Тирiглiг кӱстернiң элитазы
05.08.2022
Хабарлар
ВДВ кӱнi. Чыл сай Кии-десант войсколары кӱнiнде, 2 августта, Ағбандағы Чиңiс паркында Чааҷылар сабланызы мемориал алнындағы площадьта ВДВ-да служба ирткен ветераннар чыылысчалар
Россия президентi Владимир Путин паза хазнаның арачыланыс министрi Cергей Шойгу ВДВ чааҷыларын паза ветераннарын Киидесант войсколары кӱнiнең алғыстааннар.
«Чааҷыларның паза офицерлернiң амғы тӧлi войсколарда тӧстелген чаа патриот кибiрлерiн турыстыра узаратча, турғызылған сидiк пӧгiннернi толдырчатса, сыбыра пӧзiк профессионализмiн, махачызын кӧзiтче. Матыр десантниктернiң, посха айабин, махачы чааласчатханнары иртiрiлчеткен ӧнетiн чаа операциязы тузында чахсы кӧрiнче», – чоохталча президенттiң десантниктерге алғыстазында.
Ағбандағы Чиңiс паркында кӧгiлбей пӧрiктiг, тельняшкалығ кiзiлер иртеннең чыылысчатханнар. Кӧбiзiнің холында ВДВ флагтары полған. Чыл сай пу парктағы Успас от хыринда Кии-десант войсколарында алынҷа чылларда служба ирткен ветераннар кибiрлiг мероприятие иртiрерге чыылысчалар. Город орамаларынҷа даа ойлатчатхан автомобильлерде десантниктернiң чалбырапчатхан флагтары кӧрiнче.
Парктағы одырчыхта iкi десантник хабарласчатханын кӧр салып, оларзар пастырдым. Танызып, хысхаҷахти чоох алысхабыс. Пiрсi Владимир Кучендаев полтыр, ол Ағбанда чуртапча, «Альпина» ООО-да водитель полып тоғынча. Тӧреен чирi – Ағбан пилтiрi аймаандағы Чарков аал. Хайди ол искiрген, срочнай службаны 2011-2012 чылларда (пiр чыл) Ульяновск облазында ирткен. Анда 31-ҷi десантно-штурмовой бригадада чааҷы службазын апарған. Пeeн Кучендаев пiр частьта хада служба ирткен Юрий Атамановха учурап партыр. Анзы ам Якутияда чуртапчаттыр, Хакасиязар туғаннарынзар ааллап килiп, ВДВ кӱнiнде хада служба ирткен арғыстарынаң тоғасча.
Украинада иртiрiлчеткен ӧнетiн чаа операциязынаңар чоох кӧӧлҷе пар сыххан. Ветераннарның сӧстерінең, амды ПВО системазы тың тилiп парғанда, самолёттардаң парашюттығ десанттар тастирға оой нимес. Іди зенитнай комплекстi хада хаап чӧрчеткен пiр чааҷы даа учухчатхан самолётты тӱзiре ат полар. Самолётта пiр ротаҷа десантник полар. Аннаңар Украинада пiстiң десантниктер, мотострелоктар полып, чирде чааласчалар. ВДВ-ның чааҷылары пасха войсколардаң постарының пӧзiк тимненiзiнең, хада-пiрге тудынызынаң пасхалалчалар.
Успас от хыриндағы площадьта «Десантниктер, стройға турыңар!» команда истiле тӱстi. Чыылған ветераннар стройға турыбысханнар. Россияның Кии-десант войсколары тӧстелгенінің 92-ҷi чылына чарыдылған митинг пасталған. Аның алнында Россияның паза Хакасияның гимннерi толдырылғаннар.
Митингте чоох тутханнар «Боевое братство» тиксi Россиядағы ветераннарның халых пiрiгiзiнiң региондағы пӧлиинiң устағҷызы Александр Векшин, Хакасияның Ветераннар чӧбiнiң кнес орынҷызы Юрий Седых, Россияның Тирiглiг кӱстерiнiң ветераннары пiрiгiзiнiң региондағы пӧлиинiң кнезi Олег Пагельс паза даа пасхазы.
Митинг тоозылғанда, десантта служба ирткен ветераннар паза чыылысхан олаңай даа кӧрiгҷiлер Чааҷылар сабланызы мемориал тӧзiнзер паза Успас от хыринзар чахайахтар салғаннар. Анаң кибiрге кiр парған оңдайнаң, стройға турып, десантниктер, парадтағы чiли, строевой хаалағнаң площадьча ирткеннер. Мыннаң пайрамнығ мероприятие тоозылған.
Автор :
Николай СУЛТРЕКОВ
| Пн | Вт | Ср | Чт | Пт | Сб | Вс |
| 27 | 28 | 29 | 30 | 31 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде
