9 Май. 9 час иртен. Чиңіс паркы. Чаадаңар сарыннар ырахха чайылча, прайзының чӱреен тибіредіп. Харахтар суғланча. Митинг пасталыбысты. Успас от ачыхтың пулуңнарында тӧрт чааӌы турча. Олар улӱкӱнге кисчең кип-азахтығ уғаа морсымнығ кӧрінчелер. Кинетін марштың кӧӧ истіле тӱскен. Ӧтіг ӱннең чахығлар тарап сыхханнар. Ӱс чааҷы Успас от алнынзар Чиңіс Знамязын паза Россия флагын ағыл килген.

Илбек Ада чааның ветераннарын алғыстаан соонда, Хакасия пазы Виктор Зиминнің адынаң венокты ікі чааҷы мемориал комплексінзер салған. Виктор Михайлович позы, оларның соонҷа киліп, хоза тіріг гвоздикалар салған. Аның соонҷа Хакасияның Ӧӧркі Чӧп кнезі Владимир Штыгашевтің паза Илбек Ада чаа ветераннарының адынаң венокты мемориал комплексінзер салғаннар. Оларның соонда чааҷылар Ағбан город пазы Николай Булакиннің, городтағы депутаттар чӧбінің кнезі Альберт Тупикиннің паза Ағбан городтың епархиязының адынаң веноктар читіргеннер. Веноктар саларын узаратханнар Хакасиядағы ӧӧн федеральнай инспектор Виктор Чернышев паза кӱс министерство-ведомстволарының устағҷылары.

Веноктар паза чахайахтар салған соонда, чааҷылар, салют идіп, автоматтардаң тигірзер ӱс хати атханнар. Митинг тоозылғанда, чааҷылар мемориал комплексінең маршнаң сыхханнар. Чиңіс паркында чааның сидік чылларынаңар аймах-пасха кӧзідіглер полған. Мында чаа тузындағы тиріглер паза техника кӧзіділген. Іди паркта пенопласттаң иділген танк македі паза таарлағ тартчаң ікі машина турған. Кізілер, ол техника хыринда турып, сомға суурынғаннар. Пір па    латкада чаа тузындағы рация, пасчаң машинка турған, пірсінде чазы кухнязы полған. Хынған на кізее анда чаа тузындағы каша чіп алар оңдай полған.

Иң хайхастығ пілдірген Илбек Ада чаадаңар кӧзідігні кӧрерге. Ооллар, Совет паза фашист армияларына чарылып, удур-тӧдір «чааласханнар». Іди кӧрігӌілер Илбек Ада чаа кӱннерін пос хараанаң кӧріп алғаннар. Анда прай ниме полған: атыстар, піреезі палығлат салчатхан, кем-де ӧдірт салчатхан...

Кӧзідіг тоозыл парғанда, чон, пір площадкада чыылызып, «Катюша» сарынны ырлаан. Іди прай чон пайрамнығ кӧңніліг полған.

Антон ЧЕРТЫКОВ