ЧИДIГЛЕРI ПАР, ЧЕ СИДIКСIНIСТЕРI УЛАМОХ КӦП
14.12.2022
Хабарлар
Форум. С.П.Кадышевтiң адынаң чон чайаачызы кiнiнде «30 лет на рынке образовательных услуг» хазнани нимес ӱгредiгнiң форумы ирткен
30 чыл мының алнында, 1992 чылда, «Россия Федерациязындағы ӱгредiгдеңер» закон сыххан, хайзында олғаннарны iдӧк хазнани нимес ӱгредiгліг организацияларда ӱгредерге чарир тiп таныхталған. Iди регионнарда хазнани нимес организациялар тӧстелiп пасталған. Хакасияда ӧӧнiнде андағ олған садтары паза палаларға хоза ӱгредiг пирчеткен организациялар азылған, итсе-де, нинҷе-де школа парох.
«30 лет на рынке образовательных услуг» форумда ӱгредiг киреенең айғасчатхан идiнҷектерге иң пастап ағырсымнығ сурығларын ӱзӱрер паза оларны республиканың устағ-пастаана искiрер оңдай полған. Анзына «Хазнани нимес ӱгредiг организацияларына хабазары, социальнай палғалыс» тегiлек стол чарыдылған. Аның тоғызында Хакасия пазы Валентин Коновалов араласхан.
– Республикадағы хазнани нимес ӱгредiгліг организациялар ӧткiн тилiпчелер. Хакасияның пу кӧстегҷе опыды улуғ. Че чидiглерi пар даа полза, сидiксiнiстерi илеедӧк, хайзыларын хада-пiрге пӧгерге кирек, – айланызында таныхтаан Валентин Олегович.
Тегiлек столда форумның оргкомитедiнiң кнезi, педагогика наукаларының кандидады Сергей Ряшенцев хазнани нимес ӱгредiглiг организацияларның иң ағырсымнығ суриин кӧдiрген. Хайди ол искiрген, мындағ организацияларны пiрее министерствоның холына пир саларға кирек. Ӱгредiг, экономика алай ба iстеніс министерстволарына. Устапчатхан орган чох олар республика алай ба федеральнай синдегi грант марығларында, субсидиялар, тӧбiн проценттiг кредиттер аларында толдыразынаң аралас полбинчалар. Пасха сӧснең, хабазығ чох халчалар. Пiрее министерство оларны позынзар алып алған полза, олар пос сурығларынаң андар айлан турарҷыхтар.
Сизiнгенде, хазнани нимес ӱгредiгліг организациялар Хакасияның экономика тилiзi министерствозының холына кiрерге хынчалар. Хайди олар таныхтааннар, олар пос киреенең айғасчалар, аннаңар ол эконимикаа чағын.
– Минiң кӧрiзiмнең, пу сурығны хайди даа пӧгерге кирек. Че аның узы-пазына сығып алар ӱчӱн, пiске пасха регионнар аны хайди пӧкчеткенiн кӧрiп аларға кирек тiп санапчам, iдӧк федеральнай кіннең чӧптезерге паза даа пасха оңдайлар тiлирге кирек. Устапчатхан орган табыл парза даа, хазнани нимес ӱгредiгліг организациялар прай даа министерстволарнаң палғалыс тударлар, – таныхтаан чооғында Валентин Коновалов.
Тегiлек столда идiнҷектерге Хакасияның устағ-пастаана постарының ағырсымнығ сурығларынаң айланар оңдай полған. Хайзылары асхынах полбаан. Анзынаң пу форум тузалығ полған тиирге чарир.
Хайдағ айланыстар полған? Ол палатка олған лагерьлерiн тилiдерi, пасталығ класстардағы ӱгренҷiлернi тикке азыриры, спорт залларны тыхтирға полыс пирерi, олғаннарны ибде ӱгретчеткен организацияларға хабазары, мындағ организациялар орындағы школаларнаң палғалыс тудары паза аттестация иртерге полызары. Пу айланыстар хоостыра профильлiг министерстволар андох нандырғаннар, хайзыларын пӧгiп алар ӱчӱн тус киректелче.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
30 | 1 | 2 | 3 | 4 | 5 | 6 |
7 | 8 | 9 | 10 | 11 | 12 | 13 |
14 | 15 | 16 | 17 | 18 | 19 | 20 |
21 | 22 | 23 | 24 | 25 | 26 | 27 |
28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде