САҒЫНҒАН САҒЫСТАР ТАБЫРАХ ТОЛЗЫН
14.09.2022
Хабарлар
Ағбан пилтіріндегі наа олған ачығы
Ӧрініс. Ағбан пилтірінің Спортивнай орамазындағы 6 № тураның хыринда наа олған ачығы азыл парған. Аны чуртағҷылар уғаа ӱр сағааннар. Хызыл чаламаны хыплааннар Хакасия пазы Валентин Коновалов паза Ағбан пилтірі поселок пазы Нина Леонченко
Тасхар чылығ, орамаа толдыра кӧг чайылча, олған-узах аар-пеер ле чӱгӱріс чӧрче. Ойнаӌаң наа орын азыларына хыриндағы тураларның прай даа чуртағӌылары чыылыс парған. Хай піреезі мында хайдағ ӱлӱкӱн полча тіп сағын парған полар. Итсе-де, ағбан пилтіріндегілерге наа олған ачығы пӱдірілгені - улуғ пайрам.
- Олған площадказы хыринда кӧп хадыллығ 5-6 тура турча. Андағы кічіг чуртағҷылар мында сыбыра чыылыс парчалар. Иргі чилеңместер, чылҷаң тағыҷахтар паза даа пасха ниме-ноо хаҷаннаң изел парған полғаннар. Оларның кӧрімі дее чоғыл, хорғыс чох полчатханы даа ікінҷілестіг полған. Аннаңар піске хайди даа наа площадка кирек полған. Амды пістің сағызыбыс тол парды. Хайдағ сіліг, хорғыс чох паза амғы тусха килістіре площадка пӱдір пирділер пістің кічіг чуртағҷыларыбысха!
Піс мында Наа чыл сыбыҷаан турғысчабыс, ӱлӱкӱнні таныхтапчабыс. Амды пу орын, сіліг пол парып, кӧңнібісті улам кӧдірер. Мында хоза сцена полған полза, чахсы полархых. Мының алнында хонҷыхтарнаң ӱлӱкӱннерге хайди чыылысхабыс, амды ідӧк тоғас турарбыс, - кӧңнін чазырбинча орындағы чуртағӌы Людмила Мусатова.
Орғах айының ортызында Спортивнай ораманың чуртағӌылары Хакасия пазы Валентин Коноваловсар олған ачығын иптирге полыс пирерге айланған полғаннар. Тоғазығда Хакасия пазы аны пӱдірерге хабас пирерін искірген. «Хакасияның финанстар министерствозына сірерге ахчаны позыдар сурығны табырах пӧгібізерге чахығ пир саларбын. Чайғы тоозыл парир, аннаңар олған ачығының чир тоғыстарын амох ит саларға маңнанарға кирек», - чоохтанған ол.
Мына ӱр дее тус иртпеенде, регион бюджедінең 2 миллион салковай позыдылған паза олған ачығы пӱдіріл парған. Пайрамнығ кӱнде наа объекттің хызыл чаламазын хыплирға Хакасия пазы Валентин Коновалов кил парған. Таныхтирға кирек, анда чон тығырама полған. Палалар ла 100 азыра, анӌох - улуғлар!
- Олған площадказын табырах пӱдірібіскені ол Ағбан пилтірінің чуртағчылары, устағ-пастаа паза Хакасияның правительствозы хада-пірге чахсы
тоғыныбысханының салтары полча. Мында подрядчик тее позын ізестіг кӧзіт пирген, график хоостыра ӱс неделяа ирте толдырыбысхан. Тынанчаң наа орын азылғанынаң прайзын алғыстапчам! - таныхтаан чооғында Валентин Олегович.
Хызыл чалама хыплал парғандох, палалар олған ачығынзар сала маңзыри чӱгӱргеннер. Сооларында тозын на тур халған. Ағбан пилтірі поселоктың пазы Нина Леонченконың чооғынаң, мыннаң мындар пу ачых улам иптелер. Мында мини-футбол ойнаӌаң чазы пӱдірілер, тренажерлар турғызылар. Ағаа хоза улуғ частығларға тынанӌаң орын полар.
- Олған площадказын пӱдірер сурығ хаңанох турған. Че ағаа пір дее ахча позыт полбачаңмыс, ол-пу хорадығлар сығыс ла килҷеңнер. Республика устағ-пастаа полызиинаң піс сағынған сағызыбысты толдырып алдыбыс. Прайзы ӧрінче. Таныхтирға кирек, халғанчы чылларда Ағбан пилтірі поселокта кӧп алызығ полча. Піс чолларны иптепчебіс, чарытхылар тартчабыс, олған площадкаларын пӱдірчебіс, - искірген Нина Леонченко.
Автор :
Оксана СУНЧУГАШЕВА
| Пн | Вт | Ср | Чт | Пт | Сб | Вс |
| 28 | 29 | 30 | 31 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 1 |
Кӱн таңмазы
Хакасияда
Россияда
Тилекейде
