ЧУРТАС СИНI ЧАХСЫЛАНДЫРЫЛЧА
23.12.2022
Хабарлар
Чыл салтары. Пӱӱл республикада, Хакасияның iстенiс паза социальнай арачыланыс министерствозы ӧткiн тоғыс апарған сылтаанда, чонға аймах социальнай хабазығлар пирiлген
Хакасия пазы Валентин Коновалов читi паза аннаң кӧп пала ӧскiрчеткен пис сӧбiрее наа «ГАЗель» клӱстерiн читiрген. Сӧбiрелер сигiс орыннығ ГАЗ 221717 микроавтобустарның ээлерi полыбысханнар. Полған на автомобильнiң паазы – 1 миллион 989 муң салковай, микроавтобустар аларына республика бюджедiнең 10 миллион азыра салковай позыдылған. Кӧп пала ӧскiрчеткен сӧбiрелерге мындағ сыйых 2011 чылдаң пирiлiп пасталған, он чыл аразына 61 сӧбiрее транспорт читiрiлген.
Iдӧк республикада социальнай чӧптезiг хазна хабазиин пирерi аннаң андар узарадылча. Амғы туста 1889 социальнай чӧптезiг идiл парған, тиксi 255,7 миллион салковайға. Пос киреен азарына 619 чӧптезiг идiлген, тоғыс тiлирiне – 587, пос хониин тилiдерiне хазна хабазиинаң 385 кiзi тузаланған, сидiк чуртас оңдайларынаң сығып аларына социальнай чӧптезiгнi 298 кiзi иткен.
Хакасиядаң ӧнетiн чаа операциязында араласчатхан чир-суғҷыларыбысха пiр хатап пирiлчеткен 100 муң салковай тӧлелген, ол санға кiрче чардыхти мобилизацияа тартылғаннарның сӧбiрелерiне паза палаларына азынада 10-ар муң салковай пирiлгенi. Пастағы хабазығларға паза 10-ар муң cалковай тӧлеглерге 40,9 миллион салковай пирiл парған. Iдӧк хоза хабазығларға кiр парған хара тас паза ЖКУ ӱчӱн компенсация, олған лагерьлерiнзер тикке путевкалар пирерi паза даа пасха полызығларға республика бюджедiнең 166,5 миллион салковай позыдылары кӧрiлче. Азынада 40,9 миллион салковай позыдылғанынаң хада Хакасия бюджедiнең 200 миллион салковай хорадылар.
2022 чылда чайғызын 22593 пала тынағ лагерьлерiнде тынанып алған, ол санда сидiк чуртас оңдайларына кiр парған 9314 олған.
Пӱӱл «Улуғ тӧл» федеральнай проекттiң «Демография» национальнай проектiнҷе Ағбандағы ветераннар пансионадында 100 орынға кӧрiлген хоза корпустың пӱдiрии пасталыбысхан. Пӱдiрiге хорадығның 90 процентi федеральнай бюджеттең позыдылар. Наа пансионат амғы тусха килiстiре пӱдiрiлер. Чуртаҷаң секциялар гостиница оңдайынаң идiлер, пiр пӧлiкте пiр алай iкi кiзi чуртир. Ол корпус пӱӱнгi кӱндегi оңдайларға килiстiре пӱдiрiлер, аннаңар анда чуртаҷаң оңдайлар ибдегi осхас полар. Анда чайаачы мастерскойлар, спорт площадкалары, терапия, компьютер, теелбек пӧлiктерi полар. Прай ол нимелер чуртағҷыларның чуртас оңдайлары чахсы синде полар ӱчӱн идiлче.
Автор :
Тимнеен Наталья ТЮКПЕЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 31 | 1 | 2 | 3 | 4 |
Кӱн таңмазы
Хакасияда
Россияда
Тилекейде