ЧАСКА ХУЗЫ ЧИҢІС АҒЫЛЗЫН
14.12.2022
Хабарлар
Поғдархас. 15 частығ теелбекчі Анатолий Ворошилов «Синяя птица» телевидение марииның финалына сығып алған
Декабрьның пастағы кӱннерінде республика чуртағҷылары ӱн пиріп маң чохха тӱскеннер. Пістің Толя Ворошилов «Россия1» канал иртірчеткен марығда араласча нооза. Ағаа азах меетке сығарға полыс пирерге кирек. Пірдеезі чӧрімнең оортах турбаан. Саарбахтың ӱчӱн ӧмелернең ӱн пиргеннер. «Хакас чирі» газета, хығырҷыларынзар айланып, Толяа хабас пирерге сурынғанох. Чонның кӱстенізі тикке парбаан, теелбекчі, иң кӧп ӱн чыып алып, телевидение марииның азах меедінде аралазар.
«Синяя птица» – олғаннарға кӧрілген улуғ марығ. Ол 2015 чылдаң иртірілче. Ады М.Метерлинктің пьесазынаң алылтыр. Ол часка хузын таныхтапча. Проект Дарья Златопольскаяның пастаанынаң чуртасха кирілген. Чоохтирға кирек, Дарьяның пабазы – башкир чонның оолғы. Арға-мӧрійде искусствоның аймах кӧрімнерінең айғасчатхан палалар араласчалар. Оларның санында кічіг музыканттар, теелбекчілер, гимнасттар, актерлар паза пасхазы. Марығда устарын кӧзіткеннернiң аразында Иван Бессоновты, Виктория Листунованы паза Вита Корниенконы таныхтирға чарир. «Синяя птица» проектте араласхан соонаң пианист Бессонов 2018 чылда классика музыканттарының «Евровидение» мариинда чиңіс тутхан. Ол улуғ чидіг. Гимнаст Вика Листунова Токиода ирткен Олимп ойыннарында ӧӧрелерінең хада алтын медальны холға кирген. Корниенко Витаа 12 ле час, 2022 чылға хызыҷах 80 артиинаң фильмде суурынарға маңнанған. Аның ӧӧн рольлар пар. Илбек Ада чааға чарыдылған «Джульбарс» сериалда Витанаң хада хакас оол Вячеслав Субраков суурынған. Тӧӧ чирінең сыххан артист якут Яша Николаевті ойнапча.
Пӱӱл «Синяя птица» марығ 9-ҷы хати иртірілче. Араласчылар аразында – Асхыс аймаандағы Пилтір аалның чуртағҷызы Анатолий Ворошилов. Саарбах кiчігдең брейкингнең айғасча. Тренері – Прокопий Тормозаков. Амғы туста брейкинг олимп спорт кӧріміне саналча. 2024 чылда Парижте пастағы марығлар иртерлер. Аннаңар «Хакас чирінде» 2022 чылның 16 сентябрьында сыххан материалда хығырып аларға чарир.
«Синяя птица» марығның оңдайларынаңар Прокопий Тормозаков чоохтап пирген. Тренернің таниинаң, ӱгренҷілерінің узы ӧссін тіп, ол палаларны аймах марығларға тӧреміл ысча. Пылтыр Прокопий Сергеевич олғаннарны «Синяя птица» марығда араластыртарға пӧгінтір. Анзы оой полбиндыр. Чир-суғҷыбыс таныхтапча:
– Пічіктер тимнеп, порастан на парғам. Салтарында піс пастағы таллағ чардығында даа аралас полбаабыс. Пӱӱл, тізең, «Синяя птица» марыға постары хығырғаннар. Августта Толя «Азияның олғаннары» чоннар аразындағы ойыннарда ікі алтын медаль утхан. Аны Россияның ӧӧн каналлары чарытханнар. Андада ӱгренҷіме хайығ айландырған поларлар.
Кастинг Москвада сентябрьда ирткен. Толяа самолетха билеттерні Хакасияның ӱгредіг паза наука министерствозы ал пирген, мағаа – «Чииттернің стратегия паза проекттер кіні» фонд. Юлия Игоревна Ворошиловаа паза Оксана Витальевна Трусоваа хабасхан ӱчӱн улуғ алғызым читірчем.
Марығның I таллағ чардығына чон Россияның аймах пулуңнарынаң чыылыстыр. Ол «Мосфильм» киностудияның павильонында ирткен. Анда 10 муңҷа кізі полтыр. Толя Ворошилов, кастинг иртiбіскенде, октябрьда ікінҷі чардығында узын сынаан. Аның соонда ла ол проектте аралазар тіп искіргеннер. Саарбахты паза аның сӧбірезін видеоға октябрьдох сууртырлар. Олох туста Прокопий Сергеевич ӱгренҷізінең хада теелбекті чайааннар. Тренер чооғын узаратча:
– Толя Юрий Шатунов толдырған «Розовый вечер» сарын хоостыра теелбектенген. Аны позыбыс таллаабыс. Шатуновты прай чӱреемнең улуғлапчам, ол пӱӱл чайғызын чуртастаң парыбысхан. Эфирде сарынны «Gғrғ Groovғ» ӧме толдырған. Ырҷы Татьяна Шаманина аның ӧӧн сағызын чахсы читір пирген. Теелбекті хореограф Гарик Рудник турғызарға кирек полған. Сынында прай тоғысты Толянаң хада иткебіс. Итсе, Рудник декорациянаң полыс пирген, Толяны тонандырыбысхан, теелбек хоостыра улуғ нимес чӧптер пирген.
«Синяя птица» марығны тимнепчеткен ӧме пӧзік синде тоғынча. Прай нимее хайығ айландырчалар. Толядаңар видеоны, ол профайл адалчаттыр, чахсы тимнебізер пӧгіннең пісті Москвазар тарт чӧргеннер. Андада ӱгренҷілерім Настя Сигаеванаң Макар Тюкпиековты хада алып алғам.
Толя Ворошиловтың теелбектенчеткенін кӧні эфирде 27 ноябрьда кӧзіткеннер. Кӧрігҷілер залында аның ӱчӱн іҷезі Евгения, нигеҷізі Екатерина, тренері Прокопий «ағырғаннар». Сарынны ӧменең толдырғанын Тормозаков сағысха кирерге дее хынминча. Чоохтирға кирек, марығның II чардығынаң пасти прай хорадығларны «Синяя птица» проекттің оргкомитеді позына алған.
Марығ соонаң павильонда ол Россияның чон артизі Сергей Безруковха тоғастыр. Сергей Витальевич чарғыҷылар санына кірче. Ол хакас тренерге чахсы тоғынчазың тіптiр. Тоғазығдаң cелфи оңдайынаң суурынған сом халған.
Прокопий Сергеевич ӱгренҷізі позын турыстыра кӧзідер тіп ікінҷілебиндір. Аны Хакасияның чуртағҷылары Толяның ӱчӱн матап ӱн пиргені хайхатхан. Ол чоохтапча:
– Сибирьде брейкингче пірігіс пар. Олар ідӧк ӧткін ӱн пиртiрлер. Хабасхан ӱчӱн прайзына алғызым читірчем. Толя сынап Ағбанзар тренировкаларға аалдаң неделя сай чӧрче. Амды ол 9-ҷы класста ӱгренче. Аны тоосса, орындағы олимп резерві училищезiнзер (техникумзар) кірер.
Марығдаңар искіріглер сағам чоғыл. Прайзы устарын кӧзіт пирерін cағыпчабыс. 17 декабрь соонаң, неке, толдыра кӱснең азах меетке тимненiп пастирбыс. Хабарлар полза, «Skill Flң» теелбек школазының «ВКонтакте» социальнай сетьтің страницазында искірербіс.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
30 | 1 | 2 | 3 | 4 | 5 | 6 |
7 | 8 | 9 | 10 | 11 | 12 | 13 |
14 | 15 | 16 | 17 | 18 | 19 | 20 |
21 | 22 | 23 | 24 | 25 | 26 | 27 |
28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде