ІКІ ЧЫЛҒА БЮДЖЕТ ІКІ ХАТИ ӦСКІРІЛДІ
14.12.2022
Хабарлар
Ӧӧркі Чӧп сессиязы. Хакасияның Ӧӧркі Чӧбінің читінҷі хығыртииның депутаттары улуғ хырлас айының 9-ҷы кӱнінде
44-ҶІ СЕССИЯА ЧЫЫЛЫСХАННАР. КӰН СУРИИНА 14 СУРЫҒ СЫҒАРЫЛҒАН
«ХРУСТАЛЬ ПАРЫС» – МАРИНА АЛЁХИНАА
Депутаттарның теестегі сессиязы республика парламентінің кнезі Владимир Штыгашевтiң устаанынаң ирткен. Ол сессияа 41 депутат килгеннеңер искірген. Ӱс кізі ағырчатханынаңар паза ол синӧк тоғыс чорығынаңар аралас полбазын азынада искірген. Ідӧк сессия тоғызында Хакасия пазы Валентин Коновалов, аның орынҷылары, ол санда республика правительствозының Ӧӧркі Чӧптегі тӧреміл кізізі Сергей Комаров, Ӧӧркі Чӧптің Федерация Чӧбіндегі кізізі, сенатор Александр Жуков, право хайраллаҷаң органнарның кізілері араласханнар. Россияның паза Хакасияның флагтарын паза гимн ойнаанын турып удурлаан соонаң Владимир Николаевич пастағы орынҷызы Юрий Шпигальскихке сӧс пирген. Юрий Александрович «Хрусталь парыс» хабарҷыларның паза искіріглер таратчатханнар аразындағы республика марииның чарғы кнезі полча. Ол, марығ салтарларын идіп, ӧӧн сыйыхха – Гран-приге – паза Хрусталь парыстың статуэтказына турысхан хабарҷының адын чарлаан.
– Пӱӱл 19-ҷы марыға Хакасияның Ӧӧркі Чӧбінің закон сығарҷаң тоғызынаңар, алылчатхан чарадығлардаңар паза депутаттарның тоғызынаңар 80 азыра телевидение cюжеді, авторларның теле- паза радиопрограммалары, печатьта паза Интернетте сығарылған материаллары пирілген. Чарғыҷылар ӧмезінің тоғыс араласчызы прай тоғыстарны ситкіп паалаан, печать СМИ-лары паза Интернет-сығарыстары ӧмезінде уламох хазыр харбазығ парған. Чарғыҷылар араласчыларының кӧрізінең, Гран-при сыйиина материалларны пӧзік синде тимнеен тӧрт хабарҷы ӧӧн сыйыхха турыстыра полған. Пір сӧснең, иң кӱстіглері паза турыстығлары азах меетке сыхханнар. Оргкомитетке ікі хати чыылызарға киліcкен, піс киҷее ле пір чарадыға килгебіс! Амды чарадыңар искірерге: «Хрусталь парыс» марығның Гран-призі «Хакасия» газетаның ӧӧн редакторы Марина Анатольевна Алёхинаа читірілче! – искірген Юрий Александрович.
Ӧӧн сыйыхты чиңіcчее Владимир Штыгашев читірген. «Хрусталь парысты» холға алып, Марина Анатольевна депутаттарзар мындағ сӧстернең айланған: «Хакасияа служить полчам! Россияа служить полчам!» Ол марыға Хакасияның национальнай архивінең хада тимнеен статьяларны пирген. Чарғыҷылар республиканың гербінеңер паза флагынаңар тоғыстарны пӧзік паалааннар. Юрий Александровичтің таниинаң, пу чағында марығның тиксі салтарлары иділер.
ФЕДЕРАЛЬНАЙ КІННЕҢ – 10 АЗЫРА МИЛЛИАРД!
Кӱн суриина алызығлар кирілбеен, сурығлар аразында ікі ӧӧн сурығны таныхтирға чарир: «2023 чылға паза кӧрілген 2024 паза 2025 чылларға республика бюджедінеңер» (пастағы хығырығда кічіг хырлас айының 23-ҷі кӱнінде алылған) паза «Хакас Республика Правительствозынаңар» Хакасия законына алызығлар кирердеңер» (чарыс айының 26-ҷы кӱнінде пастағы хығырығда алылған) закон проекттерін.
Чағынғы ӱс чылға Хакасияның бюджедінеңер закон проектінең таныстырған республиканың Ӧӧркі Чӧбінің бюджетче паза налог политиказынҷа комитет кнезі Олег Иванов. Пастағы хығырығда закон проекттеріне республика бюджедінің парыстарынҷа паза хорадығларынҷа депутаттарның чӧптері кирілген полза, амды, Хазна Думазы Россияның федеральнай бюджедін ікінҷі хығырығда алыбысханда, Хакасияа нинҷе хоза ахча позыдылары пілдістіг пол парған.
– Пӱӱн піске федеральнай бюджеттең кірген ахчаны ӱлестірібізерге киректелче, ол, тізең, 10 миллиард 678 миллион салковай, – таныхтаан Олег Альбертович. – Ол федеральнай бюджеттің пастағы хығыриинда чарадылған кӧстегліг ахча синінең 2 миллиард 569 миллион салковайға кӧп. Пу тус аразына федеральнай кіннең ахча тартып аларынҷа тоғыс тӧреміл апарылған.
Пу ахча 2023 чылға республика бюджедінің парызына хозылар. Аның 1 миллиард 167 миллион 616 муң салковайы Россия синінең Хакасияа пирілген полномочиелерні толдырарға субвенцияларға кӧрілген, 9 миллиард 510 миллион салковай – национальнай проекттерні паза федеральнай программаларны чуртасха кирерге субсидияларға. Хорадығларны алза, пу ахча мындағ кӧстеглерге парар: социальнай политикаа – 3 миллиард 525 миллион салковай, ӱгредіге – 1 миллиард 900 миллион салковай, хазых хайраллирына – 1 миллиард 445 миллион салковай, чол хониина – 1 миллиард 223 миллион салковай, культураа паза спортха – 391 миллион салковай, аал хониина – 327 миллион салковай, ЖКХ кӧстеене – 859 миллион салковай. Аннаң пасха, чурт-коммунальнай хонииның реформазын иртіреріне хабасчаң чыындыдаң республикаа айландырбас оңдайнаң 176 миллион салковай позыдылар. Ол ахчаа изелчеткен туралардаң чуртағҷыларны кӧзірерлер.
Андағ оңдайнаң, пу алызығлар кирілген соонаң, бюджеттің ӧӧн кӧзідіглері мындағ синнерге читкеннер: парыстары – 53 миллиард 979 миллион салковай, хорадығлары – 57 миллиард 292 миллион салковай паза дефициді – 3 миллиард 313 миллион салковай, ол 10%-ті аспинча.
Депутаттар республика бюджедінеңер закон проектінең тиксі чарасханнар.
– Бюджетті тимнеен прай депутаттарға алғыс ползын. Хакасияның Ӧӧркі Чӧбінің читінҷі хығыртииның паза правительствозының чидии – ол бюджетті ікі чылға ікі хати ӧскіріп алғаныбыс. Отыс чыл аразына мындағ пастағы кирек. Бюджет парызы 25-26 миллиард полған. Пӱӱн піс 50 миллиардты аза халдыбыс! Бюджеттің парыстары паза хорадығлары, 2018-2019 чылларнаң тиңнестірзе, ікі хати ӧс парған, – таныхтаан Хакасияның Ӧӧркі Чӧп кнезі Владимир Штыгашев.
«2023 чылға паза кӧрілген 2024 паза 2025 чылларға республика бюджедінеңер» закон проектінең хада депутаттар республика паза орындағы пос устанысха хоза чӧптердеңер Ӧӧркі Чӧптiң чарадиин алыбысханнар. Правительстваа федеральнай кіннең тоғысты айныдарға, хазна программаларында аралазарға, позыдылчатхан ахчаны тузында паза толдыразынаң хорадарға, кинек олғаннарға, сахар диабедінең ағырчатханнарға кӧрілген хабазығлар синін ӧскірер оңдай табарға паза пасха чӧптер пирiлген, муниципальнай пӱдістерге – пос парыстарын ӧскірерінҷе тоғыс апарарға паза орыннарда пос киреен азарға кӧӧктірерге.
Тиксі алза, килчеткен чылның бюджеді социальнай кӧстегліг полар. Аның хорадығларының ӧӧн чардығы чал ахчазына, аймах льготалығ чуртағҷыларға пособиелерге кӧрілген, ол санда мал имҷiлерiнiң службазына чал ахчазын ӧскіреріне паза СВО араласчыларының сӧбірелеріне хабазарына.
ПРАВИТЕЛЬСТВО ТОҒЫЗЫ – НАА ОҢДАЙЛАРҶА
Хакасияның ӱлгӱлері «Россия субъекттеріндегі халых ӱлгӱзін тӧстеҷең ӧӧн принциптерінеңер» 414 № федеральнай закон алылғанынаң палғалыстығ алызығларны республика законнарына кирерін узаратчалар. «Хакас Республика Правительствозынаңар» Хакасия законына алызығлар кирердеңер» закон проектінең республика пазы чарыс айындох сыххан. 42-ҷі сессияда депутаттар аны пастағы хығырығда ла чаратханнар. Кӧстегліг комитетке аны иптебізеpге пӧгін турғызылған.
Хакасияның Ӧӧркі Чӧп кнезінің орынҷызы паза конституция законнарын сығарарынҷа, хазна пӱдіриинҷе, законностьча паза правопорядокча комитет кнезі Светлана Могилинаның искіриинең, пу закон проектін иптир ӱчӱн ӧнетін тоғысчы ӧме тӧcтелген, хайдар, депутаттардаң пасха, ідӧк прокуратура, юстиция министерствозы, парламенттің паза правительствоның право пӧліктерінің кізілері кірген. Сурығны ӱзӱрчеткен туста федеральнай синде наа законнар алылған, олар ідӧк регионнарның толдырығлығ ӱлгӱ тоғызына теелгеннер. Тоғысчы ӧме закон проектіне пастағы ӱзӱрігде кірген тӱзедіглерні кирген паза читпестерні санға алған. Салтарында тӱзедіглер таблицазы тимнелген паза закон проектіне наа ат пирерге чӧп пирілген. Іди ол «Хакас Республиканың хазна устаандағы алынҷа закон акттарына алызығлар кирердеңер» адалған. Ноға іди иділген? Светлана Викторовнаның таниинаң, «Хакас Республика Правительствозынаңар» законнаң пасха, алызығлар ідӧк ікі республика законына кирілер: хазнаның гражданскай службазынаңар паза хазна должностьтарынаңар, должность окладтарынаңар. Алызығлар хоостыра хазнаның гражданскай службазында 70 часха теере тоғынарға чарадылча, ол алызығ хазна синінде кирілген. Закон проектіне республика правительствозынаң пазох ахча саринаң паза юрист ӱндезіглері алылған. Чоохтирға кирек, закон проекті тӱзедіглерiнең хада ікінҷі хығырығда пір ӱннең алыл парған.
– 414-ҷі федеральнай закон хоостыра парламент улуғ тоғыс идібісті: республиканың 39 закон проектінің 38-зіне алызығлар киріл парды, – хабарҷыларға хоза чарытхан Светлана Могилина. – Паза пір закон проекті 2023 чылның кӱрген айында ӱзӱрілер. Ол Хакасияның Ӧӧркі Чӧбі комитеттерінің паза комиссияларының тӧстелчеткенін наа хығыртыға тиксі алыстырыбызар.
Хакасия правительствозынаңар законға кирілген алызығлар хоостыра республика пазының тоғыс оңдайлары алысча. Ол правительстводаң алынҷа турғызылча, республиканың иң пӧзік должнозындағы кізі регионның паза Россияның хазна службазында полар. Амды ол Ӧӧркі Чӧпті позыт полар паза муниципальнай пӱдістернің устағҷыларын тоғыстаң суур полар (кирек закон алылза). Че ол позы даа Россияның устағҷызынаң пик палғалысха кирілче: президент аны ідӧк тоғыстаң суур полар.
Таныхтирға кирек, амды республика парламенті орындағы пос устаныстарның тоғызына теелчеткен алызығларның федеральнай синде кирілерін сағыпча. Хазна Думазы ол законны пастағы хығырығда ла ӱзӱрібіскен. Ол тиксі алылбаанда, муниципальнай пӱдістернің пастарын даа тоғыстаң суурар оңдай тоғынмас.
НАА РЕГИОННАРНАҢ ПАЛҒАЛЫЗАРҒА
Прай сурығлар ӱзӱрілген соонаң Хакасияның Ӧӧркі Чӧп кнезі Владимир Штыгашев депутаттарзар Россияа хозылған регионнарнаң хада-пірге тоғынар оңдайларны таныхтирға чӧпнең сыххан. Ол сурығ ідӧк Россияның Федеральнай Чыылииндағы Россияның закон сығарҷаңнар чӧбінің чыылиинда кӧдірілген, хайда ідӧк Владимир Штыгашев араласхан. Чыылығның ӧӧн сурығларының пірcі хазнаның пос алынҷа паза ағаа хорғыс чох поларын тыытчатхан законнарны нааҷылиры полған. Регионнарның закон сығарҷаң органнарына, тізең, Донецк, Луганск чон республикаларынаң паза Запорожье, Херсон областьтарынаң хада-пірге тоғысты айныдарына хозыларға чӧп пирілген.
– Аймах-пасха оңдайнаң полызарға сурынчалар. Пӱӱнгі кӱнде Донецк паза Луганск республикалар 80 процентке иңзерілік. Туралар, социальнай, культура, полызығ туралары сайбалых, атыстар узарадылча. Аннаңар орында айланыснаң сығарға сурынғаннар. Піс правительствонаң хада оларнаң хайди палғалызарын кӧрербіс. Піске прай кӧстеглерҷе хайынарға кирек. 8 – 10 кӱн аразына прай чӧптерні тимнеп саларға, – теен Владимир Николаевич.
Хакасия пазы Валентин Коновалов сах андох депутаттарны республикадаң тимнелчеткен делегацияа хозыларға хығырған. Чорых улуғ хырлас айы тоозыларына, кӱрген айы пасталарына кӧрілче.
Автор :
Наталья СЮПТЕРЕКОВА
Пн | Вт | Ср | Чт | Пт | Сб | Вс |
30 | 1 | 2 | 3 | 4 | 5 | 6 |
7 | 8 | 9 | 10 | 11 | 12 | 13 |
14 | 15 | 16 | 17 | 18 | 19 | 20 |
21 | 22 | 23 | 24 | 25 | 26 | 27 |
28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде