ОЛАРНЫҢ МАХАЧЫЗЫН ЧОН ХАҶАН ДАА УНДУТПАС
14.12.2022
Хабарлар
Матырлар кӱні. 9 октябрьда Россияда Ада чир-суубыстың Матырлары кӱні таныхталған. Хакасияның прай город-аалларында хумартхылас мероприятиелерi ирткен
МАТЫРЛАРҒА – ААРЛАС!
Республикада Ада чир-суубыстың Матырлары кӱнін пайрамни таныхтааннар. Тиксі Россияда иртірілчеткен ӱлӱкӱнде прай хазна позының матырларын чеестепче, аарлапча. 2007 чылда Россия президенті Владимир Путиннең чарадыға алылған Матырлар кӱні амды чыл сай таныхталча. Хакасия даа кӧп матырын ӧскіріп алған, оларны ідӧк прай хазна чахсы пілче. Пу кӱнде школаларда хумартхылас мероприятиелерi иртірілче: класс частары, чааҷыларға чарыдылған кӧзідіглер, ӱлӱкӱн акциялары, Ада чир-суубыстың арачылағҷыларына чарыдылған аймах концерттер.
Iди пу кӱнде Ағбандағы 7, 9, 20 номер школаларда Украинада апарылчатхан ӧнетін чаа операциязында чуртазын пир салған чааҷыларның хумартхы чардылары азылған. 7 № школада – анда ӱгренген Мариан Дьяконовтың хумартхы чардызы, 9 № школада – анда ӱгренген Егор Кадочниковтың, 20 № школада пір саңай ікі хумартхы чарды азылған – Руслан Матвеевтің паза Сергей Токмашевтiң. Пу адалған школаларда хумартхы чардылар азылчатханына чарыдылған хумартхылас митингтерi ирткен.
20 № ШКОЛАДА
20 № школада аны тоосхан ефрейтор Сергей Токмашевтiң паза матрос Руслан Матвеевтің хумартхы чардыларын азарына чарыдылған хумартхылас мероприятиезi ирткен. Школа туразы алнында ӱгретчілер, ӱгренҷілер, юнармеецтер турғаннар, iдӧк чуртазын пир салған чааҷыларның туған-чағыннары полғаннар.
Юнармеецтер строевой хаалағнаң Россияның флагын ағылғаннар, материалнаң чабылған хумартхы чардылар хыринда аарластығ хадағда iдӧк юнармеецтер турғаннар. Россияның паза Хакасияның гимннері толдырылған соонда хумартхылас митингi пасталған. Пастап сӧс школа директоры Татьяна Ивановна Лукьяноваа пирілген.
– Пістің школабыс кӧп турыстығ патриотты ӱгредіп, ӧскіріп алча, олар чуртаста чахсы тудынарларына ізенчебіс. Пӱӱн піс школа тоосхан матырларыбыснаң поғдархапчабыс, хомзынысха, ам олар пісті испинчелер. Сергей Токмашевтi, Руслан Матвеевті ӱгренҷілерібіс хаҷан даа ундутпастар, матырлар оларға чахсы кӧзідім полчалар. Ӧнетін чаа операциязында чуртазын пир салған матырларның хумартхы чардыларын школада хызарына пістің ӧме чӧпciнче, – чоохтаан школа директоры.
Чааҷыларның хумартхы чардыларын азар право пирілген Сергейнің паза Русланның класс устағҷылары полған Наталья Владимировна Николаеваа паза Татьяна Николаевна Захароваа.
Хайди юнармеецтер теести искіргеннер, ефрейтор Сергей Токмашев, школада ӱгренчеткенде, спортнаң сыбыра айғасчаң, хол-азахнаң кӱрезер кӧрімге хынҷаң. Iдӧк ол, политехникумда ӱгреніп, водитель специальнозын алған. Ӧнетін чаа операциязында зенитнай ракеталығ дивизионның водительі полған. 12 августта, махачы чаалазып, чуртазын матыр чіли пир салған, ағаа 23 час полған. Руслан Матвеев кічігдең чааҷы поларға сағынған, iди ол чааҷы службазын Чаа-талай флодында иртчеткен. Ӧнетін чаа операциязында Руслан разведчик полған, 6 апрельде, iдӧк махачы чаалазып, чуртазын пир салған, ағаа 19 час полған. Чааҷылар ікізі Мужество орденiнең сыйыхтатхан (ӱреен соонда).
Митингте ідӧк чоох тутхан Ағбан город пазының орынҷызы Татьяна Карташова:
– Матырларыбыс постарының аттарын хаҷанға даа тархынға кир салғаннар. Пістің чӱреебісте олар iдӧк хаҷанға даа халчалар. Сергейнің паза Русланның паба-iҷелеріне сын патриоттар ӧскір салған ӱчӱн улуғ алғыс. Оларның чобалызына хозылчабыс.
Школа ӱгренҷілері сарын толдырғаннар, анаң, матырларны сағысха киріп, пір минута сым турған соонда хумартхы чардыларзар чахайахтар салылған.
9 № ШКОЛАДА
Ада чир-суубыстың Матырлары кӱнінде 9 № школада ирткен хумартхылас мероприятиезiнде Хакасия пазы Валентин Коновалов, Ағбан город пазының орынҷызы Владимир Крафт араласханнар. Митинг школаның стенезiнде Украинада иртірілчеткен ӧнетін чаа операциязында чуртазын пир салған Егор Кадочниковтың хумартхы чардызын азарына чарыдылған. Ол, махачы чаалазып, 3 июльда матыр чіли чат халған, ағаа 24 час полған. Чаалазығ пӧгінін толдырчадып, махачы хылиин кӧзіткен ӱчӱн Мужество орденiнең сыйыхтатхан (ӱреен соонда).
Юнармеецтер Россияның паза Хакасияның флагтарын ағылғаннар, хумартхы чардылар хыринда аарластығ хадағда школаның юнармеецтері турғаннар. Россияның паза Хакасияның гимннері толдырылған соонда Хакасия пазына сӧс пирілген.
– Пӱӱн, Россияның Матырлары кӱнінде, піс ӧнетін чаа операциязында, махачы чаалазып, чуртазын пир салған чир-суғҷыбыс Егор Кадочниковтың хумартхы чардызын асчабыс. Егор Дмитриевич Хакасия чуртағҷыларының сағызында сын чааҷы полып хаҷанға даа халар. Піс матырларыбыстың аттарын хайраллирынҷа прай кирек тоғыс апарарбыс. Пӱӱн піс Чир-суубысты арачылапчатхан, Донбасстың паза Украинаның чуртағҷылары ӱчӱн турысчатхан прай чааҷыларға алғызыбыс читірчебіс. Егор пістің чӱреебісте хаҷанға даа халар. Сабланыс матырға хаҷанға даа! – теен Валентин Коновалов.
Хумартхылас митингiнде iдӧк чоох тутханнар Владимир Крафт, 9 № школаның директоры Николай Степанчук, Егорның пабазы Дмитрий Кадочников. Хумартхы чардыны азар право пирілген Валентин Коноваловха паза школаның юнармеецтер пірігізінің устағҷызы Захар Савченкаа.
Таныхтирға кирек, школа стенезiнде пу хумартхы чарды тӧртінҷiзі. Анда пу школада ӱгренген, кизек чаалазығларда чуртазын пир салған, Мужество орденiнең сыйыхтатхан лейтенант Сергей Ашлаповтың, Россияның Матыры капитан Игорь Лелюхтың, Чаа Хызыл Знамязы орденiнең cыйыхтатхан улуғ лейтенант Александр Литвиновтың хумартхы чардылары хызылых. Амды лейтенант Егор Кадочниковтың хумартхы чардызы хоза хызыл парды.
Хумартхылас митингiнде пір минута сым турған соонда чыылысхан чон хумартхы чардылар алтынзар чахайахтар салған.
Ӧнетін чаа операциязында чат халған матыр чир-суғҷыларыбыстың хумартхы чардылары Хакасия пазының чахиинҷа тимнелчелер. Чағынғы туста олар муниципальнай пӱдістерге пирілерлер, чуртазын пир салған чир-cуғҷыларыбыстың хумартхы чардылары олар ӱгренген ӱгредіг заведениелерінің стенелерінде хызылар.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
30 | 1 | 2 | 3 | 4 | 5 | 6 |
7 | 8 | 9 | 10 | 11 | 12 | 13 |
14 | 15 | 16 | 17 | 18 | 19 | 20 |
21 | 22 | 23 | 24 | 25 | 26 | 27 |
28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде