. Ол аны хакас тілінең 1990 чылда сығарған. Анда автор Г.П.Бытотовты адабохча. «1920 - 1930 чылларда культура паза чон ӱгредии тоғынӌылары аразында Г.П.Бытотов улуғласнаң тузаланча», - пасхан ол.
Чир-суғӌыбыстың адын ідӧк Алтай чирінің ученайы Н.М.Киндикова 1920 -1930 чылларда Сибирьдегі автономнай областьтардағы школа учебниктерін тӧстир сидіксіністерге чарыдылған істезігліг тоғызында адапча. Ол таныхтапча: «Учебниктер тӧстегӌілерінің кӧбізінің чуртас чолы істезілбин халған, че ФСБ-ның пічіктерінде алтай Н.А.Каланаковтың, хакас Г.П.Бытотовтың, телеут Г.М.Токмашевтің фамилиялары пазылых».
Г.П.Бытотов 1902 чылда Асхыс аалда тӧреен. Орындағы школаны тоозып, Минсуғдағы гимназияда ӱгренген. Анда алған піліс ағаа ӱгретчі поларға оңдай пирген. Іди ол істеніс чолын Киндірліг пилтірі аалдағы школада пастаан. Анда ол 1921-1922 чылларда тоғынған. 1923 чылда чиит специалистті Ис пилтірі волость чӧбінің араласчызына тапханнар. Анаң пір чыл пазынаң, Асхыс паза Ис пилтірі волостьтары Хакас уездінің Асхыс аймаанзар хада киріл парғанда, Георгий Павлович Асхыс аймаа чӧбінің толдырығлығ комитедінің кізізіне табылған. Тоғыстағы кирексіністер хоостыра олох чыл аймахтағы комсомол пірігізінің араласчызы полыбысхан.
Ол тустағы пасха хакас чииттернең хада, ВКП(б)-ның округтағы комитедінің чарадиинаң, Бытотовты Москвазар Восток істенӌілерінің коммунистическай университедінзер (КУТВ) ӱгренерге ызыбысханнар. Пу ӱгредіг заведениезі коммунизмнің тилізіне хозым идер специалисттерні тимнеӌең. Істезігӌілернің таниинаң, хырығ озариндағы авторлар аннаңар піди сағынӌаңнар: «Улуғ тигіриб кис-тінде... ікі хадыллығ тура турча. Андартын кізілер-бомбалар сыхчалар. Іскеркі чирлердегі чииттер - якуттар, мооллар, тувалар, узбектер, корейлер, афганнар, перстер - анда постарының чирінде иргі чуртасты чара чачырадыбызар ӱчӱн ӱс чыл ӱгренчелер».
Бытотов студент тузындох РКП(б)-ның КУТВ-дағы пӧлиинзер коммунист поларға тимдезінеңер искірген. 2-ӌі курстың парткружогының чыылии пирген аннаңар искірігде піди пазылған: «Амыр оңдайлығ комсомолец. Партия сурығларынаң айғазарға кӧңні чатча, 1 ступеньніг политкружок апарча. Прайзынаң чахсы нанӌыласча». Аннаңар аны партияа алып алғаннар.
Чайғы тынағ кӱннерінде КУТВ студенті Г.Бытотов Асхыс аймаанда албан чығӌаң кирекче уполномоченнай полып тоғынӌаң паза аал чӧптерін сыныхтаӌаң. Анзын национальнай архивте хайраллалчатхан удостоверение киречілепче. Аны ағаа 1925 чылда август айда Асхыс аймааның толдырығлығ комитеді пиртір. Архив пічіктерінде ідӧк студент Бытотов тоғысха уғаа нандырығлығ хайӌаң, аны турыстыра толдырӌаң тіп таныхталча.
КУТВ-ны тоосхан оол 1927 чылда, Москвадаң айланғандох, Хакас округының чон ӱгредии пӧлиинің устағӌызы полыбысхан. Олох чылда «Совет ӱлгӱзіне 10 чыл» чыындыны тимнирінде паза чарыхха сығарарында араласхан. 1928 чылда Хакас округының толдырығлығ комитеді чон ӱгредии пӧлиинің хойнында чир-суғ ӱгренӌең киректі тилідер пӧгінніг пірігіс тӧстирдеңер чарадығ алыбысхан. Андар чир-сууның тархынын хайығда тудар кӧңніліг 55 кізі кирілген. Кнезіне, тізең, Георгий Павлович Бытотов турғызылған.
1928 чылда Хакас округында алфавитті латиницаа кирібіскеннер. Аның ӱчӱн хакас пічиин тӧстирінӌе комиссияа литератураны наа алфавитке тӧстеніп сығарарға чахығ пирілген. Ол кирекнең айғасханнар санында Бытотов полған.
1930 чыллар наа ла пасталчатханда, Хакас округының толдырығлығ комитеді чарадиинаң Георгий Павловичті совет кадрларын тимнирінӌе курстарның устағӌызына турғызыбысханнар. Тӱрчедең ол курстар совет-партийнай школаа пиріл парғаннар, Бытотовты Хакас книга издательствозынзар ызыбысханнар. Анда ол 1934 чылға теере К.К.Самриннең, К.С.Тодышевнең, А.Т.Казанаковнаң хада хакас тілінең учебниктер сығарарынаң айғасхан. Олох туста ол Ағбандағы ӱгретчілер училищезінде хакас тілі уроктарын апарарға маңнан турӌаң.
31 августта 1934 чылда аны, «Союз сибирских тюрок» националистическай пірігістің араласчызы полча тіп пыролап, ікі чылға тӱзедігліг лагерьде тоғынарға чарғылабысханнар. Соонаң Асхыстағы чон ӱгредии пӧлиинзер тоғысха ысханнар. Че Георгий Павлович Ӱс чулдағы читі чыллығ школазар ӱгретчі поларға парыбызарға чаратхан. «Чон ыырӌызы» сӧс пірігізі ағаа сиип парған. Аннаңар палаларға піліс пирерге тың харығ полған. «Чахсы» кізілернің хоп пічиине тӧстеніп, Бытотов, пазох советтердең тоғыр полча тіп, ӱгретчі тоғызынаң сығардырыбысхан. Анаң ол Асхыстағы сберкассазар санӌы поларға кірібіскен. 1937 чылда октябрь айда, тізең, НКВД-ның Асхыс аймаандағы пӧлиинің пастығы Потапов аны, «Союз сибирских тюрок» пірігіс араласчыларынаң хада пазох контрреволюция киректерінең айғасча тіп, харибге чаап салған. 13 июльда 1938 чылда СССР-ның Ӧӧркі Чарғызының Чаа Коллегиязы чарадиинаң аны ат салғаннар.
Г.П.Бытотовтың ады 1959 чылда ла толдыразынаң ахтал парған. Георгий Павловичтің, хысхаӌах таа полза, чарых чуртас полған. Ол позының чонына полыс пирерге тың кӱстенген. Палалары пабазының адын ідӧк турыстыра ал чӧргеннер. Улуғ хызы Муза Георгиевна, Ағбандағы ӱгретчілер институдын тоозып, позын ӱгретчі тоғызына чарыт салған. Оолғы Юрий Георгиевич чарытхы сетьтерінің инженер-технигінің специальнозы хоостыра кӧп чыл Ағбанда істенген. Кічіг хызы Клара Георгиевна отыс чыл азыра имӌі полған. Кандидат диссертациязын арачылап, Хызылчардағы имнег институдында тоғынған.
Автор :
Елена МАМЫШЕВА, тархын наукаларының докторы, ХакНИИЯЛИ-ның улуғ наука тоғынҷызы
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде